തിരുവനന്തപുരം: മാസപ്പടി കേസിൽ എൻഫോഴ്‌സ്‌മെന്റ് ഡയറക്ടറേറ്റ് നൽകിയ കത്തിൽ സർക്കാർ ഇന്ന് തീരുമാനമെടുത്തേക്കും. പ്രത്യേക അന്വേഷണ സംഘത്തെ നിയോഗിക്കുന്ന കാര്യമാണ് പ്രധാനമായും പരിഗണിക്കുന്നത്. മുഖ്യമന്ത്രി വി.ഡി. സതീശനും ആഭ്യന്തരമന്ത്രി രമേശ് ചെന്നിത്തലയും തമ്മിലുള്ള ചർച്ചയ്ക്ക് ശേഷമായിരിക്കും അന്തിമ തീരുമാനം.
ഇ.ഡി. നൽകിയ കത്തിന്റെ അടിസ്ഥാനത്തിൽ അന്വേഷണം നടത്തുന്നതിന് നിയമതടസമില്ലെന്നാണ് അഡ്വക്കേറ്റ് ജനറലിന്റെ നിയമോപദേശം. ഏത് തരത്തിലുള്ള അന്വേഷണം വേണമെന്ന് സർക്കാരിന് തീരുമാനിക്കാമെന്നും നിയമോപദേശത്തിൽ വ്യക്തമാക്കിയിട്ടുണ്ട്. വിജിലൻസിന്റെ പ്രാഥമിക അന്വേഷണവും പ്രത്യേക അന്വേഷണ സംഘത്തെ നിയോഗിക്കുന്നതുമാണ് സർക്കാർ പരിഗണിക്കുന്ന പ്രധാന സാധ്യതകൾ.
പിണറായി വിജയനും മുഹമ്മദ് റിയാസിനുമെതിരെ അഴിമതി നിരോധന നിയമപ്രകാരം അന്വേഷണം നടത്താമെന്നാണ് നിയമോപദേശത്തിലെ നിലപാട്. ഇ.ഡി. കൈമാറിയ രേഖകളും മറ്റ് വിവരങ്ങളും പരിശോധിച്ച ശേഷമാണ് എ.ജി. നിയമോപദേശം നൽകിയത്.
നിയമോപദേശം ആഭ്യന്തരവകുപ്പിന് കൈമാറിയിട്ടുണ്ട്. മുഖ്യമന്ത്രി വി.ഡി. സതീശനുമായി ആലോചിച്ച ശേഷമായിരിക്കും തുടർനടപടികളിലേക്ക് കടക്കുകയെന്ന് ആഭ്യന്തരമന്ത്രി രമേശ് ചെന്നിത്തല നേരത്തെ വ്യക്തമാക്കിയിരുന്നു.
