ഷൊര്‍ണൂര്‍: വേനല്‍ തുടങ്ങും മുമ്പ് തന്നെ ഭാരതപ്പുഴയില്‍ നീരൊഴുക്ക് താഴ്ന്നു. തടയണകളിലെല്ലാം ചേറും ചെളിയും, മണലും നിറഞ്ഞ് കിടക്കുന്നതിന്നാല്‍ വരും ദിവസങ്ങളില്‍ കുടിവെള്ളത്തിനും ക്ഷാമം അനുഭവപ്പെട്ടെക്കാം. കഴിഞ്ഞ പ്രളയകാലത്ത് തടയണകളില്‍ വലിയ രീതിയില്‍ മണല്‍ വന്ന് അടിഞ്ഞ് കൂടിയതാണ് വെള്ളം സംഭരിക്കാന്‍ കഴിയാത്ത സാഹചര്യത്തിനിടയായത്. ഒട്ടേറെ പദ്ധതികള്‍ ഭാരതപ്പുഴയ്ക്കു വേണ്ടി ആസൂത്രണം ചെയ്തിട്ടുണ്ടെങ്കിലും മണല്‍ നീക്കാന്‍ ഇതുവരെയും നടപടി എടുത്തിട്ടില്ല.
വെള്ളം സംഭരിക്കാന്‍ കഴിയാതായാല്‍ ഏക്കറുകണക്കിന് കൃഷിയും പ്രതിസന്ധിയിലാവും. മുന്‍ മാസങ്ങളില്‍ ഷട്ടറുകള്‍ തുറന്നിട്ട് തടയണയിലെ വെള്ളം ഒഴുകിപ്പോയതും പ്രതിസന്ധിക്ക് കാരണമായി എന്നാണ് കര്‍ഷകര്‍ പറയുന്നത്.അതെ സമയം ഷൊര്‍ണൂരില്‍ കാരക്കാട് പോലുള്ള പ്രദേശങ്ങളില്‍ കൃഷിയിറക്കാന്‍ വെള്ളമില്ലാതെ നെല്‍പാടങ്ങള്‍ വിണ്ടുകീറിയ അവസ്ഥയിലാണ്.
തടയണയില്‍ മതിയായ ജലം സംഭരിക്കാന്‍ കഴിയാത്തതിനാല്‍ വേനലില്‍ കുടിവെള്ള പ്രശ്‌നം രൂക്ഷമാകുമോ എന്ന ആശങ്കയിലാണ് പ്രദേശവാസികള്‍. ആകെ 360 മീറ്റര്‍ നീളത്തിലും രണ്ടര മീറ്റര്‍ ഉയരത്തിലുമാണ് തടയണ നിര്‍മിച്ചിട്ടുള്ളത്.പ്രതിദിനം 20 ദശലക്ഷം ലീറ്റര്‍ ശേഷിയുള്ള ജലശുദ്ധീകരണ ടാങ്ക്, മോട്ടര്‍ പമ്പുകള്‍, ട്രാന്‍സ്‌ഫോമര്‍ എന്നിവ ഉള്‍പ്പെടുന്ന കുടിവെള്ള പദ്ധതിയാണ് ഭാരതപ്പുഴയില്‍ നിലവിലുള്ളത്. ഷൊര്‍ണൂര്‍ നഗരസഭാ പ്രദേശത്തിനും വാണിയംകുളം പഞ്ചായത്തിനും ആണ് തടയണ പദ്ധതി കൂടുതല്‍ ഗുണം ചെയ്തത്. തൃശൂര്‍ ജില്ല മൈനര്‍ ഇറിഗേഷന്‍ വിഭാഗമാണ് കിഫ്ബി ഫണ്ടില്‍ നിന്ന് ഷൊര്‍ണൂര്‍- ചെറുതുരുത്തി തീരങ്ങളെ ബന്ധിപ്പിച്ചുള്ള തടയണ നിര്‍മിച്ചത്.
Leave a Comment