ഇരിങ്ങാലക്കുട: സൈബർ സെല്ലിലെ ഉദ്യോഗസ്ഥനാണെന്ന് പരിചയപ്പെടുത്തി വാട്‌സ്ആപ്പ് കോളിലൂടെ യുവതിയെ ഭീഷണിപ്പെടുത്തി നഗ്‌നവീഡിയോകൾ അയപ്പിച്ചെന്ന കേസിൽ പ്രതി അറസ്റ്റിൽ. കൊല്ലം തെക്കുംഭാഗം സ്വദേശി ചവറ സൗത്ത് മടച്ചാമ്പള്ളിൽ വീട്ടിൽ ലിജോ ഫെലിക്സ് (38) ആണ് തിരുവനന്തപുരം വിമാനത്താവളത്തിൽനിന്ന് പിടിയിലായത്. തൃശ്ശൂർ റൂറൽ ജില്ലാ പോലീസ് മേധാവി മുഹമ്മദ് നദീമിന്റെ നിർദേശപ്രകാരം റൂറൽ സൈബർ ക്രൈം പോലീസ് സംഘമാണ് ഇയാളെ അറസ്റ്റ് ചെയ്തത്.
വാട്‌സ്ആപ്പ് കോളിലൂടെ പരാതിക്കാരിയെ ബന്ധപ്പെട്ട പ്രതി, അവർ ലൈംഗിക വീഡിയോകൾ കാണുന്നയാളാണെന്നും സൈബർ സെല്ലിന്റെ നിരീക്ഷണത്തിലാണെന്നും പറഞ്ഞ് തെറ്റിദ്ധരിപ്പിക്കുകയായിരുന്നു. അറസ്റ്റ് ചെയ്യുമെന്ന് ഭീഷണിപ്പെടുത്തിയ ഇയാൾ, തുടർന്നുള്ള നടപടികൾ കൗൺസിലിങ്ങിന്റെ ഭാഗമാണെന്ന് വിശ്വസിപ്പിച്ചാണ് യുവതിയെക്കൊണ്ട് നഗ്‌നവീഡിയോകൾ നിർബന്ധിച്ച് അയപ്പിച്ചതെന്നാണ് പരാതി. 2026 ഫെബ്രുവരിയിലായിരുന്നു സംഭവമെന്ന് പോലീസ് അറിയിച്ചു.
പ്രതി ജർമനിയിൽനിന്ന് തിരുവനന്തപുരം വിമാനത്താവളത്തിൽ എത്തിയെന്ന വിവരം ലഭിച്ചതിനെത്തുടർന്നാണ് പോലീസ് നടപടി സ്വീകരിച്ചത്. വിമാനത്താവളത്തിൽവെച്ച് ഇയാളെ അറസ്റ്റ് ചെയ്യുകയായിരുന്നു.
റൂറൽ സൈബർ പോലീസ് സ്റ്റേഷൻ ഇൻസ്‌പെക്ടർ കെ.സി. ബൈജു, സബ് ഇൻസ്‌പെക്ടർ ആൽബി തോമസ് വർഗീസ്, സിവിൽ പോലീസ് ഓഫീസർമാരായ ഷിബു വാസു, മനുദേവ്, ഡ്രൈവർ സിവിൽ പോലീസ് ഓഫീസർ അനന്ദുമോൻ എന്നിവരടങ്ങിയ സംഘമാണ് അന്വേഷണവും അറസ്റ്റും നടത്തിയത്.
