ബെംഗളൂരു: ദീർഘകാലമായി നിലനിന്ന കുടുംബവഴക്കുകളും ഭാര്യവീട്ടുകാരോടുള്ള പകയും ഒടുവിൽ കൂട്ടക്കൊലയിൽ കലാശിച്ചു. ബെംഗളൂരുവിലെ ശ്രീരാംപുരയിൽ ഭാര്യയടക്കം ഒരു കുടുംബത്തിലെ ഏഴുപേരെ കൊലപ്പെടുത്തിയ കേസിൽ പ്രതി ഇന്ദുശേഖറിനെക്കുറിച്ച് ഞെട്ടിക്കുന്ന വിവരങ്ങളാണ് പുറത്തുവരുന്നത്. ഭാര്യ, ഭാര്യയുടെ മാതാവ്, രണ്ട് സഹോദരങ്ങൾ, അവരുടെ ഭാര്യമാർ, സഹോദരങ്ങളിലൊരാളുടെ ഏഴുവയസ്സുള്ള മകൻ എന്നിവരെയാണ് ഇയാൾ കൊലപ്പെടുത്തിയത്.
ഇന്ദുശേഖറും ഭാര്യ സുനിതയും വിവാഹിതരായിട്ട് 20 വർഷത്തോളമായി. സുനിത സ്വന്തം വീട്ടിലേക്ക് പോകുന്നതിനെച്ചൊല്ലി ഇരുവരും പതിവായി വഴക്കിട്ടിരുന്നതായാണ് പ്രാഥമിക അന്വേഷണത്തിൽ പൊലീസിന് വ്യക്തമായത്. ബന്ധുക്കൾ ഇടപെട്ട് പ്രശ്നങ്ങൾ പരിഹരിക്കാൻ ശ്രമിച്ചെങ്കിലും അഭിപ്രായവ്യത്യാസങ്ങൾ അവസാനിച്ചില്ല. ഭാര്യയുടെ എല്ലാ കാര്യങ്ങൾക്കും മാതാവും സഹോദരങ്ങളും പിന്തുണ നൽകുന്നതിൽ ഇന്ദുശേഖറിന് അമർഷമുണ്ടായിരുന്നുവെന്നും പൊലീസ് സംശയിക്കുന്നു. ദീർഘകാലമായി നിലനിന്ന കുടുംബപ്രശ്നങ്ങളാണ് കൂട്ടക്കൊലയിലേക്ക് നയിച്ചതെന്നാണ് അന്വേഷണസംഘത്തിന്റെ പ്രാഥമിക നിഗമനം.
ഇന്ദുശേഖറിന്റെ ഭാര്യ സുനിത, സുനിതയുടെ മാതാവ് രൂപവതി, മൂത്ത സഹോദരൻ ശിവകുമാർ, ഇയാളുടെ ഭാര്യ ദിവ്യ, ഇളയ സഹോദരൻ ശങ്കർ, ഇയാളുടെ ഭാര്യ ദിവ്യ, ശങ്കറിന്റെ ഏഴുവയസ്സുകാരൻ മകൻ പുനീത് എന്നിവരാണ് കൊല്ലപ്പെട്ടത്. ഏഴുപേരിൽ പുനീതിന്റെ മൃതദേഹം മാത്രമാണ് ഇതുവരെ പൊലീസിന് കണ്ടെത്താനായത്. മറ്റ് ആറുപേരുടെ മൃതദേഹങ്ങൾ ബെംഗളൂരുവിന്റെയും സമീപജില്ലയായ ചിക്കബെല്ലാപുരിന്റെയും വിവിധ ഭാഗങ്ങളിൽ ഉപേക്ഷിച്ചെന്നാണ് സംശയം.
ഭാര്യവീട്ടുകാരിൽനിന്ന് കടുത്ത അപമാനം നേരിടേണ്ടിവന്നെന്നാണ് പ്രതി അവകാശപ്പെട്ടതെന്ന് കർണാടക മന്ത്രി പ്രിയങ്ക് ഖാർഗെ വെള്ളിയാഴ്ച പറഞ്ഞു. കൊലപാതകങ്ങൾ മുൻകൂട്ടി ആസൂത്രണം ചെയ്തതാണെന്നും അദ്ദേഹം സൂചിപ്പിച്ചു. കുടുംബത്തിനുള്ളിൽ ആസൂത്രണം ചെയ്ത കൊലപാതകമാണിതെന്നാണ് പ്രാഥമിക നിഗമനമെന്നും ഖാർഗെ വ്യക്തമാക്കി.
