പട്‌ന: ബിഹാറിലെ ജാമുയിയിൽ പത്താം ക്ലാസ് വിദ്യാർഥിനിയെ പരസ്യമായി ഉപദ്രവിക്കുകയും ആക്രമിക്കുകയും ചെയ്ത കേസിലെ പ്രധാന പ്രതിയെ പൊലീസ് ഏറ്റുമുട്ടലിനിടെ കാലിൽ വെടിവച്ചു. ചൊവ്വാഴ്ച പുലർച്ചെയാണ് സംഭവം. കേസിലെ പ്രധാന പ്രതിയായ നന്ദൻ യാദവിനാണ് വെടിയേറ്റത്.
തിളങ്ങുന്ന ഓറഞ്ച് നിറത്തിലുള്ള തലപ്പാവ് ധരിച്ച് പെൺകുട്ടിയെ ഉപദ്രവിക്കുന്ന ദൃശ്യങ്ങളിൽ നന്ദൻ യാദവിനെ വ്യക്തമായി കാണാമായിരുന്നു. വെടിയേറ്റതിനെ തുടർന്ന് മുഖം മറച്ച നിലയിൽ സുരക്ഷാ ഉദ്യോഗസ്ഥരുടെ തോളിൽ കൈയിട്ടുകൊണ്ട് ആശുപത്രിയിലേക്ക് കൊണ്ടുപോകുന്ന യാദവിന്റെ ചിത്രങ്ങളും പുറത്തുവന്നു.
സംഭവസ്ഥലത്ത് തെളിവെടുപ്പിനായി കൊണ്ടുപോകുന്നതിനിടെ നന്ദൻ യാദവ് കസ്റ്റഡിയിൽ നിന്ന് രക്ഷപ്പെടാൻ ശ്രമിച്ചെന്നാണ് പോലീസ് പറയുന്നത്. ഇതിന് പിന്നാലെയാണ് ഏറ്റുമുട്ടലുണ്ടായതെന്നും രക്ഷപ്പെടാൻ ശ്രമിച്ച യാദവിന്റെ കാലിൽ വെടിയേറ്റതായും പോലീസ് വ്യക്തമാക്കി.
കേസുമായി ബന്ധപ്പെട്ട് ഇതുവരെ അഞ്ച് പേരെ അറസ്റ്റ് ചെയ്തിട്ടുണ്ട്. ഇവരെ കൂടാതെ രണ്ട് പ്രായപൂർത്തിയാകാത്തവരും കേസിൽ ഉൾപ്പെട്ടിട്ടുണ്ടെന്ന് പോലീസ് വ്യക്തമാക്കി. സംഭവത്തിൽ ഉൾപ്പെട്ട എല്ലാവരെയും തിരിച്ചറിഞ്ഞുവരികയാണെന്നും കുറ്റക്കാർക്കെതിരെ കർശന നടപടി സ്വീകരിക്കുമെന്നും ബിഹാർ ഉപമുഖ്യമന്ത്രി വിജയ് കുമാർ ചൗധരി പറഞ്ഞു.പോലീസ് അതിവേഗം നടപടി സ്വീകരിച്ചിട്ടുണ്ടെന്നും കേസിലെ ഒരു പ്രതിയെയും വെറുതെ വിടില്ലെന്നും ബിഹാർ മന്ത്രി ശ്രാവൺ കുമാറും വ്യക്തമാക്കി.
“ഇത് വളരെ ദുഃഖകരമായ സംഭവമാണ്. അപലപിച്ചാലും മതിയാകാത്തവിധം ലജ്ജാകരമായ സംഭവമാണിത്. സംഭവത്തിൽ ഉൾപ്പെട്ടവരെ ഇന്നലെ തന്നെ അറസ്റ്റ് ചെയ്തു. കുറ്റക്കാരെ കണ്ടെത്തി പോലീസ് കർശന നടപടി സ്വീകരിക്കുകയാണ്. ഇത്തരം പ്രവൃത്തികൾ ചെയ്യുന്ന ആരെയും വെറുതെ വിടില്ല. ഏറ്റവും ശക്തമായ നടപടി സ്വീകരിക്കും. ഇത്തരം സംഭവങ്ങൾ ആവർത്തിക്കാതിരിക്കാൻ സർക്കാർ പ്രവർത്തിച്ചുവരികയാണ്,” മന്ത്രി പറഞ്ഞു.
