തിരുവനന്തപുരം: മാസങ്ങളായി ഒപ്പം താമസിച്ചിരുന്ന പെൺസുഹൃത്തിനെ ക്രൂരമായി മർദിച്ച് ഗുരുതരമായി പരിക്കേൽപ്പിച്ച കേസിൽ ക്രിമിനൽ കേസ് പ്രതി അറസ്റ്റിൽ. കാപ്പ നിയമപ്രകാരം ഉൾപ്പെടെ നിരവധി കേസുകളിൽ പ്രതിയായ ‘തോക്ക് ഷാജി’ എന്നറിയപ്പെടുന്ന മൈലക്കര സ്വർണക്കോട് ഷാജിഭവനിൽ ഷാജി (41) ആണ് അറസ്റ്റിലായത്. രണ്ട് മാസമായി കാട്ടാക്കടയ്ക്ക് സമീപം ഒന്നിച്ച് താമസിച്ചിരുന്ന കള്ളിക്കാട് മൈലക്കര സ്വദേശിനി നിഷയെയാണ് (42) ഷാജി മദ്യലഹരിയിൽ ക്രൂരമായി മർദിച്ചത്. ഇടവച്ചാലിലെ ഒരു വീട്ടിൽ ഇരുവരും ഭാര്യാഭർത്താക്കന്മാരെപ്പോലെ കഴിയുകയായിരുന്നു.
തിങ്കളാഴ്ച പുലർച്ചെയായിരുന്നു ആക്രമണം. വീട്ടിലെ സിറ്റൗട്ടിൽ ഇരിക്കുകയായിരുന്ന നിഷയെ ഷാജി ചുവരിനോട് ചേർത്തുനിർത്തി മർദിക്കുകയും തല സിറ്റൗട്ടിൽ ഇടിപ്പിക്കുകയുമായിരുന്നു. ആക്രമണത്തിൽ നിഷയുടെ തലയുടെ പിൻഭാഗത്ത് പൊട്ടലും ആഴത്തിലുള്ള മുറിവുമുണ്ടായി. ഗുരുതരമായി പരിക്കേറ്റ യുവതിയെ ആദ്യം കാട്ടാക്കടയിലെ സ്വകാര്യ ആശുപത്രിയിലും പിന്നീട് തിരുവനന്തപുരം മെഡിക്കൽ കോളജ് ആശുപത്രിയിലും പ്രവേശിപ്പിച്ചു. നിഷ ഇപ്പോഴും ചികിത്സയിൽ തുടരുകയാണ്.
ഷാജിയുടെ മദ്യപാനത്തെ നിഷ എതിർത്തതിലുള്ള വിരോധമാണ് ആക്രമണത്തിന് കാരണമായതെന്നാണ് പൊലീസിന്റെ പ്രാഥമിക നിഗമനം.
കാട്ടാക്കട ഡിവൈ.എസ്.പി ബിനുവിന്റെയും ആര്യനാട് സി.ഐ സജിൻ ലൂയിസിന്റെയും നേതൃത്വത്തിലുള്ള സംഘമാണ് പ്രതിയെ പിടികൂടിയത്. നെയ്യാർഡാം എസ്.ഐ ഷിജു എസ്.എസ്, സി.പി.ഒമാരായ രാജേഷ്, അരുൺ, ഷംനാദ്, ബിനു, ദീപു എന്നിവരും അന്വേഷണസംഘത്തിലുണ്ടായിരുന്നു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
കാട്ടാക്കട, കള്ളിക്കാട്, നെയ്യാർഡാം തുടങ്ങിയ പൊലീസ് സ്റ്റേഷനുകളിലും ഫോറസ്റ്റ്, എക്സൈസ് വകുപ്പുകളിലുമായി നാൽപതിലധികം കേസുകളിൽ ഷാജി പ്രതിയാണെന്ന് പൊലീസ് അറിയിച്ചു.
