മമ്മൂട്ടിയുടെ അസുഖത്തെക്കുറിച്ച് അഭ്യൂഹങ്ങൾ പരക്കുന്നതിനിടെ ശബരിമല ദർശനത്തിനിടയിൽ മമ്മൂട്ടിയുടെ പേരിൽ ഉഷപൂജ നടത്തി നടൻ മോഹൻലാൽ. മുഹമ്മദ് കുട്ടി, വിശാഖം നക്ഷത്രത്തിലാണ് നടൻ തന്റെ പ്രിയസുഹൃത്തും സഹോദര തുല്യനുമായ ഇച്ചാക്കയുടെ പേരിൽ വഴിപാട് നടത്തിയിരിക്കുന്നത്.
ചൊവ്വാഴ്ച വൈകുന്നേരത്തോടെയാണ് മോഹൻലാൽ ശബരിമല ദർശനം നടത്തിയത്. ഗണപതി കോവിലിൽനിന്ന് കെട്ട് നിറച്ച് മലകയറിയ മോഹൻലാൽ സന്ധ്യയോടെ അയ്യപ്പദർശനം നടത്തിയെങ്കിലും ബുധനാഴ്ച രാവിലെ നെയ്യഭിഷേകം നടത്തിയാവും മലയിറങ്ങുക. അതേസമയം മമ്മൂട്ടിയും മോഹൻലാലും ഏറെ വർഷങ്ങൾക്കിപ്പുറം ഒന്നിച്ച് അഭിനയിക്കുന്ന മഹേഷ് നാരായണൻ ചിത്രം അണിയറയിൽ ഒരുങ്ങുകയാണ്.
ചിത്രം സാമ്പത്തിക പ്രശ്നങ്ങൾ മൂലവും മമ്മൂട്ടിയുടെ ആരോഗ്യപ്രശ്നങ്ങൾ മൂലവും നിർത്തിവച്ചതായി അഭ്യൂഹങ്ങൾ സമൂഹ മാധ്യമങ്ങളിൽ പ്രചരിച്ചിരുന്നുവെങ്കിലും ഇതെല്ലാം നിർമാതാക്കളിൽ ഒരാളായ സലിം റഹ്മാൻ തള്ളിക്കളയുകയുണ്ടായി. മമ്മൂട്ടിക്കെതിരെയും സിനിമയ്‌ക്കെതിരെയും പ്രചരിക്കുന്നത് അടിസ്ഥാന രഹിതമായ കാര്യങ്ങളാണ്. മാർച്ച് അവസാനത്തോടെ ചിത്രീകരണം പുനരാരംഭിക്കാൻ ഇരിക്കുന്ന വേളയിൽ ഇത്തരം പ്രചരണങ്ങൾ മലയാള സിനിമയെ തകർക്കാൻ വേണ്ടിയാണെന്ന് സലിം റഹ്മാൻ സമൂഹ മാധ്യമങ്ങളിൽ കുറിച്ചു. കൂടാതെ റംസാൻ നോമ്പെടുക്കാനായാണ് മമ്മൂട്ടി ഇടവേളയെടുത്തിരിക്കുന്നതെന്ന് മമ്മൂട്ടിയുടെ പിആർ ടീം വ്യക്തമാക്കുകയും ചെയ്തിരുന്നു.
