കൊച്ചി: നഗരത്തിൽ ജോലി തേടിയെത്തിയ ദളിത് യുവതി നേരിട്ടത് കൊടിയ പീഡനമെന്ന് ഭർത്താവ്. രണ്ടുദിവസത്തോളം പൂട്ടിയിട്ട് കൂട്ടബലാത്സംഗത്തിനിരയാക്കിയെന്നും ഐസ്ക്രീമിൽ മയക്കുമരുന്ന് കലർത്തി നൽകി ബോധം കെടുത്തിയ ശേഷമായിരുന്നു പീഡനമെന്നും ഭർത്താവ് വെളിപ്പെടുത്തി. സ്ത്രീകൾ ഉൾപ്പെടെയുള്ളവർ യുവതിയെ ഉപദ്രവിച്ചെന്നും അദ്ദേഹം ആരോപിച്ചു.
വീടുമാറിയതിനെ തുടർന്ന് അധ്യാപികയായിരുന്ന യുവതിക്ക് ജോലി നഷ്ടപ്പെട്ടിരുന്നു. ഇതോടെയാണ് പുതിയ ജോലി തേടിയത്. സാമൂഹികമാധ്യമത്തിൽ കണ്ട സ്പായിലെ മാനേജർ തസ്തികയിലേക്കുള്ള പരസ്യത്തെ തുടർന്ന് അപേക്ഷിക്കുകയും അഭിമുഖത്തിന് എത്താൻ പറയുകയും ചെയ്തു. ജോലി ലഭിച്ചതായി അറിയിച്ച ശേഷമാണ് യുവതി വീട്ടിൽനിന്ന് പോയതെന്ന് ഭർത്താവ് പറയുന്നു.
അടുത്തിടെ ഗർഭച്ഛിദ്രം സംഭവിച്ചതിനെ തുടർന്ന് യുവതി മാനസിക സമ്മർദത്തിന് ചികിത്സയിലായിരുന്നു. ഡോക്ടറുടെ നിർദേശപ്രകാരം മാനസിക പിന്തുണ നൽകുന്നതിന്റെ ഭാഗമായാണ് ഭാര്യ ജോലിക്ക് പോകുന്നതിനെ പിന്തുണച്ചതെന്നും ഭർത്താവ് പറഞ്ഞു.
Related Post
സംഭവദിവസം താൻ ടാക്സി ഓടിക്കുന്ന ജോലിയുടെ ഭാഗമായി മൂന്നാറിലേക്ക് പോയിരുന്നു. രാവിലെ 11 മണിവരെ ഭാര്യയുമായി സംസാരിച്ചിരുന്നു. പിന്നീട് ഫോൺ ലഭിക്കാതായി. പിറ്റേന്ന് രാവിലെയും ബന്ധപ്പെടാൻ കഴിയാതെ വന്നതോടെ വീട്ടുടമയെ വിവരമറിയിച്ച് വീട് പരിശോധിച്ചെങ്കിലും യുവതിയെ കണ്ടെത്താനായില്ല.
വൈകീട്ട് ഏഴുമണിയോടെ യുവതി ഫോണെടുത്ത് സുഹൃത്തിന്റെ അടുത്ത് പോയതാണെന്നും ഇടപ്പള്ളിയിൽനിന്ന് വീട്ടിലേക്ക് വരികയാണെന്നും പറഞ്ഞതായി ഭർത്താവ് പറയുന്നു. ഫോൺ തകരാറിലായതിനാൽ കടയിൽ നൽകിയിരിക്കുകയാണെന്നും അറിയിച്ചു. തുടർന്ന് ഉടൻ വീട്ടിലെത്തിയപ്പോൾ യുവതി കടുത്ത ക്ഷീണത്തോടെ കിടക്കുകയായിരുന്നുവെന്നും ഭർത്താവ് പറഞ്ഞു.
എന്താണ് സംഭവിച്ചതെന്ന് ആവർത്തിച്ച് ചോദിച്ചപ്പോഴാണ് യുവതി പൊട്ടിക്കരഞ്ഞുകൊണ്ട് പീഡനവിവരങ്ങൾ പറഞ്ഞതെന്നാണ് ഭർത്താവിന്റെ വെളിപ്പെടുത്തൽ. ജോലിസ്ഥലത്തെത്തിയതിന് പിന്നാലെ ഐസ്ക്രീമിൽ മയക്കുമരുന്ന് കലർത്തി നൽകിയെന്നും ബോധം നഷ്ടപ്പെട്ടതിന് പിന്നാലെ പീഡിപ്പിച്ചെന്നുമാണ് ആരോപണം.
