റാഞ്ചി: ജാർഖണ്ഡിലെ ധൻബാദിൽ ഗർഭിണിയായ 17 കാരി ദാരുണമായി കൊല്ലപ്പെട്ടു. ബലിയാപൂർ പോലീസ് സ്റ്റേഷൻ പരിധിയിലെ ഖേർബറിയ പ്രദേശത്തെ കാട്ടിലാണ് ഗിരിഡിഹ് സ്വദേശിനിയായ പൂനം കുമാരിയെ തലയറുത്ത് കൊലപ്പെടുത്തിയ നിലയിൽ കണ്ടെത്തിയത്. സംഭവത്തിൽ ഭർതൃ പിതാവും അമ്മായിയുമടക്കം നാല് പേരെ പോലീസ് അറസ്റ്റ് ചെയ്തു. കൊലപാതകത്തിൽ കൂടുതൽ പേർക്ക് പങ്കുണ്ടോയെന്നും അന്വേഷണം തുടരുകയാണ്.
കുറ്റിക്കാട്ടിൽ രക്തത്തിൽ കുളിച്ച നിലയിൽ തലയില്ലാത്ത ഒരു മൃതദേഹത്തിന്റെ മൃതദേഹം കണ്ടെത്തിയതോടെയാണ് സംഭവം പുറത്തറിയുന്നത്. നാട്ടുകാർ വിവരം നൽകിയതിനെ തുടർന്ന് പോലീസ് സ്ഥലത്തെത്തി നടത്തിയ പരിശോധനയിലാണ് മൃതദേഹത്തിൽ നിന്ന് ഏകദേശം 100 മീറ്റർ അകലെ ഒരു മരത്തിന് സമീപം പ്ലാസ്റ്റിക് ചാക്കിൽ പൊതിഞ്ഞ നിലയിൽ പെൺകുട്ടിയുടെ തലയും കണ്ടെത്തിയത്.
സംഭവസ്ഥലത്ത് അഗർബത്തിയും ചില പൂജാ സാമഗ്രികളും കണ്ടെത്തിയിരുന്നു. ഇതോടെ കൊലപാതകത്തിന് പിന്നിൽ അന്ധവിശ്വാസമോ മറ്റേതെങ്കിലും ആചാരപരമായ കാരണമോ ഉണ്ടെന്ന തരത്തിലുള്ള അഭ്യൂഹങ്ങളും പ്രചരിച്ചിരുന്നു. എന്നാൽ അന്വേഷണം പൂർത്തിയാകുന്നതിന് മുമ്പ് ഇത്തരം നിഗമനങ്ങളിൽ എത്തുന്നത് ശരിയല്ലെന്നാണ് പോലീസ് വ്യക്തമാക്കിയത്.
പഠനത്തിനായി ബന്ധുക്കളുടെ വീട്ടിൽ താമസിച്ചിരുന്ന പൂനം അവിടെവച്ചാണ് കൃഷ് രാവണിയുമായി പരിചയപ്പെടുന്നത്. പിന്നീട് ഇരുവരും പ്രണയത്തിലാവുകയും കുടുംബത്തിന്റെ എതിർപ്പ് മറികടന്ന് വിവാഹം കഴിക്കുകയും ചെയ്തു. വിവാഹശേഷം ബലിയാപൂരിലെ കർമാടാഡ് പ്രദേശത്ത് വാടകവീട്ടിലായിരുന്നു ഇരുവരും താമസിച്ചിരുന്നത്. പൂനം മൂന്ന് മാസം ഗർഭിണിയായിരുന്നുവെന്നും ബന്ധുക്കൾ പറയുന്നു.