രാജാജിനഗർ പൊലീസ് സ്റ്റേഷൻ പരിധിയിലെ ശ്രീരാംപുര ബാഷ്യം സർക്കിളിന് സമീപമുള്ള 59-ാം ക്രോസിലെ ഇന്ദുശേഖറിന്റെ വീട്ടിലാണ് കൊലപാതകങ്ങൾ നടന്നതെന്നാണ് പൊലീസിന്റെ പ്രാഥമിക നിഗമനം. ആദ്യം ഭാര്യ സുനിതയെയാണ് ഇയാൾ കൊലപ്പെടുത്തിയത്. ആട്ടുകല്ലുകൊണ്ട് തലയ്ക്കടിച്ചായിരുന്നു കൊലപാതകം. മൃതദേഹം തുണിയിൽ പൊതിഞ്ഞ് ചിക്കബെല്ലാപുര ജില്ലയിലെ നന്ദി ഹിൽസിന് സമീപം ഉപേക്ഷിച്ചു.
സംശയം ഒഴിവാക്കാൻ സുനിതയുടെ മൊബൈൽ ഫോൺ സ്വിച്ച് ഓഫ് ചെയ്ത പ്രതി, അവർ യാത്ര പോയിരിക്കുകയാണെന്ന് അയൽക്കാരോട് പറഞ്ഞു. തൊട്ടടുത്ത ദിവസം അളിയന്മാരായ ശിവകുമാറിനെയും ശങ്കറിനെയും പാർട്ടിക്കെന്ന വ്യാജേന വീട്ടിലേക്ക് ക്ഷണിച്ചു. തുടർന്ന് ഇതേ ആട്ടുകല്ല് ഉപയോഗിച്ച് ഇരുവരെയും കൊലപ്പെടുത്തി. പിന്നീട് ഇവരുടെ ഭാര്യമാരെയും അമ്മായിയമ്മ രൂപവതിയെയും ശങ്കറിന്റെ മകൻ പുനീതിനെയും വീട്ടിലേക്ക് വിളിച്ചുവരുത്തി കൊലപ്പെടുത്തുകയായിരുന്നു.
കുടുംബാംഗങ്ങളെ കാണാനില്ലെന്ന് ബന്ധു നൽകിയ പരാതിയെത്തുടർന്ന് പൊലീസ് നടത്തിയ അന്വേഷണത്തിലാണ് കൂട്ടക്കൊലയുടെ വിവരം പുറത്തുവന്നത്. കൊലപാതകങ്ങൾക്കുശേഷം വീട്ടിലെ രക്തക്കറകൾ നീക്കം ചെയ്യാനും വീട് വൃത്തിയാക്കാനും ഇന്ദുശേഖർ രാസവസ്തുക്കൾ ഉപയോഗിച്ചതായും അന്വേഷണത്തിൽ കണ്ടെത്തിയിട്ടുണ്ട്.
കൊലപാതകത്തിന് ഉപയോഗിച്ചതെന്ന് സംശയിക്കുന്ന ആട്ടുകല്ലും മൃതദേഹങ്ങൾ കടത്താൻ ഉപയോഗിച്ച കാറും പൊലീസ് കസ്റ്റഡിയിലെടുത്തു. ചിക്കബെല്ലാപുരയിലെ നന്ദി ഹിൽസ്, തീരദേശ കർണാടകയിലെ ചാർമാഡി ഘാട്ട് എന്നിവിടങ്ങളിലടക്കം മൃതദേഹങ്ങൾ ഉപേക്ഷിച്ചിട്ടുണ്ടാകാമെന്നാണ് അന്വേഷണസംഘത്തിന്റെ സംശയം. ശേഷിക്കുന്ന ആറുപേരുടെ മൃതദേഹങ്ങൾ കണ്ടെത്താനുള്ള തിരച്ചിൽ തുടരുകയാണ്.
കൊലപാതകങ്ങൾ നടത്താനും മൃതദേഹങ്ങൾ ഉപേക്ഷിക്കാനും ഇന്ദുശേഖറിന് മറ്റാരുടെയെങ്കിലും സഹായം ലഭിച്ചിട്ടുണ്ടോയെന്നും പൊലീസ് അന്വേഷിക്കുന്നുണ്ട്. കേസിൽ പങ്കുണ്ടോയെന്ന സംശയത്തിൽ ഇയാളുടെ പ്രായപൂർത്തിയാകാത്ത മകളെയും ചോദ്യം ചെയ്തുവരികയാണ്. പ്രതി ഒറ്റയ്ക്കാണോ കൃത്യം നടത്തിയതെന്ന് അന്വേഷണസംഘം ഇതുവരെ സ്ഥിരീകരിച്ചിട്ടില്ല.
ജനവാസമേഖലയിലെ വീട്ടിനുള്ളിൽ ഇത്രയും കൊലപാതകങ്ങൾ നടന്നിട്ടും സംഭവം പുറംലോകമറിയാതെ പോയതെങ്ങനെയെന്നും പൊലീസ് പരിശോധിക്കുന്നുണ്ട്. സംഭവത്തിന്റെ മുഴുവൻ വിശദാംശങ്ങളും കണ്ടെത്താനും പ്രതിയുടെ മൊഴി സ്ഥിരീകരിക്കാനുമായി കൂടുതൽ ചോദ്യംചെയ്യൽ ആവശ്യമാണെന്നാണ് അന്വേഷണസംഘത്തിന്റെ വിലയിരുത്തൽ.
