മലപ്പുറം: മുണ്ടുപറമ്പ് ബൈപാസ് ജങ്ഷന് സമീപം വീടിനുള്ളിൽ കുടുങ്ങിയ അമ്മയെയും രണ്ട് കുഞ്ഞുങ്ങളെയും സാഹസികമായി രക്ഷപ്പെടുത്തി മലപ്പുറം അഗ്‌നിരക്ഷാസേന. ശനിയാഴ്ച ഉച്ചയോടെയാണ് സംഭവം. കുട്ടികൾക്കൊപ്പം വീട്ടിനുള്ളിലായിരുന്ന അമ്മയ്ക്ക് പുറത്തേക്ക് കടക്കാൻ കഴിയാതെ വന്നതോടെയാണ് വീട്ടുകാരും നാട്ടുകാരും അഗ്‌നിരക്ഷാസേനയുടെ സഹായം തേടിയത്.
അമ്മയും നാല് വയസ്സുള്ള കുഞ്ഞും മുറിക്കുള്ളിൽ നിൽക്കുന്നതിനിടെ രണ്ട് വയസ്സുള്ള ഇളയ കുട്ടി അബദ്ധത്തിൽ മുറിയുടെ വാതിൽ അടയ്ക്കുകയായിരുന്നു. വാതിൽ അടഞ്ഞതോടെ അമ്മയ്ക്കും കുട്ടികൾക്കും പുറത്തേക്ക് വരാൻ കഴിയാതെവന്നു. വീടിന്റെ മുൻവശത്തെ വാതിൽ ലോക്ക് ചെയ്ത നിലയിലായിരുന്നതിനാൽ അയൽവാസികൾക്കും അകത്തേക്ക് പ്രവേശിക്കാനായില്ല.
സംഭവം ശ്രദ്ധയിൽപ്പെട്ടതോടെ ഉടൻ അഗ്‌നിരക്ഷാസേനയെ വിവരമറിയിച്ചു. വിവരമറിഞ്ഞ് മലപ്പുറം അഗ്‌നിരക്ഷാസേനാ സംഘം സ്ഥലത്തെത്തി. ഉടൻ രക്ഷാപ്രവർത്തനം ആരംഭിച്ചു.
Related Post
വാതിൽ വഴി അകത്തേക്ക് പ്രവേശിക്കാൻ കഴിയാത്തതിനാൽ ജനൽ വഴി വീടിനുള്ളിൽ കടക്കാനായിരുന്നു സേനയുടെ തീരുമാനം. തുടർന്ന് ഹൈഡ്രോളിക് കട്ടർ ഉപയോഗിച്ച് ജനലിന്റെ കമ്പികൾ മുറിച്ചുമാറ്റി അകത്തുകയറി. അമ്മയെയും രണ്ട് കുട്ടികളെയും സുരക്ഷിതമായി പുറത്തേക്ക് എത്തിച്ചതോടെയാണ് കുടുംബാംഗങ്ങൾക്കും നാട്ടുകാർക്കും ആശ്വാസമായത്.
അസി. സ്റ്റേഷൻ ഓഫീസർ കെ. പ്രതീഷിന്റെ നേതൃത്വത്തിലായിരുന്നു രക്ഷാപ്രവർത്തനം. കെ. സന്ദീപ്, കെ. അഭിലാഷ്, കെ. അബ്ദുൽ ജബ്ബാർ, ടി. ഹരീഷ്, രാഗേഷ്, വി. ബൈജു എന്നിവരും രക്ഷാപ്രവർത്തനത്തിൽ പങ്കെടുത്തു.
