കൊച്ചി: ചേരാനല്ലൂർ വാഹനാപകടക്കേസിൽ പ്രതിയായ അഡീ. ജഡ്ജിക്കെതിരെ ഉടൻ നടപടിയെടുക്കേണ്ടെന്ന് ഹൈക്കോടതി അഡ്മിനിസ്ട്രേറ്റീവ് കമ്മിറ്റി‌യുടെ തീരുമാനം. പോലീസ് റിപ്പോർട്ടിന്റെ അടിസ്ഥാനത്തിൽ നടപടി മതിയെന്നാണ് തീരുമാനം. അതേസമയം സസ്പെൻഡ് ചെയ്യണമെന്നായിരുന്നു ഹൈക്കോടതി ജഡ്ജിയുടെ റിപ്പോർട്ട്. ഇതിനിടെ അപകടത്തിൽ മരിച്ച ജയബാലകൃഷ്ണന്റെ കുടുംബം ഇന്ന് റജിസ്ട്രാറെ കണ്ടിരുന്നു.
അതേസമയം പോലീസ് ക്ലബിൽ ജഡ്ജിയെ ക്രൈംബ്രാഞ്ച് രണ്ടുമണിക്കൂർ ചോദ്യം ചെയ്തു. നാളേയും തുടരും. ഇതിനിചെ പ്രതിയായ പതിനേഴുകാരന്റെ ജാമ്യം റദ്ദാക്കണമെന്നും കസ്റ്റഡിയിൽ വേണമെന്നും പോലീസ് ആവശ്യപ്പെട്ടു. ഡ്രൈവിങ് എങ്ങനെ പഠിച്ചെന്നത് ഉൾപ്പെടെ അറിയണമെന്ന് പോലീസ് കോടതിയിൽ അറിയിച്ചു. ജാമ്യം റദ്ദാക്കണമെന്ന അപേക്ഷ പരിഗണിച്ച അഡീഷണൽ സെഷൻസ് കോടതിയിലാണ് ആവശ്യമുന്നയിച്ചത്. ജയബാലകൃഷ്ണന്റെ കുടുംബത്തെ ഹർജിയിൽ കക്ഷി ചേർത്തു. പ്രതി സ്ഥിരമായി അമിതവേഗത്തിൽ ഡ്രൈവ് ചെയ്യുന്നയാളാണെന്ന് കുടുംബം ആരോപിച്ചു. ഹർജി വെള്ളിയാഴ്ചത്തേക്ക് മാറ്റിയ കോടതി പ്രതിയുടെ കുടുംബത്തിന് നോട്ടിസ് അയച്ചു.
അതേപോലെ കേസിൻറെ അന്വേഷണ വീഴ്ചയിൽ കൊച്ചി കമ്മീഷണറുടെ കസേര തെറിച്ചു. കാളിരാജ് മഹേഷ് കുമാറിനെ പകരം പദവി നൽകാതെയാണ് സ്ഥലം മാറ്റിയത്. പ്രതിക്ക് സ്റ്റേഷൻ ജാമ്യം നൽകിയതും ജഡ്ജിക്കെതിരെ കേസെടുക്കാൻ വൈകിയതിലും കമ്മീഷണറുടെ മേൽനോട്ടക്കുറവുണ്ടായെന്നാണ് ആഭ്യന്തരവകുപ്പിൻറെ കണ്ടെത്തൽ. ഇന്നലെ സിഐ ഉൾപ്പടെ നാല് പേരെ സസ്പെൻഡ് ചെയ്തിരുന്നു.
