ജയ്പൂർ: രാജസ്ഥാനിലെ ഭരത്പൂർ ജില്ലയിൽ സ്റ്റോൺ ക്രഷർ യൂണിറ്റ് വീണ്ടും തുറക്കുന്നതിനെച്ചൊല്ലിയുണ്ടായ തർക്കത്തിനിടെ മുൻ ബിജെപി എംഎൽഎ അതർ സിങ് ഭദാന ജനക്കൂട്ടത്തിന്റെ ആക്രമണത്തിൽ കൊല്ലപ്പെട്ടു. ഞായറാഴ്ച വൈകുന്നേരം ഭോണ്ട ഗ്രാമത്തിലെ ക്രഷർ യൂണിറ്റ് പരിസരത്താണ് സംഭവം.
ക്രഷർ യൂണിറ്റിനെതിരെ പ്രതിഷേധിച്ചിരുന്ന ഒരു സംഘം ഗ്രാമീണർ വടികളും കല്ലുകളും ഉപയോഗിച്ച് ഭദാനയെയും കൂടെയുണ്ടായിരുന്നയാളെയും ആക്രമിക്കുകയായിരുന്നു. ഗുരുതരമായി പരിക്കേറ്റ ഭദാനയെ ജയ്പൂരിലെ സവായ് മാൻ സിങ് (എസ്എംഎസ്) ആശുപത്രിയിൽ പ്രവേശിപ്പിച്ചെങ്കിലും ചികിത്സയ്ക്കിടെ മരിച്ചു.
മേഖലയിലെ മേച്ചിൽപ്പുറങ്ങൾ കൈയേറി നിയമവിരുദ്ധമായി ഖനനം നടത്താൻ ശ്രമിച്ചെന്നാരോപിച്ചാണ് ഗ്രാമീണർ ക്രഷർ യൂണിറ്റിനെതിരെ പ്രതിഷേധിച്ചിരുന്നത്. ഭദാനയുടെ ഉടമസ്ഥതയിലുള്ള ക്രഷർ യൂണിറ്റിൽ ഭാര്യയുടെ പേരിലായിരുന്നു ബിസിനസ് നടത്തിയിരുന്നതെന്നാണ് റിപ്പോർട്ട്.
ഭോണ്ട, റായ്പുർ ഗ്രാമങ്ങളിലെ ജനങ്ങൾ കഴിഞ്ഞ രണ്ടുവർഷമായി ക്രഷർ യൂണിറ്റിനെതിരെ സമരത്തിലായിരുന്നു. ഖനന മേഖലയിലേക്ക് വാഹനങ്ങൾ കടന്നുപോകുന്നതിനായി കന്നുകാലികളുടെ മേച്ചിൽപ്പുറങ്ങൾ ഉപയോഗിക്കുന്നതിനെതിരെയും നാട്ടുകാർ പ്രതിഷേധിച്ചിരുന്നു. ഇതിന്റെ ഭാഗമായി ധർണകളും റോഡ് ഉപരോധങ്ങളും നടത്തിയിരുന്നു.
സംഭവത്തിൽ ഇരുവിഭാഗങ്ങൾക്കെതിരെയും പൊലീസ് കേസെടുത്തിട്ടുണ്ട്. ആക്രമണത്തെത്തുടർന്ന് പ്രദേശത്ത് കൂടുതൽ പൊലീസിനെ വിന്യസിച്ചു.
ഹരിയാന സ്വദേശിയായ അതർ സിങ് ഭദാന 2003-ൽ രാജസ്ഥാനിലെ ബയാന നിയമസഭാ മണ്ഡലത്തിൽനിന്ന് ബിജെപി സ്ഥാനാർഥിയായി വിജയിച്ചിരുന്നു. 2008 വരെ അദ്ദേഹം നിയമസഭാംഗമായി തുടർന്നു.
