പാലക്കാട്: പാലക്കാട് റെയിൽവേ സ്റ്റേഷനിൽ യാത്രക്കാരായ സ്ത്രീകൾക്ക് നേരെ അക്രമം. പാലക്കാട് നൂറണി സ്വദേശി കിരൺ എം (48) എന്ന വ്യക്തിയാണ് സ്ത്രീകളെ മർദ്ദിച്ചത്. കൂടെയുണ്ടായിരുന്ന15 വയസുള്ള കുട്ടിയോട് ലൈംഗിക ചുവയോടെ സംസാരിച്ചത് ചോദ്യം ചെയ്തതിനാണ് ഇയാൾ സ്ത്രീകളെ മർദ്ദിച്ചത്.
കഴിഞ്ഞ ദിവസം രാത്രിയായിരുന്നു സംഭവം. നാല് സ്ത്രീകൾ പാലക്കാട് നിന്നും കണ്ണൂരിലേക്ക് ട്രെയിൻ കയറാൻ വന്നപ്പോഴാണ് ദുരനുഭവം നേരിട്ടത്. റെയിൽവേ സ്റ്റേഷനിലിരുന്നു മൊബൈൽ നോക്കുകയായിരുന്ന കുട്ടിയുടെ അടുത്തേക്ക് ഇയാൾ വരികയായിരുന്നു. ആദ്യം സൗഹൃദത്തിൽ സംസാരിച്ച പ്രതി പിന്നീട് കുട്ടിയോട് ലൈംഗിക ചുവയോടെ സംസാരിക്കുകയായിരുന്നു. തുടർന്ന് കൂടെയുണ്ടായിരുന്നവരോട് കുട്ടി വിവരം പറയുകയായിരുന്നു. ഇതു ചോദ്യം ചെയ്ത സ്ത്രീകളെ ഇയാൾ ആക്രമിക്കുകയായിരുന്നു.
സ്ത്രീകളെ ആക്രമിക്കൽ, പൊതുസ്ഥലത്ത് അശ്ലീലം പറയൽ, ലൈംഗിക ചുവയോടെ ശാരീരിക സ്പർശനം, തടഞ്ഞുവെക്കൽ തുടങ്ങിയ വകുപ്പുകൾ ചുമത്തിയാണ് കിരണിനെ പോലീസ് അറസ്റ്റ് ചെയ്തത്. കിരൺ റിമാൻ്റിലാണിപ്പോഴുള്ളത്. അതേസമയം 15 വയസുകാരിയോട് ലൈംഗിക ചുവയോടെ സംസാരിച്ച സംഭവത്തിൽ നിലവിൽ പോക്സോ വകുപ്പ് ചുമത്തിയിട്ടില്ല.
