റോം: ഇറ്റാലിയൻ പ്രധാനമന്ത്രി ജോർജിയ മെലോനിയുടെ ഇന്ത്യാ സന്ദർശനവുമായി ബന്ധപ്പെട്ട രസകരമായ അനുഭവം പുതിയ പുസ്തകത്തിൽ. ന്യൂഡൽഹിയിൽ തിരഞ്ഞെടുപ്പിൽ മത്സരിച്ചാൽ മെലോനിക്ക് 10 ലക്ഷം വോട്ട് ഉറപ്പായും ലഭിക്കുമെന്ന തമാശ പറഞ്ഞതായി ഇറ്റലിയുടെ ഉപപ്രധാനമന്ത്രി അന്റോണിയോ ടാജനിയെ ഉദ്ധരിച്ചാണ് മെലോനി വെളിപ്പെടുത്തുന്നത്.
‘ജോർജാസ് വിഷൻ’ എന്ന പേരിൽ പുറത്തിറങ്ങുന്ന പുസ്തകത്തിലാണ് 2023-ലെ ഇന്ത്യാ സന്ദർശനത്തിലെ ഓർമകൾ മെലോനി പങ്കുവച്ചിരിക്കുന്നത്.
ഇന്ത്യയിൽ വിമാനമിറങ്ങിയതു മുതൽ തന്നെ തന്റെ ചിത്രം പതിപ്പിച്ച ‘വെൽകം’ പോസ്റ്ററുകൾ നൂറുകണക്കിന് സ്ഥലങ്ങളിൽ കണ്ടുവെന്നാണ് മെലോനി പറയുന്നത്. സന്ദർശനം അവസാനിപ്പിച്ച് മടങ്ങുമ്പോൾ അതേ പോസ്റ്ററുകൾ ‘താങ്ക് യു വിസിറ്റിങ്’ എന്ന സന്ദേശവുമായി മാറിയതും തന്റെ ശ്രദ്ധയിൽപ്പെട്ടതായി അവർ കുറിക്കുന്നു.
Related Post
ഈ കാഴ്ചകൾ കണ്ട ശേഷമാണ് “മെലോനി ന്യൂഡൽഹിയിൽ തിരഞ്ഞെടുപ്പിൽ മത്സരിച്ചാൽ 10 ലക്ഷം വോട്ട് ഉറപ്പാണ്” എന്ന് അന്റോണിയോ ടാജനി തമാശയായി പറഞ്ഞതെന്നും മെലോനി പുസ്തകത്തിൽ രേഖപ്പെടുത്തുന്നു.
2023-ൽ രണ്ട് തവണയാണ് മെലോനി ഇന്ത്യ സന്ദർശിച്ചത്. ഇന്ത്യ ഉൾപ്പെടെ വിവിധ രാജ്യങ്ങളിലെ നേതാക്കളുമായുള്ള കൂടിക്കാഴ്ചകളും വ്യക്തിപരമായ അനുഭവങ്ങളും പുസ്തകത്തിൽ ഉൾപ്പെടുത്തിയിട്ടുണ്ട്. പുസ്തകത്തിന്റെ അവതാരിക എഴുതിയിരിക്കുന്നത് ജെ.ഡി വാൻസ് ആണ്.