അതേസമയം സെപ്റ്റംബർ 19നാണ് കേസിനാസ്പദമായ സംഭവത്തിന്റെ വീഡിയോ പുറത്തുവന്നത്. ഒരു സംഘം യുവാക്കൾ ഒരു ആൺകുട്ടിയെ മർദിക്കുകയും ഒപ്പമുണ്ടായിരുന്ന പെൺകുട്ടിയെ ലൈംഗികമായി ഉപദ്രവിക്കുകയും ചെയ്യുന്ന ദൃശ്യങ്ങളാണ് വീഡിയോയിലുണ്ടായിരുന്നത്. പെൺകുട്ടിയെ ആൺകുട്ടിയിൽ നിന്ന് വേർപെടുത്താനും സംഘം ശ്രമിക്കുന്നതായി ദൃശ്യങ്ങളിൽ കാണാം.
പത്താം ക്ലാസ് വിദ്യാർഥികളായ ഇരുവരും കോച്ചിങ് ക്ലാസ് കഴിഞ്ഞ് മടങ്ങുന്നതിനിടെയാണ് സംഘം ഇവരെ സമീപിച്ചത്. ഒരാൾ ആൺകുട്ടിയെ കോളറിൽ പിടിച്ച് വലിക്കുന്നതിനിടെ പെൺകുട്ടി അവനെ രക്ഷിക്കാൻ ശ്രമിക്കുന്നതാണ് വീഡിയോയുടെ തുടക്കത്തിൽ കാണുന്നത്. ഇതിനിടെയാണ് പ്രധാന പ്രതിയായ നന്ദൻ യാദവ് ദൃശ്യത്തിലേക്ക് എത്തുന്നത്. ഇയാൾ പെൺകുട്ടിയുടെ കഴുത്തിൽ പിടിച്ച് തിരിക്കുകയും തുടർന്ന് കൈകളിൽ എടുത്തുകൊണ്ട് കുറച്ചുദൂരം ഓടുകയും ചെയ്യുന്നു. യാദവ് പെൺകുട്ടിയെയും കൊണ്ട് ഓടുന്നതിനിടെ അവളുടെ കാലുകൾ വായുവിൽ പിടയുന്നതും ദൃശ്യങ്ങളിൽ വ്യക്തമാണ്.
ആൺകുട്ടി ഓടിയെത്തി പെൺകുട്ടിയെ യാദവിൽ നിന്ന് മോചിപ്പിക്കാൻ ശ്രമിച്ചു. ഇതോടെ യാദവ് പെൺകുട്ടിയെ താഴെയിറക്കി. തുടർന്ന് കൈയുടെ പിൻഭാഗം ഉപയോഗിച്ച് പെൺകുട്ടിയെ തള്ളുകയും അവളുടെ നെഞ്ചിൽ സ്പർശിക്കുകയും ചെയ്യുന്നതായി വീഡിയോയിൽ കാണാം. തുടർന്നും യാദവ് പെൺകുട്ടിയെ തള്ളുന്നതിനിടെ ആൺകുട്ടി അവൾക്ക് മുന്നിൽ നിന്ന് സംരക്ഷിക്കാൻ ശ്രമിക്കുന്നതും ദൃശ്യങ്ങളിലുണ്ട്. അതേസമയം, പ്രായപൂർത്തിയാകാത്ത പെൺകുട്ടിയുടെ വ്യക്തിത്വം വെളിപ്പെടുത്തുന്ന തരത്തിൽ വീഡിയോ പങ്കുവയ്ക്കുകയോ വിവരങ്ങൾ പ്രചരിപ്പിക്കുകയോ ചെയ്യുന്നവർക്കെതിരെ ജാമുയി പോലീസ് നടപടികൾ ശക്തമാക്കി. പ്രായപൂർത്തിയാകാത്ത ഇരയുടെ വ്യക്തിത്വം വെളിപ്പെടുത്തുന്നത് ഗുരുതരമായ കുറ്റമാണെന്ന് ജാമുയി പോലീസ് സൂപ്രണ്ട് വിശ്വജീത് ദയാൽ മുന്നറിയിപ്പ് നൽകി.
