തിരുവനന്തപുരം: കള്ളിക്കാട് ചെക്ക് പോസ്റ്റിൽ ഡ്യൂട്ടിയിലിരിക്കെ എക്സൈസ് ഉദ്യോഗസ്ഥൻ യൂണിഫോമിൽ മദ്യലഹരിയിൽ ബോധമില്ലാതെ കിടന്നതായി പരാതി. ഇതോടെ കഴിഞ്ഞ ദിവസം ചെക്ക് പോസ്റ്റിൽ പരിശോധനകൾ നടന്നില്ല. എക്സൈസ് പ്രിവന്റീവ് ഓഫീസർ ഷീൻരാജിനെയാണ് യൂണിഫോമിൽ ബോധമില്ലാത്ത നിലയിൽ കണ്ടെത്തിയത്.
ഉദ്യോഗസ്ഥൻ മദ്യലഹരിയിൽ ബോധമില്ലാതെ കിടക്കുന്നത് കണ്ട നാട്ടുകാരാണ് വിവരം ഉന്നത ഉദ്യോഗസ്ഥരെ അറിയിച്ചത്. തുടർന്ന് എക്സൈസ് അഡീഷണൽ കമ്മിഷണറുടെ നിർദേശപ്രകാരം നെയ്യാറ്റിൻകര സിഐയുടെ നേതൃത്വത്തിലുള്ള പൊലീസ് സംഘം ചെക്ക് പോസ്റ്റിലെത്തി.
സ്ഥലത്തെത്തിയ പൊലീസ് ഉദ്യോഗസ്ഥനെ യൂണിഫോമിൽ തറയിൽ ബോധമില്ലാത്ത നിലയിൽ കണ്ടെത്തുകയായിരുന്നു. തുടർന്ന് ഉന്നത ഉദ്യോഗസ്ഥരുടെ നിർദേശപ്രകാരം ഷീൻരാജിനെ വൈദ്യപരിശോധനയ്ക്ക് വിധേയനാക്കി.
അന്ന് ചെക്ക് പോസ്റ്റിൽ ഡ്യൂട്ടിയിലുണ്ടായിരുന്നത് ഷീൻരാജ് മാത്രമായിരുന്നുവെന്നാണ് വിവരം. ഉദ്യോഗസ്ഥൻ പരിശോധന നടത്താതിരുന്നതോടെ ചെക്ക് പോസ്റ്റ് പ്രവർത്തിച്ചത് പരിശോധനകളില്ലാതെയാണെന്നാണ് റിപ്പോർട്ട്.
സംഭവത്തിൽ കൂടുതൽ പരിശോധന നടത്താനാണ് അധികൃതരുടെ തീരുമാനം. ചെക്ക് പോസ്റ്റിലെ സിസിടിവി ദൃശ്യങ്ങൾ ഉൾപ്പെടെ പരിശോധിക്കുമെന്ന് ഉദ്യോഗസ്ഥർ അറിയിച്ചു.
