തൃശൂർ: വടക്കാഞ്ചേരി പോലീസ് സ്റ്റേഷനിൽ സംഘർഷമുണ്ടാക്കുകയും പോലീസിന്റെ കൃത്യനിർവഹണം തടസ്സപ്പെടുത്തുകയും ചെയ്ത കേസിൽ അമ്മയും മകളും അറസ്റ്റിൽ. തൂമാനം ചിറയത്ത് വീട്ടിൽ ബിന്ദു എന്ന തൂമാനം ബിന്ദു (റിനി), മകൾ സോന (22) എന്നിവരെയാണ് വടക്കാഞ്ചേരി പോലീസ് അറസ്റ്റ് ചെയ്തത്. ഹണി ട്രാപ്പ് ഉൾപ്പെടെ തൃശൂർ ജില്ലയിൽ നിരവധി കേസുകളിൽ പ്രതികളാണ് ഇരുവരെന്ന് പോലീസ് അറിയിച്ചു.
അയൽവാസിയെ അസഭ്യം പറയുകയും ഭീഷണിപ്പെടുത്തുകയും ചെയ്തെന്ന പരാതിയുമായി ബന്ധപ്പെട്ട് പോലീസ് സ്റ്റേഷനിലെത്തിയ ഇരുവരും സംസാരിക്കുന്നതിനിടെ സ്റ്റേഷൻ ഹൗസ് ഓഫീസർ അനൂപിനെ ഭീഷണിപ്പെടുത്തുകയും അസഭ്യം പറയുകയും ചെയ്തെന്നാണ് ആരോപണം. തുടർന്ന് സ്റ്റേഷനിലെ വസ്തുവകകൾക്ക് നാശനഷ്ടമുണ്ടാക്കുകയും സംഘർഷം സൃഷ്ടിക്കുകയും ചെയ്തു.
വനിതാ പോലീസ് ഉദ്യോഗസ്ഥരെ ആക്രമിച്ച് പരിക്കേൽപ്പിക്കുകയും പോലീസിന്റെ ഔദ്യോഗിക കൃത്യനിർവഹണം തടസ്സപ്പെടുത്തുകയും ചെയ്തതായും പരാതിയുണ്ട്. സംഭവത്തെത്തുടർന്ന് എസ്.എച്ച്.ഒ. അനൂപിന്റെ നേതൃത്വത്തിൽ ഇരുവരെയും അറസ്റ്റ് ചെയ്യുകയായിരുന്നു.