കഴിഞ്ഞ ബുധനാഴ്ച മുതലാണ് പൂനത്തെ കാണാതായത്. തുടർന്ന് പിതാവ് വ്യാഴാഴ്ച പോലീസിൽ പരാതി നൽകി. അടുത്ത ദിവസം കാട്ടിൽ തലയറുത്ത നിലയിൽ മൃതദേഹം കണ്ടെത്തിയതോടെ അന്വേഷണം ഊർജിതമാക്കി. സംഭവത്തിന്റെ ഗൗരവം കണക്കിലെടുത്ത് റാഞ്ചിയിൽ നിന്ന് ഫോറൻസിക് സംഘത്തെയും ഡോഗ് സ്ക്വാഡിനെയും സ്ഥലത്തെത്തിച്ചു. അന്വേഷണത്തിനിടെ സംഭവസ്ഥലത്ത് നിന്ന് ലഭിച്ച ഒരു ചെരിപ്പാണ് പോലീസിന് നിർണായക സൂചനയായത്. ചെരിപ്പിന്റെ ഗന്ധം പിന്തുടർന്ന ഡോഗ് സ്ക്വാഡ് ഏകദേശം നാല് കിലോമീറ്റർ അകലെയുള്ള കൃഷ് രാവണിയുടെ വീട്ടിലെത്തി. ഇതോടെയാണ് അന്വേഷണത്തിന് നിർണായക വഴിത്തിരിവുണ്ടായത്.
പൂനവും കൃഷ് രാവണിയും തമ്മിലുള്ള വിവാഹത്തിൽ കൃഷിന്റെ പിതാവിന് കടുത്ത എതിർപ്പുണ്ടായിരുന്നുവെന്നാണ് പോലീസ് പറയുന്നത്. പെൺകുട്ടിയുടെ കുടുംബം തങ്ങളുടെ സാമൂഹികവും സാമ്പത്തികവുമായ നിലയ്ക്ക് അനുയോജ്യമല്ലെന്നായിരുന്നു അദ്ദേഹത്തിന്റെ നിലപാട്. ഈ ബന്ധത്തിന്റെ പേരിൽ മകൻ നേരത്തെ ജയിലിൽ പോകേണ്ടിവന്നതായും അത് കുടുംബത്തിന് അപമാനമായെന്നുമുള്ള ആരോപണവും ഉയർന്നിരുന്നു.
ഈ വിരോധമാണ് കൊലപാതകത്തിലേക്ക് നയിച്ചതെന്നാണ് പോലീസിന്റെ പ്രാഥമിക കണ്ടെത്തൽ. മകന്റെ വിവാഹത്തിൽ അസംതൃപ്തനായ പിതാവ് ചില കൂട്ടാളികളുമായി ചേർന്ന് കൊലപാതകത്തിന് ഗൂഢാലോചന നടത്തിയെന്നാണ് പോലീസ് സംശയിക്കുന്നത്. സിറ്റി എസ്.പി. ഋത്വിക് ശ്രീവാസ്തവയുടെ നേതൃത്വത്തിൽ നടത്തിയ അന്വേഷണത്തിലാണ് നാല് പേരെ അറസ്റ്റ് ചെയ്തത്. കൃഷ് രാവണിയുടെ പിതാവ് ജയറാം രാവണി, അമ്മായി അലോമണി ദേവി എന്നിവരടക്കം നാല് പേരാണ് അറസ്റ്റിലായത്. കേസിൽ മറ്റ് ആളുകൾക്ക് പങ്കുണ്ടോയെന്നും പോലീസ് പരിശോധിച്ചുവരികയാണ്.
സംഭവസ്ഥലത്ത് നിന്ന് രക്തസാമ്പിളുകൾ, വിരലടയാളങ്ങൾ ഉൾപ്പെടെയുള്ള ശാസ്ത്രീയ തെളിവുകൾ ഫോറൻസിക് സംഘം ശേഖരിച്ചു. പൂനത്തിന്റെ മൃതദേഹം പോസ്റ്റ്മോർട്ടത്തിനായി അയച്ചിട്ടുണ്ട്. അറസ്റ്റിലായവരെ ചോദ്യം ചെയ്യുന്നത് തുടരുകയാണ്. കേസിൽ വിശദമായ അന്വേഷണം പൂർത്തിയാക്കി ഉടൻ കുറ്റപത്രം സമർപ്പിക്കാനുള്ള നടപടികളിലാണ് പോലീസ്.
