തിരുവനന്തപുരം: ഏറെ വിവാദമായ കോവളം സ്പാ പീഡന കേസിൽ വനിതാ ഹെൽത്ത് ഇൻസ്പെക്ടർ അറസ്റ്റിൽ. നഗരൂർ ഹെൽത്ത് ഇൻസ്പെക്ടറും വെങ്ങാനൂർ സ്വദേശിയുമായ മായയാണ് അറസ്റ്റിലായത്. സ്പാ നടത്തിപ്പിൽ മായ്ക്കും പങ്കുണ്ടെന്ന കണ്ടെത്തലിനെ തുടർന്നാണ് അറസ്റ്റ് രേഖപ്പെടുത്തിയത്.
മാത്രമല്ല സ്പായിലെ പണമിടപാടുകളിലും മായ പങ്കാളിയായിട്ടുണ്ട്. 16 കാരിയെ കൊണ്ടുവരുന്നതിൽ ഉൾപ്പെടെ പ്രതിക്ക് അറിവുണ്ടായിരുന്നു എന്നാണ് പോലീസിന്റെ കണ്ടെത്തൽ. ഈ കേസിൽ കോർപ്പറേഷൻ ഹെൽത്ത് ഇൻസ്പെക്ടർ അനുരൂപിനെയും പോലീസ് അറസ്റ്റ് ചെയ്തിരുന്നു. ഇയാൾ ഉള്ളൂർ സോണൽ ഓഫിസിലെ ഹെൽത്ത് ഇൻസ്‌പെക്ടറായിരുന്നു . ഡ്രീം എന്ന പേരിലുള്ള സ്പാ അനുരൂപിൻറെ ബിനാമി സ്ഥാപനമാണെന്ന് നേരത്തെ അന്വേഷണ ഉദ്യോഗസ്ഥർ കണ്ടെത്തിയിരുന്നു.
അതേസമയം കഴിഞ്ഞ ജൂലൈ മാസത്തിലാണ് പെൺകുട്ടിയുടെ സംരക്ഷണ ചുമതലയുണ്ടായിരുന്ന മാതൃസഹോദരിയും ഭർത്താവും ചേർന്ന് കുട്ടിയെ കോവളത്ത് എത്തിച്ചത്. തുടർന്ന് വിവിധ സ്പാകളിലായി കുട്ടിയെ ജോലിക്ക് നിർത്തുകയും അവിടെവച്ച് നിരന്തരമായ ലൈംഗിക ചൂഷണത്തിന് ഇരയാക്കുകയുമായിരുന്നു.
ഒരു ദിവസം സ്പായിൽ വച്ച് പതിനഞ്ചോളം പേർ പീഡിപ്പിച്ചെന്ന് കുട്ടി അന്വേഷണ സംഘത്തിനു മൊഴി നൽകിയിരുന്നു. ക്രൂരമായ ചൂഷണങ്ങൾക്കൊടുവിൽ സ്പായിൽ വച്ച് പരിചയപ്പെട്ട ഒരു യുവാവുമായി പെൺകുട്ടി പ്രണയത്തിലാകുകയും തുടർന്ന് ഇയാളോടൊപ്പം ഒളിച്ചോടാൻ ശ്രമിക്കുകയും ചെയ്തതോടെയാണ് ക്രൂരമായ പീഡനകഥ പുറത്തറിയുന്നത്.
