പത്തനംതിട്ട: ഡ്യൂട്ടിക്കിടെ വനിതാ പൊലീസ് ഉദ്യോഗസ്ഥയെ ആക്രമിക്കുകയും ഔദ്യോഗിക കൃത്യനിർവഹണം തടസ്സപ്പെടുത്തുകയും ചെയ്ത കേസിൽ യുവതി അറസ്റ്റിൽ. പന്തളം ചേരിക്കൽ സ്വദേശിനി കളരിക്കൽ തുണ്ടിൽ വീട്ടിൽ ചിത്ര കെ.പി. (38)യെയാണ് പന്തളം പൊലീസ് അറസ്റ്റ് ചെയ്തത്.
തിങ്കളാഴ്ച വൈകിട്ട് മൂന്നോടെയാണ് സംഭവം. ചേരിക്കലിൽ ചിത്രയുടെ കുടുംബവും അയൽവാസിയും തമ്മിലുള്ള ഭൂതർക്കവുമായി ബന്ധപ്പെട്ട് താലൂക്ക് സർവേയർ സ്ഥലം അളക്കാനെത്തിയിരുന്നു. അളവെടുപ്പിന് ശേഷം സ്ഥാപിച്ച അതിർത്തിക്കല്ലുകൾ ചിത്ര പിഴുതെറിഞ്ഞതായി പൊലീസ് പറഞ്ഞു.
ഇത് തടയാൻ ശ്രമിച്ച താലൂക്ക് സർവേയറുടെ സുരക്ഷയ്ക്കായി ഡ്യൂട്ടിയിലുണ്ടായിരുന്ന പന്തളം പൊലീസ് സ്റ്റേഷനിലെ വനിതാ പൊലീസ് ഉദ്യോഗസ്ഥ സുനിയെ യുവതി ആക്രമിക്കുകയായിരുന്നു. യൂണിഫോമിലും മുടിയിലും പിടിച്ചുവലിക്കുകയും കാലിൽ തൊഴിക്കുകയും ചെയ്ത് ഡ്യൂട്ടി തടസ്സപ്പെടുത്തിയെന്നാണ് കേസ്. പരിക്കേറ്റ വനിതാ പൊലീസ് ഉദ്യോഗസ്ഥയെ ആശുപത്രിയിൽ പ്രവേശിപ്പിച്ചു.
Related Post
വിവരമറിഞ്ഞെത്തിയ കൂടുതൽ വനിതാ പൊലീസ് ഉദ്യോഗസ്ഥരുടെ സഹായത്തോടെയാണ് ചിത്രയെ കസ്റ്റഡിയിലെടുത്തത്. ഡ്യൂട്ടിയിലുണ്ടായിരുന്ന പൊലീസ് ഉദ്യോഗസ്ഥയെ ആക്രമിച്ചതിനും ഔദ്യോഗിക കൃത്യനിർവഹണം തടസ്സപ്പെടുത്തിയതിനുമാണ് കേസ് രജിസ്റ്റർ ചെയ്തത്. പിന്നീട് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