ശുചിമുറിയിൽ കയറി രക്ഷപ്പെടാൻ ശ്രമിച്ചപ്പോഴും പ്രതികൾ വാതിൽ തകർത്ത് അകത്ത് കയറി പുറത്തേക്ക് വലിച്ചിട്ടെന്നും ഭർത്താവ് ആരോപിച്ചു. മൂന്നുനേരവും മയക്കുമരുന്ന് കലർത്തിയ ഭക്ഷണമാണ് നൽകിയിരുന്നതെന്നും തുടർന്ന് ഭക്ഷണം കഴിക്കാൻ പോലും യുവതി വിസമ്മതിച്ചെന്നും അദ്ദേഹം പറഞ്ഞു.
പീഡനം തുടരുന്നതിനിടെ പുറത്തുനിന്ന് രണ്ടുപേർ കൂടി ലോഡ്ജിലെത്തിയതോടെ യുവതി അവിടെയുണ്ടായിരുന്ന ബിയർ കുപ്പി പൊട്ടിച്ച് ആത്മഹത്യ ചെയ്യുമെന്ന് ഭീഷണിപ്പെടുത്തുകയായിരുന്നു. ഇതോടെയാണ് പ്രതികൾ ഫോൺ തിരികെ നൽകി യുവതിയെ വിട്ടയച്ചതെന്നാണ് ഭർത്താവിന്റെ ആരോപണം. എന്നാൽ പീഡനത്തിന്റെ ദൃശ്യങ്ങളും മറ്റ് തെളിവുകളും കൈവശമുണ്ടെന്നും പരാതിപ്പെട്ടാൽ കൊല്ലുമെന്നും പ്രതികൾ ഭീഷണിപ്പെടുത്തിയെന്നും അദ്ദേഹം പറഞ്ഞു.
സംഭവത്തിൽ മുഖ്യപ്രതികളായ ശ്രീരാജിനെയും ജിത്ത് മാർട്ടിനെയും പൊലീസ് അറസ്റ്റ് ചെയ്തിട്ടുണ്ട്. വയനാട് സ്വദേശിനിയായ അമ്മു എന്ന യുവതിയും പീഡനത്തിൽ പങ്കെടുത്തതായി ഭർത്താവ് ആരോപിക്കുന്നു. യുവതി പുറത്തേക്ക് രക്ഷപ്പെടാതിരിക്കാൻ ലോഡ്ജിന് പുറത്ത് അമ്മുവിന്റെ സുഹൃത്ത് സഞ്ജു കാവൽനിന്നതായും അന്വേഷണത്തിൽ കണ്ടെത്തിയതായി വിവരമുണ്ട്.
സ്പാ ബിസിനസിന്റെ മറവിൽ യുവതികളെ ആവശ്യക്കാർക്ക് എത്തിക്കുന്ന സെക്സ് റാക്കറ്റ് പ്രവർത്തിച്ചിരുന്നോ എന്നതടക്കമുള്ള കാര്യങ്ങളും പൊലീസ് അന്വേഷിക്കുന്നുണ്ട്. പ്രതികളുടെ ഗുണ്ടാബന്ധം, ലഹരി ഇടപാടുകൾ, സ്പാ ബിസിനസിലെ പങ്കാളികൾ എന്നിവ സംബന്ധിച്ചും അന്വേഷണം വ്യാപിപ്പിച്ചിട്ടുണ്ട്.
സംഭവത്തിന് പിന്നാലെ യുവതി കടുത്ത മാനസികാഘാതത്തിലാണെന്നും ഭർത്താവ് പറയുന്നു. ചികിത്സയ്ക്കുള്ള ചെലവും സ്വന്തം നിലയിലാണ് വഹിക്കുന്നതെന്നും അദ്ദേഹം പറഞ്ഞു. കുടുംബപ്രശ്നങ്ങളെ തുടർന്ന് റേഷൻ കാർഡിൽനിന്ന് ബന്ധപ്പെട്ട ആനുകൂല്യങ്ങൾ ലഭിക്കാത്തതിനാൽ സൗജന്യ ചികിത്സ ലഭിക്കുന്നില്ലെന്നും വീട്ടുവാടകയ്ക്കായി മാറ്റിവെച്ച പണം ഉപയോഗിച്ചാണ് നിലവിൽ ചികിത്സ നടത്തുന്നതെന്നും ഭർത്താവ് വ്യക്തമാക്കി.
യുവതിക്ക് സർക്കാർ സംരക്ഷണം നൽകണമെന്നും സംഭവത്തിൽ ഉൾപ്പെട്ട മുഴുവൻ പ്രതികൾക്കെതിരെയും ശക്തമായ നടപടി സ്വീകരിക്കണമെന്നും ഭർത്താവ് ആവശ്യപ്പെട്ടു.
