പട്ന: ജാമുയിയിലെ സംഭവത്തിന്റെ ഞെട്ടൽ മാറും മുൻപേ ബിഹാറിൽ വീണ്ടും പെൺകുട്ടിക്കുനേരെ അതിക്രമം. സമസ്തിപുരിലെ ജഗത്സിംഗ്പുർ ഗ്രാമത്തിലെ ബൈപ്പാസ് റോഡിലാണ് പെൺകുട്ടിയെ ഒരു സംഘം ആളുകൾ വളഞ്ഞ് ഉപദ്രവിച്ചെന്ന പരാതി. സംഭവവുമായി ബന്ധപ്പെട്ട് നാലുപേരെ പൊലീസ് അറസ്റ്റ് ചെയ്തു.
പെൺകുട്ടിയെ സംഘം വളയുന്നതും മോശം വാക്കുകൾ ഉപയോഗിച്ച് അധിക്ഷേപിക്കുന്നതും ശാരീരികമായി ഉപദ്രവിക്കുന്നതുമുൾപ്പെടെയുള്ള ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെയാണ് സംഭവം പുറത്തറിഞ്ഞത്. വീഡിയോ ശ്രദ്ധയിൽപ്പെട്ടതിനെ തുടർന്ന് പൊലീസ് കേസെടുത്ത് അന്വേഷണം ആരംഭിക്കുകയായിരുന്നു.
ഫോട്ടോയെടുക്കുന്നതിനായി പെൺകുട്ടിയും സുഹൃത്തും ബൈപ്പാസ് റോഡിൽ വാഹനം നിർത്തിയപ്പോഴാണ് പ്രദേശവാസികളായ യുവാക്കൾ ഇവരെ സമീപിച്ചതെന്നാണ് റിപ്പോർട്ട്. തുടർന്ന് പെൺകുട്ടിയെ സംഘം വളഞ്ഞ് അധിക്ഷേപിക്കുകയും ഉപദ്രവിക്കുകയും ചെയ്തെന്നാണ് പൊലീസ് പറയുന്നത്. സംഭവത്തിന്റെ ദൃശ്യങ്ങൾ ആരോ പകർത്തി സമൂഹമാധ്യമങ്ങളിൽ പ്രചരിപ്പിക്കുകയായിരുന്നു.
Related Post
ജാമുയിയിൽ പ്രായപൂർത്തിയാകാത്ത ആൺകുട്ടിയെയും പെൺകുട്ടിയെയും ഒരു സംഘം യുവാക്കൾ തടഞ്ഞുനിർത്തി ഉപദ്രവിച്ച സംഭവത്തിന് പിന്നാലെയാണ് സമസ്തിപുരിലെ സംഭവവും പുറത്തുവരുന്നത്. സെപ്റ്റംബർ 19ന് നടന്ന ജാമുയി സംഭവത്തിൽ മൂന്ന് പേരെ അറസ്റ്റ് ചെയ്തതായും കൂടുതൽ പ്രതികൾക്കായി അന്വേഷണം തുടരുന്നതിനിടെയാണ് അടുത്ത സംഭവം.