കോഴിക്കോട്: കോഴിക്കോട് വെള്ളിപ്പറമ്പിൽ ബസ് ജീവനക്കാരുടെ മർദനത്തിൽ യുവാവിന് ഗുരുതര പരിക്ക്. പിലാശ്ശേരി സ്വദേശി അസറുദ്ദീനാണ് ആക്രമണത്തിൽ പരിക്കേറ്റത്. ബസ് ഇൻഡിക്കേറ്റർ ഇടാതെ പിന്നോട്ട് എടുത്തത് ചോദ്യം ചെയ്തതിനായിരുന്നു മർദനം. ബസ് റിവേഴ്സെടുക്കുന്നത് അറിയാതെ പിന്നിൽ വന്ന രണ്ടുപേരുൾപ്പെടുന്ന ബൈക്ക് യാത്രികർ അപകടത്തിൽ നിന്ന് തലനാരിഴയ്ക്കാണ് രക്ഷപ്പെട്ടത്. പിന്നാലെ ചോദ്യം ചെയ്ത ബൈക്ക് യാത്രികരായ യുവാക്കളെ ബസ് ജീവനക്കാർ മർദിക്കുകയായിരുന്നു.
അതേസമയം പരിക്കേറ്റ അസറുദ്ദീന് ദിവസങ്ങൾ മുമ്പ് ശസ്ത്രക്രിയ കഴിഞ്ഞിരുന്നു. ഇയാളുടെ വയറിനുൾപ്പെടെയാണ് മർദനമേറ്റത്. ഇയാളെ സമീപത്തെ സ്വകാര്യ ആശുപത്രിയിൽ പ്രവേശിപ്പിച്ചു. നാട്ടുകാർ പ്രതിഷേധിച്ചതിനെ തുടർന്ന് സംഭവത്തിൽ മെഡിക്കൽ കോളജ് പോലീസ് ബസ് ജീവനക്കാരെ കസ്റ്റഡിയിലെടുത്തു. രണ്ട് ജീവനക്കാർ സംഭവത്തിന് പിന്നാലെ ഓടി രക്ഷപ്പെട്ടു.
