തിരുവനന്തപുരം: കൃഷിയിൽ സജീവമായി പങ്കെടുക്കുന്ന വിദ്യാർഥികൾക്ക് ഗ്രേസ് മാർക്ക് നൽകുന്നതിനുള്ള നടപടികൾ സ്വീകരിക്കുമെന്ന് കൃഷിവകുപ്പ് മന്ത്രി ടി. സിദ്ദിഖ്. വിദ്യാർഥികളിൽ കൃഷിയോടുള്ള താൽപര്യം വർധിപ്പിക്കുകയാണ് പദ്ധതിയുടെ ലക്ഷ്യമെന്നും കൃഷി പ്രവർത്തനങ്ങളിലൂടെ കുട്ടികളെ കാർഷിക മേഖലയുമായി കൂടുതൽ അടുപ്പിക്കുമെന്നും മന്ത്രി പറഞ്ഞു.
‘കതിർ’ കാർഷിക ക്ലബ്ബിന്റെ പ്രവർത്തനം ഈ വർഷം 500 സ്കൂളുകളിൽ ആരംഭിച്ചിട്ടുണ്ട്. അടുത്ത അധ്യയന വർഷത്തോടെ സംസ്ഥാനത്തെ എല്ലാ സ്കൂളുകളിലും കതിർ ക്ലബ്ബുകൾ ആരംഭിക്കാനാണ് ലക്ഷ്യമിടുന്നത്. കൃഷി പഠനത്തിന്റെ ഭാഗമാക്കുന്നതിനൊപ്പം വിദ്യാർഥികളെ നേരിട്ട് കൃഷിയിലേക്ക് എത്തിക്കുകയാണ് പദ്ധതിയുടെ ലക്ഷ്യം.
സ്കൂളുകളിൽ മാത്രമല്ല, വിദ്യാർഥികളുടെ വീടുകളിലും കൃഷി ആരംഭിക്കുന്നതിനും പദ്ധതിയുണ്ട്. ഇതിനായി ഓരോ സ്കൂളിനും 10,000 രൂപ വീതം നൽകും. സ്കൂളുകളിൽ കൃഷിക്ക് അനുയോജ്യമായ സ്ഥലമില്ലാത്തിടത്ത് മറ്റ് സ്ഥലങ്ങൾ കണ്ടെത്തി കൃഷി നടത്താനും പദ്ധതിയിലൂടെ ലക്ഷ്യമിടുന്നു.
Related Post
കതിർ പദ്ധതിയുടെ ഭാഗമായി ‘കതിർ സഞ്ചാരം’, ‘കതിർ മാർക്കറ്റ്’ എന്നിവയും ആരംഭിക്കും. സ്കൂളുകളിലെ ഉച്ചഭക്ഷണ പദ്ധതിയുമായി കാർഷിക പ്രവർത്തനങ്ങളെ ബന്ധിപ്പിക്കുന്നതും പരിഗണനയിലുണ്ട്. കൃഷിയിൽനിന്നുള്ള ഉത്പന്നങ്ങൾ വിപണിയിലെത്തിക്കുന്നതിനും കുട്ടികൾക്ക് കാർഷിക പ്രവർത്തനങ്ങളുടെ പ്രായോഗിക പരിചയം നൽകുന്നതിനുമാണ് ഇതിലൂടെ ലക്ഷ്യമിടുന്നത്.
തിരുവനന്തപുരം കുളത്തൂർ ഗ്രാമപ്പഞ്ചായത്തിലെ നെല്ലിക്കോണം ഏലായിലെ കൊയ്ത്തുത്സവം ഉദ്ഘാടനം ചെയ്യുകയായിരുന്നു മന്ത്രി. കാർഷിക മേഖലയിലേക്ക് പുതുതലമുറയെ ആകർഷിക്കുന്നതിനുള്ള വിവിധ പദ്ധതികൾ സർക്കാർ നടപ്പാക്കിവരികയാണെന്നും മന്ത്രി പറഞ്ഞു.