ന്യൂഡൽഹി: ഡൽഹി മെട്രോയിൽ യാത്രക്കാരിയായ യുവതിയുടെ ചിത്രം സിഐഎസ്എഫ് ജവാൻ ഫോണിൽ രഹസ്യമായി പകർത്തിയെന്ന് ആരോപണം. എയിംസ് മെട്രോ സ്റ്റേഷന് സമീപമാണ് സംഭവം.
മെട്രോയിൽ ഒപ്പമുണ്ടായിരുന്ന സിഐഎസ്എഫ് ജവാൻ തന്റെ ചിത്രം ഫോണിൽ പകർത്തിയെന്നായിരുന്നു യുവതിയുടെ ആരോപണം. തുടർന്ന് യുവതിക്കൊപ്പം ഉണ്ടായിരുന്ന യാത്രക്കാർ ജവാന്റെ ഫോൺ പരിശോധിച്ചു. ഫോണിൽ യുവതിയുടെ ചിത്രങ്ങൾ കണ്ടെത്തിയതോടെ യാത്രക്കാർ ജവാനെ ചോദ്യം ചെയ്യുകയും സംഭവം വാക്കുതർക്കത്തിലും സംഘർഷത്തിലും കലാശിക്കുകയുമായിരുന്നു.
സംഭവം ശ്രദ്ധയിൽപ്പെട്ടതോടെ സിഐഎസ്എഫ് ഉന്നത ഉദ്യോഗസ്ഥർ ഇടപെട്ടു. ആരോപണവിധേയനായ ജവാനെ ഉടൻ സസ്പെൻഡ് ചെയ്തു. സംഭവത്തിൽ വകുപ്പുതല അന്വേഷണം പുരോഗമിക്കുകയാണ്.
യുവതിയുടെ ചിത്രം എങ്ങനെ പകർത്തിയെന്നതും ഫോണിൽ കണ്ടെത്തിയ ചിത്രങ്ങളുടെ പശ്ചാത്തലവും ഉൾപ്പെടെയുള്ള കാര്യങ്ങൾ അന്വേഷണ സംഘം പരിശോധിച്ചുവരികയാണ്.
