ഗുവാഹത്തി: അസമിലെ ഗുവാഹത്തിയുടെ പ്രാന്തപ്രദേശത്തുള്ള ഹോംസ്റ്റേയിൽ 22കാരിയായ വിദ്യാർഥിനിയെ ഗുരുതരാവസ്ഥയിൽ കണ്ടെത്തിയതിന് പിന്നാലെ മരിച്ച സംഭവത്തിൽ ദുരൂഹത തുടരുന്നു. പെൺകുട്ടിയെ കൂട്ടബലാത്സംഗത്തിനിരയാക്കിയ ശേഷം കൊലപ്പെടുത്തിയതാണെന്ന് പെൺകുട്ടിയുടെ കുടുംബം ആരോപിക്കുന്നു. സംഭവവുമായി ബന്ധപ്പെട്ട് പെൺകുട്ടിയുടെ 26കാരനായ സുഹൃത്ത് അസിഫ് അലിയെ പോലീസ് നേരത്തെ അറസ്റ്റ് ചെയ്തിരുന്നു.
ഗുവാഹത്തിയുടെ പ്രാന്തപ്രദേശമായ ഗരാലിലെ ഹോംസ്റ്റേയിലാണ് ശനിയാഴ്ച പെൺകുട്ടിയെ ഗുരുതരാവസ്ഥയിൽ കണ്ടെത്തിയത്. അബോധാവസ്ഥയിലായിരുന്ന പെൺകുട്ടിയെ ആദ്യം സമീപത്തെ ആരോഗ്യകേന്ദ്രത്തിൽ എത്തിച്ചു. തുടർന്ന് ഗുവാഹത്തി മെഡിക്കൽ കോളജ് ആൻഡ് ഹോസ്പിറ്റലിലേക്ക് (ജിഎംസിഎച്ച്) മാറ്റിയെങ്കിലും ഡോക്ടർമാർ മരണം സ്ഥിരീകരിക്കുകയായിരുന്നു.
പെൺകുട്ടിയുടെ ശരീരത്തിൽ നിരവധി മർദനത്തിന്റെയും പരുക്കുകളുടെയും അടയാളങ്ങളുണ്ടെന്ന് പിതാവ് ആരോപിച്ചു. “ശരീരത്തിലെ അടയാളങ്ങൾ നോക്കുമ്പോൾ മകളെ കൊലപ്പെടുത്തുന്നതിന് മുമ്പ് ക്രൂരമായി പീഡിപ്പിച്ചതായി വ്യക്തമാകുന്നു. ഇത് കൂട്ടബലാത്സംഗത്തിന് ശേഷമുള്ള കൊലപാതകമാണ്,” പിതാവ് മാധ്യമങ്ങളോടു പറഞ്ഞു.
അതേസമയം വെള്ളിയാഴ്ച വൈകിട്ട് അഞ്ചുമണിയോടെയാണ് പെൺകുട്ടി വീട്ടിൽനിന്ന് പുറപ്പെട്ടത്. സുഹൃത്തുക്കൾക്കൊപ്പം ഭക്ഷണം കഴിക്കാൻ പോകുകയാണെന്നാണ് വീട്ടുകാരോട് പറഞ്ഞിരുന്നത്. രാത്രി പത്തുമണിയോടെ പെൺകുട്ടി അമ്മയെ ഫോണിൽ വിളിച്ചു. വൈകിയതിനാൽ ഒരു സുഹൃത്തിനൊപ്പം സർവകലാശാല ഹോസ്റ്റലിൽ താമസിക്കുമെന്ന് അമ്മയോട് പറഞ്ഞതായി പിതാവ് പറയുന്നു
എന്നാൽ പുലർച്ചെ രണ്ടുമണിയോടെ പെൺകുട്ടി വീണ്ടും അമ്മയെ ഫോണിൽ വിളിച്ചു. തനിക്ക് ക്രൂരമായി മർദനമേറ്റുവെന്നാണ് പറഞ്ഞത്. പിന്നാലെ ഫോൺ കോൾ വിച്ഛേദിക്കപ്പെട്ടു. പെൺകുട്ടിയെ കയറുപയോഗിച്ച് കെട്ടിയിട്ടിരുന്നതായും പിതാവ് ആരോപിച്ചു. ശരീരത്തിലെ മുറിവുകളും മറ്റ് അടയാളങ്ങളും പരിശോധിച്ചാൽ കൊലപ്പെടുത്തുന്നതിന് മുമ്പ് മകൾ പീഡിപ്പിക്കപ്പെട്ടതായി മനസ്സിലാകുമെന്ന് അദ്ദേഹം പറഞ്ഞു.
