ന്യൂഡൽഹി: പൗരത്വം ലഭിക്കുന്നതിന് മുമ്പ് വോട്ടർപട്ടികയിൽ പേര് ചേർത്തുവെന്ന ആരോപണവുമായി ബന്ധപ്പെട്ട കേസിൽ കോൺഗ്രസ് നേതാവ് സോണിയ ഗാന്ധിക്കെതിരായ ഹർജിയിൽ വീണ്ടും പരിശോധനയ്ക്ക് ഉത്തരവ്. സോണിയ ഗാന്ധിക്കെതിരെ ക്രിമിനൽ നടപടി ആവശ്യപ്പെട്ടുള്ള ഹർജി തള്ളിയ മജിസ്‌ട്രേറ്റ് കോടതി ഉത്തരവ് ഡൽഹി ദ്വാരക കോടതി റദ്ദാക്കി.
വിഷയത്തിൽ മജിസ്‌ട്രേറ്റ് കോടതി പുറപ്പെടുവിച്ച ഉത്തരവ് നിയമപരമായ പിഴവുകളുള്ളതാണെന്ന് പ്രത്യേക ജഡ്ജി വിശാൽ ഗോഗ്നെ നിരീക്ഷിച്ചു. പരാതി തള്ളിയതിന്റെ കാരണങ്ങൾ വിശദമായി വ്യക്തമാക്കിയിട്ടില്ലെന്നും ബന്ധപ്പെട്ട പൊലീസ് ഉദ്യോഗസ്ഥന്റെ വാദം കേൾക്കുകയോ പൊലീസ് സ്റ്റേഷനിൽനിന്ന് സ്ഥിതിവിവര റിപ്പോർട്ട് തേടുകയോ ചെയ്തിട്ടില്ലെന്നും കോടതി ചൂണ്ടിക്കാട്ടി.
സോണിയ ഗാന്ധിയുടെ പേര് 1980ലെ ന്യൂഡൽഹി മണ്ഡലത്തിലെ വോട്ടർപട്ടികയിൽ ഉണ്ടായിരുന്നുവെന്നും അവർ 1983ലാണ് ഇന്ത്യൻ പൗരത്വം നേടിയതെന്നുമാണ് ഹർജിക്കാരന്റെ ആരോപണം. ഈ ആരോപണത്തിൽ അന്വേഷണം ആവശ്യപ്പെട്ടാണ് ഹർജി നൽകിയത്. ആരോപണങ്ങൾ ശരിയാണെന്ന് കോടതി കണ്ടെത്തിയെന്നല്ല, മറിച്ച് ഹർജി തള്ളിയ മജിസ്‌ട്രേറ്റ് കോടതി ഉത്തരവ് വീണ്ടും പരിശോധിക്കണമെന്നാണ് പുതിയ ഉത്തരവ്.
വിഷയം വീണ്ടും മജിസ്‌ട്രേറ്റ് കോടതിയിലേക്ക് അയച്ച കോടതി, പരാതിയിൽ പുതിയതായി വാദം കേട്ട് കാരണസഹിതമായ ഉത്തരവ് പുറപ്പെടുവിക്കാനും നിർദേശിച്ചു. കേസ് സെപ്റ്റംബർ 29ന് വീണ്ടും പരിഗണിക്കും.
