കണ്ണൂർ: സിപിഎമ്മിൽ സംഘടനാ ദൗർബല്യം വലുതാണെന്ന് കേന്ദ്ര കമ്മിറ്റി അംഗം ഇ.പി. ജയരാജൻ. ശത്രുക്കളുടെ കടന്നാക്രമണങ്ങളെ ഫലപ്രദമായി പ്രതിരോധിക്കാൻ പാർട്ടിക്ക് കഴിഞ്ഞില്ലെന്നും ഇടതുപക്ഷ പാർട്ടി എന്ന നിലയിൽ സിപിഎമ്മിന്റെ പ്രസക്തിക്ക് കോട്ടം തട്ടിയെന്നും അദ്ദേഹം പറഞ്ഞു. സ്ഥാനാർഥി നിർണയത്തിലും പാളിച്ചകളുണ്ടായതായി ഇ.പി. ജയരാജൻ ചൂണ്ടിക്കാട്ടി.
ബ്രാഞ്ചുകളിൽ വലിയൊരു ശതമാനവും ഫലപ്രദമായി പ്രവർത്തിക്കുന്നില്ലെന്നാണ് ഇ.പി. ജയരാജന്റെ വിമർശനം. ബ്രാഞ്ച് യോഗങ്ങൾ ചേരുന്നതും പരിമിതമായി. പാർട്ടി അംഗങ്ങൾ തങ്ങളുടെ ഉത്തരവാദിത്തങ്ങൾ കൃത്യമായി നിർവഹിച്ചില്ലെന്നും ബ്രാഞ്ച് സെക്രട്ടറിമാർക്ക് ഫലപ്രദമായി നേതൃത്വം നൽകാൻ കഴിഞ്ഞില്ലെന്നും അദ്ദേഹം പറഞ്ഞു. ലോക്കൽ, ഏരിയാ കമ്മിറ്റികൾക്കും പാളിച്ചകൾ സമയബന്ധിതമായി തിരുത്താൻ കഴിഞ്ഞില്ലെന്നും അദ്ദേഹം വ്യക്തമാക്കി.
ബിജെപിയുമായി ബന്ധമുണ്ടെന്ന പ്രചാരണത്തെ ഫലപ്രദമായി പ്രതിരോധിക്കാൻ സിപിഎമ്മിന് കഴിഞ്ഞില്ലെന്നും ചില വ്യക്തികളുടെ തെറ്റായ പ്രവണതകൾ പാർട്ടിയെ ബാധിച്ചെന്നും ഇ.പി. ജയരാജൻ പറഞ്ഞു. സിപിഎം ജനങ്ങളിൽനിന്ന് അകന്നുപോയെന്ന വിമർശനവും അദ്ദേഹം ഉന്നയിച്ചു. പാർട്ടി പണപ്പിരിവുമായി മാത്രം മുന്നോട്ടുപോകുന്നുവെന്ന ആക്ഷേപം ഉയർന്നതായും അദ്ദേഹം ചൂണ്ടിക്കാട്ടി.
Related Post
പലസ്തീൻ വിഷയത്തിലെ സിപിഎമ്മിന്റെ നിലപാട് മുസ്ലിം പ്രീണനമായി പ്രചരിപ്പിക്കപ്പെട്ടെന്നും ശബരിമല പോലുള്ള വിഷയങ്ങളിൽ എതിരാളികൾ ധ്രുവീകരണം നടത്തിയെന്നും ഇ.പി. ജയരാജൻ പറഞ്ഞു. ന്യൂനപക്ഷങ്ങളുടെ സംരക്ഷകരെന്ന സിപിഎമ്മിന്റെ പ്രതിച്ഛായ ഇല്ലാതാക്കാൻ പ്രചാരണം നടന്നതായും അദ്ദേഹം ആരോപിച്ചു.
യുഡിഎഫിന്റെയും ബിജെപിയുടെയും പ്രചാരണങ്ങളെ ഫലപ്രദമായി പ്രതിരോധിക്കാൻ പാർട്ടിക്ക് സാധിച്ചില്ലെന്നും അദ്ദേഹം പറഞ്ഞു. ഭരണം നഷ്ടപ്പെട്ടതല്ല, പാർട്ടിയുടെ വോട്ട് കുറഞ്ഞതാണ് പ്രധാന പ്രശ്നമെന്നും ഇ.പി. ജയരാജൻ വ്യക്തമാക്കി. സ്വന്തം വോട്ടർമാർ തന്നെ എതിരായി വോട്ട് ചെയ്യുന്ന സാഹചര്യമുണ്ടായെന്നും നേതൃതലത്തിൽ പ്രവർത്തിച്ച ചിലർ മറുകണ്ടം ചാടിയെന്നും അദ്ദേഹം പറഞ്ഞു.
‘നമ്മളാണ് പാർട്ടിയുടെ മുഖം. ആ മുഖം വ്യക്തതയുള്ളതും വികൃതമല്ലാത്തതുമായിരിക്കണം’ എന്നും ഇ.പി. ജയരാജൻ പറഞ്ഞു. കണ്ണൂരിൽ നടന്ന വിശാല ജില്ലാ കമ്മിറ്റി സ്വാഗതസംഘ രൂപീകരണ യോഗത്തിലാണ് അദ്ദേഹം പാർട്ടിക്കുള്ളിലെ സംഘടനാ ദൗർബല്യങ്ങൾ തുറന്നുപറഞ്ഞത്.