സംഭവദിവസം പുലർച്ചെ മകൾ അമ്മയെ വീണ്ടും വിളിച്ച് “അവർ എന്നെ കൊല്ലും” എന്ന് പറഞ്ഞിരുന്നതായും കുടുംബം പറയുന്നു. അതിന് പിന്നാലെ പെൺകുട്ടിയുടെ ഫോൺ ആരോ പിടിച്ചെടുത്തിരിക്കാമെന്നാണ് കുടുംബത്തിന്റെ സംശയം. അതേസമയം, അറസ്റ്റിലായ അസിഫ് അലി പെൺകുട്ടി ആത്മഹത്യ ചെയ്തതാണെന്നാണ് കുടുംബത്തെ അറിയിച്ചതെന്നാണ് പോലീസ് പറയുന്നത്. എന്നാൽ അസിഫ് അലിയുടെ ഈ വാദം കുടുംബം അംഗീകരിച്ചിട്ടില്ല.
സംഭവത്തിൽ ആത്മഹത്യയാണെന്ന വാദത്തിൽ പോലീസ് ഉറച്ചുനിൽക്കുന്നില്ലെന്ന് ഗുവാഹത്തി വെസ്റ്റ് ഡെപ്യൂട്ടി കമ്മീഷണർ ഓഫ് പോലീസ് (ഡിസിപി) ബോളിൻ ദിയോറിയും നേരത്തെ വ്യക്തമാക്കി. അന്വേഷണം ഇപ്പോഴും പ്രാഥമിക ഘട്ടത്തിലാണെന്നും സംഭവത്തെ കൊലപാതകമായാണ് പോലീസ് സംശയിക്കുന്നതെന്നും അദ്ദേഹം പറഞ്ഞു.
പെൺകുട്ടിയുടെ ശരീരത്തിലോ ഹോംസ്റ്റേയിലെ തറയിലോ രക്തത്തിന്റെ പാടുകൾ കണ്ടെത്തിയിട്ടില്ലെന്നും ഡിസിപി അറിയിച്ചു. എന്നാൽ ഇതിന്റെ അടിസ്ഥാനത്തിൽ സംഭവത്തിന്റെ സ്വഭാവത്തെക്കുറിച്ച് അന്തിമ നിഗമനത്തിലെത്തിയിട്ടില്ലെന്നും അന്വേഷണം തുടരുകയാണെന്നും പോലീസ് വ്യക്തമാക്കി.
പെൺകുട്ടിയെ ഹോംസ്റ്റേയിൽ എത്തിച്ചതുമായി ബന്ധപ്പെട്ട സാഹചര്യങ്ങളും അവിടെ ഉണ്ടായിരുന്നവരുടെ പങ്കും പോലീസ് പരിശോധിച്ചുവരികയാണ്. ഹോംസ്റ്റേ ഉടമ, കെയർടേക്കർമാർ, മറ്റ് ജീവനക്കാർ എന്നിവരെയും പോലീസ് ചോദ്യം ചെയ്യുന്നുണ്ട്. പെൺകുട്ടിയുടെ മരണത്തിലേക്ക് നയിച്ച സംഭവങ്ങൾ കൃത്യമായി കണ്ടെത്തുന്നതിനൊപ്പം കുടുംബം ഉന്നയിച്ച കൂട്ടബലാത്സംഗ ആരോപണവും പോലീസ് അന്വേഷണത്തിന്റെ ഭാഗമാക്കിയിട്ടുണ്ട്. പോസ്റ്റ്മോർട്ടം റിപ്പോർട്ട് ഉൾപ്പെടെയുള്ള ശാസ്ത്രീയ പരിശോധനകളുടെയും മറ്റ് തെളിവുകളുടെയും അടിസ്ഥാനത്തിലായിരിക്കും മരണകാരണം സംബന്ധിച്ച അന്തിമ നിഗമനത്തിലെത്തുകയെന്ന് പോലീസ് വ്യക്തമാക്കി.
