ഉത്തരാഖണ്ഡ്: പിത്തോറഗഢ് ജില്ലയിൽ കുടുംബത്തെയും ഒരു ഗ്രാമത്തെയും കണ്ണീരിലാഴ്ത്തി അമ്മയുടെയും മകന്റെയും ദാരുണാന്ത്യം. 14കാരനായ മകൻ ഹൃദയാഘാതത്തെ തുടർന്ന് അപ്രതീക്ഷിതമായി മരിച്ച് മണിക്കൂറുകൾക്കുള്ളിൽ അമ്മ സരയൂ നദിയിൽ ചാടി സ്വയം ജീവനൊടുക്കുകയായിരുന്നു. പിത്തോറഗഢ് ജില്ലാ ആസ്ഥാനത്തിന് സമീപമുള്ള മഡെ ഗ്രാമത്തിലാണ് സംഭവം.
മഡെ സ്വദേശിയായ 14കാരൻ ജതിൻ ജോഷി ശനിയാഴ്ച രാവിലെ ആറുമണിയോടെ പതിവ് പ്രഭാത ഓട്ടത്തിനായി ഝൗൽഖേത് സ്പോർട്സ് ഗ്രൗണ്ടിലെത്തിയിരുന്നു. ഓട്ടം പൂർത്തിയാക്കിയതിന് പിന്നാലെ ജതിൻ ഗ്രൗണ്ടിൽ കുഴഞ്ഞുവീഴുകയായിരുന്നു. ഉടൻ തന്നെ അമ്മ പൂനം ജോഷി മകനെ പിത്തോറഗഢ് ജില്ലാ ആശുപത്രിയിലെത്തിച്ചെങ്കിലും ആശുപത്രിയിലെത്തുമ്പോഴേക്കും മരണം സംഭവിച്ചിരുന്നു. പ്രാഥമിക വിവരങ്ങൾ പ്രകാരം ഹൃദയാഘാതമാണ് മരണകാരണമെന്നാണ് സംശയിക്കുന്നത്.
ഏകമകനായ ജതിന്റെ അപ്രതീക്ഷിത മരണം പൂനത്തെ കടുത്ത ആഘാതത്തിലാക്കിയെന്ന് ബന്ധുക്കൾ പറയുന്നു. ആശുപത്രിയിൽ നിന്ന് വീട്ടിലേക്ക് മടങ്ങുന്നതിന് പകരം അവർ ഗംഗോലിഹട്ടിലേക്ക് പോകുന്ന ടാക്സിയിൽ കയറി. പിത്തോറഗഢിൽ നിന്ന് ഏകദേശം 30 കിലോമീറ്റർ അകലെ ഘാട്ടിന് സമീപമെത്തിയപ്പോൾ ടാക്സി നിർത്താൻ ആവശ്യപ്പെട്ടു. തുടർന്ന് പെട്ടെന്ന് സരയൂ നദിയിലേക്ക് ചാടുകയായിരുന്നു.
സംഭവം കണ്ട ടാക്സി ഡ്രൈവറും പ്രദേശവാസികളും ഉടൻ രക്ഷാപ്രവർത്തനത്തിന് ശ്രമിക്കുകയും പോലീസിനെ വിവരമറിയിക്കുകയും ചെയ്തു. പോലീസ്, സ്റ്റേറ്റ് ഡിസാസ്റ്റർ റെസ്പോൺസ് ഫോഴ്സ് (SDRF) സംഘങ്ങൾ സ്ഥലത്തെത്തി നദിയിൽ തിരച്ചിൽ നടത്തി. പിന്നീട് പൂനത്തിന്റെ മൃതദേഹം നദിയിൽ നിന്ന് കണ്ടെത്തി.
പൂനത്തിന് നേരത്തെ തന്നെ മറ്റൊരു വലിയ ദുരന്തം നേരിടേണ്ടിവന്നിരുന്നുവെന്നും ബന്ധുക്കൾ പറഞ്ഞു. രണ്ട് വർഷം മുമ്പ് അവരുടെ മകളും മരിച്ചിരുന്നു. മകളുടെ മരണത്തിന് പിന്നാലെ ഏകമകനെയും നഷ്ടപ്പെട്ടതിന്റെ ആഘാതത്തിലാണ് മണിക്കൂറുകൾക്കുള്ളിൽ പൂനവും മരിച്ചത്.
ഒരേ ദിവസം അമ്മയെയും മകനെയും നഷ്ടപ്പെട്ടതോടെ കുടുംബം തകർന്നിരിക്കുകയാണ്. മഡെ ഗ്രാമത്തിലും സമീപ പ്രദേശങ്ങളിലും സംഭവം വലിയ ഞെട്ടലാണ് സൃഷ്ടിച്ചിരിക്കുന്നത്. ഇരുവരുടെയും മൃതദേഹങ്ങൾ പോസ്റ്റ്മോർട്ടത്തിനായി അയച്ചതായി പോലീസ് അറിയിച്ചു. സംഭവത്തിൽ തുടർ നിയമനടപടികളും ആരംഭിച്ചു.
