തൃശൂർ: നടൻ മമ്മൂട്ടിക്കെതിരായ സൈബർ ആക്രമണത്തിന് പിന്നിൽ യഥാർഥ സിപിഎം പ്രവർത്തകരല്ലെന്നും പാർട്ടിയുടെ പേര് പറഞ്ഞുനടക്കുന്ന ചിലരാണെന്നും ബിജെപി നേതാവ് ബി. ഗോപാലകൃഷ്ണൻ. മകളുടെ വിവാഹത്തിൽ മുഖ്യമന്ത്രി വി.ഡി. സതീശനും സിപിഎം നേതാവ് പിണറായി വിജയനും പങ്കെടുത്തിരുന്നു. എന്നാൽ മമ്മൂട്ടിക്കെതിരെ മാത്രമാണ് സൈബർ ആക്രമണം നടക്കുന്നതെന്നും അദ്ദേഹം മാധ്യമങ്ങളോട് പറഞ്ഞു.
”എന്റെ മകളുടെ വിവാഹത്തിൽ പങ്കെടുത്തതുകൊണ്ട് പിണറായി വിജയൻ മാർക്സിസ്റ്റ് പാർട്ടി വിടാൻ പോകുകയാണോ? മമ്മൂട്ടിക്കെതിരെ സൈബർ ആക്രമണം നടത്തുമ്പോൾ ചെറുതാകുന്നത് സിപിഎമ്മാണ്. ഞാൻ അടിമുടി ബിജെപിക്കാരനാണ്. എന്നാൽ വ്യക്തിപരമായി എല്ലാവരുമായും സൗഹൃദം പുലർത്തണമെന്ന് ആഗ്രഹിക്കുന്നയാളാണ്. കേരളവർമ കോളേജിൽ ഞാൻ ജയിച്ചത് എസ്എഫ്ഐക്കാരുടെ വോട്ട് കൊണ്ടാണ്” – ഗോപാലകൃഷ്ണൻ പറഞ്ഞു.
സിപിഎം നേതാക്കൾ ഒരിക്കലും മമ്മൂട്ടിക്കെതിരെ സൈബർ ആക്രമണം നടത്തില്ലെന്നാണ് തന്റെ വിശ്വാസമെന്നും അദ്ദേഹം കൂട്ടിച്ചേർത്തു. സിപിഎമ്മിന്റെ പേര് പറഞ്ഞുനടക്കുന്ന, പ്രത്യേക താൽപര്യങ്ങൾ മനസിൽ സൂക്ഷിക്കുന്ന ചിലരായിരിക്കാം ആക്രമണത്തിന് പിന്നിലെന്നും അദ്ദേഹം ആരോപിച്ചു.
മമ്മൂട്ടിയുമായും മോഹൻലാലുമായും തനിക്ക് സൗഹൃദമുണ്ടെന്ന് വ്യക്തമാക്കിയ ഗോപാലകൃഷ്ണൻ, മോഹൻലാൽ സ്ഥലത്തില്ലാത്തതിനാലാണ് വിവാഹത്തിൽ പങ്കെടുക്കാതിരുന്നതെന്നും പറഞ്ഞു. ജാതി, മതം, രാഷ്ട്രീയം, ഭാഷ, വേഷം എന്നിവയ്ക്കെല്ലാം അതീതമാണ് സൗഹൃദമെന്നും അദ്ദേഹം കൂട്ടിച്ചേർത്തു.
മമ്മൂട്ടി, പിണറായി വിജയൻ, വി.ഡി. സതീശൻ തുടങ്ങിയവരുടെ സൗഹൃദത്തെ പ്രോത്സാഹിപ്പിക്കുകയാണ് വേണ്ടത്. നല്ല സൗഹൃദത്തിന്റെ രാഷ്ട്രീയമാണ് ഇന്നത്തെ മതേതര കേരളത്തിന് ആവശ്യമെന്നും ബി. ഗോപാലകൃഷ്ണൻ പറഞ്ഞു.
