കൊച്ചി: സി.എം.ആർ.എൽ.–എക്സാലോജിക് പണമിടപാട് കേസിൽ ഇ.ഡി. റിപ്പോർട്ടിന്റെ അടിസ്ഥാനത്തിൽ മുൻ മുഖ്യമന്ത്രി പിണറായി വിജയനടക്കമുള്ളവർക്കെതിരെ അഴിമതി നിരോധന നിയമപ്രകാരം എഫ്.ഐ.ആർ. രജിസ്റ്റർ ചെയ്ത് അന്വേഷണം നടത്തണമെന്ന് ഹൈക്കോടതി ഉത്തരവിട്ടു. കേസെടുക്കാതെ പ്രാഥമിക അന്വേഷണം മാത്രം നടത്തുന്നതിനെ ചോദ്യം ചെയ്ത് അഡ്വ. കെ.എം. ഷാജഹാൻ നൽകിയ ഹർജിയിലാണ് ജസ്റ്റിസ് എ. ബദറുദ്ദീന്റെ ഉത്തരവ്.
പിണറായി വിജയൻ, മകൾ ടി. വീണ, വീണയുടെ ഭർത്താവും മുൻ മന്ത്രിയുമായ പി.എ. മുഹമ്മദ് റിയാസ് എന്നിവർക്കെതിരെ കേസെടുക്കണമെന്നാവശ്യപ്പെട്ട് ഇ.ഡി. സംസ്ഥാന പൊലീസ് മേധാവിക്ക് റിപ്പോർട്ട് നൽകിയിരുന്നു. സി.എം.ആർ.എൽ.–എക്സാലോജിക് സാമ്പത്തിക ഇടപാടുമായി ബന്ധപ്പെട്ട ഇ.ഡി. അന്വേഷണത്തിന്റെ തുടർച്ചയായാണ് അഴിമതി നിരോധന നിയമപ്രകാരം നടപടിയെടുക്കണമെന്ന ആവശ്യം ഉന്നയിച്ചത്.
എന്നാൽ, എഫ്.ഐ.ആർ. രജിസ്റ്റർ ചെയ്യാതെ ക്രൈംബ്രാഞ്ചിന്റെ പ്രാഥമിക അന്വേഷണത്തിന് ഡി.ജി.പി. ഉത്തരവിടുകയായിരുന്നു. ഈ നടപടിയാണ് ഹർജിക്കാരൻ കോടതിയിൽ ചോദ്യം ചെയ്തത്. ഡി.ജി.പിക്ക് ഇ.ഡി. നൽകിയ കത്തിന്റെ പകർപ്പ് മുദ്രവച്ച കവറിൽ കോടതിയിൽ സമർപ്പിച്ചിരുന്നു.
ഹർജി നിലനിൽക്കില്ലെന്നായിരുന്നു സർക്കാരിന്റെ വാദം. പ്രാഥമിക അന്വേഷണത്തിന് മുമ്പ് തന്നെ എഫ്.ഐ.ആർ. രജിസ്റ്റർ ചെയ്യേണ്ടതില്ലെന്നും ഇതുസംബന്ധിച്ച് സുപ്രീം കോടതി ഉത്തരവുകളുണ്ടെന്നും സർക്കാർ കോടതിയെ അറിയിച്ചു.
എന്നാൽ, ഹർജിക്കാരന്റെ വാദത്തെ പിന്തുണയ്ക്കുന്ന നിലപാടാണ് ഇ.ഡി. സ്വീകരിച്ചത്. കള്ളപ്പണം വെളുപ്പിക്കൽ തടയൽ നിയമത്തിലെ 66(2) വകുപ്പ് പ്രകാരം നൽകിയ കത്തിന്റെ അടിസ്ഥാനത്തിൽ, സുപ്രീം കോടതി വിധികൾ അനുസരിച്ച് എഫ്.ഐ.ആർ. രജിസ്റ്റർ ചെയ്യേണ്ടത് നിർബന്ധമാണെന്ന് ഇ.ഡി. വാദിച്ചു. ആരോപിക്കപ്പെടുന്ന കുറ്റകൃത്യങ്ങളുടെ ഗൗരവം കണക്കിലെടുക്കുമ്പോൾ പ്രാഥമിക അന്വേഷണത്തിന്റെ ആവശ്യമില്ലെന്നും കേസെടുക്കാൻ ബാധ്യതയുണ്ടെന്നുമായിരുന്നു ഇ.ഡിയുടെ നിലപാട്. ഈ വാദം അംഗീകരിച്ചാണ് ഹൈക്കോടതി ഉത്തരവ് പുറപ്പെടുവിച്ചത്.
ഇ.ഡി. റിപ്പോർട്ടിന്റെ അടിസ്ഥാനത്തിൽ കേസെടുക്കുന്നതിൽ സർക്കാർ തുടക്കംമുതൽ വിമുഖത കാട്ടിയെന്ന വിമർശനവും ഉയർന്നിരുന്നു. റിപ്പോർട്ടിൽ യു.ഡി.എഫ്. നേതാക്കളുടെയും ആഭ്യന്തരമന്ത്രിയടക്കമുള്ളവരുടെയും പേരുകൾ പരാമർശിക്കുന്ന പശ്ചാത്തലത്തിലാണ് സർക്കാർ നടപടി വൈകിപ്പിക്കുന്നതെന്നായിരുന്നു ആക്ഷേപം.
