തിരുവനന്തപുരം: ഉമർ ഒരുക്കിയ രക്ഷപ്പെടൽ തന്ത്രം അതിവിദഗ്ധമായിരുന്നു. എന്നാൽ അതെല്ലാം പൊളിഞ്ഞത് കാമുകി പോലീസിനോട് കാര്യങ്ങൾ തുറന്നുപറഞ്ഞതോടെ. പാങ്ങപ്പാറ അഭിറാം കൊലക്കേസിൽ അന്വേഷണത്തിന്റെ തുടക്കത്തിൽത്തന്നെ ഉമർ ഒരുക്കിയ രക്ഷാപഴുത് കണ്ടെത്താൻ പോലീസിന് കഴിഞ്ഞു. കൊലപാതകം നടന്ന സമയത്ത് താൻ വീട്ടിലായിരുന്നുവെന്ന് വരുത്തിത്തീർക്കാനായിരുന്നു ഉമറിന്റെ നീക്കം. ഇതിനായി കാമുകിയെക്കൊണ്ട് സ്വന്തം ഫോണിലേക്ക് വിളിപ്പിച്ച് കോൾ കണക്ട് ചെയ്ത നിലയിൽ ഫോൺ വീട്ടിൽ വെച്ചിട്ടാണ് ഇയാൾ കൊലപാതകം നടന്ന സ്ഥലത്തേക്ക് പോയത്. എന്നാൽ കാമുകിയുടെ മൊഴിയോടെ ഈ തന്ത്രം പൊളിയുകയായിരുന്നു.
ചോദ്യം ചെയ്യലിനിടെ തന്റെ ഫോൺ പരിശോധിച്ചാൽ തന്നെ രക്ഷിക്കാനുള്ള തെളിവുകൾ അഭിഭാഷകന് ലഭിക്കുമെന്നായിരുന്നു ഉമറിന്റെ വീമ്പുപറച്ചിൽ. എന്നാൽ ഫോൺ പരിശോധനയിലും കാമുകിയുടെ മൊഴിയിലും നിർണായക വിവരങ്ങൾ ലഭിച്ചതോടെ ഉമറിന്റെ നീക്കം അന്വേഷണസംഘത്തിന് മുന്നിൽ വ്യക്തമായി. കൊലപാതകത്തിൽ പങ്കുണ്ടെന്ന് വ്യക്തമായതോടെ കാമുകിയെയും പോലീസ് പ്രതിചേർത്ത് അറസ്റ്റ് ചെയ്തു.
അതേസമയം, അഭിറാമിന്റെ കൊലപാതകത്തിന് പിന്നിലെ കൃത്യമായ കാരണം കണ്ടെത്താനുള്ള ശ്രമത്തിലാണ് അന്വേഷണസംഘം. പ്രതികൾ നൽകിയ മൊഴികളിൽ അഭിറാമിനോടും സുഹൃത്തിനോടും പക തോന്നാൻ പല കാരണങ്ങളും പറയുന്നുണ്ട്. എന്നാൽ ഇവയിൽ ഏതാണ് കൊലപാതകത്തിലേക്ക് നയിച്ച യഥാർഥ പ്രകോപനമെന്ന് പോലീസിന് ഇനിയും വ്യക്തമായി കണ്ടെത്തേണ്ടതുണ്ട്. കേസിൽ ശക്തമായ തെളിവുകൾ കോടതിയിൽ ഹാജരാക്കാൻ കൊലപാതകത്തിന്റെ കൃത്യമായ പ്രേരണ കണ്ടെത്തേണ്ടത് നിർണായകമാണ്.
ഒന്നാം പ്രതിയായ 17-കാരന്റെ മുൻകാമുകി അഭിറാമിന്റെ സുഹൃത്തായി മാറിയതും പ്രതികൾക്ക് പകയ്ക്ക് കാരണമായെന്നാണ് അന്വേഷണത്തിൽ ലഭിച്ച വിവരം. ഉമറിന്റെയും ഒന്നാം പ്രതിയുടെയും സുഹൃത്തായ ആനന്ദയുടെ ദൃശ്യങ്ങൾ പുറത്തുവന്നതുമായി ബന്ധപ്പെട്ട തർക്കവും പ്രതികൾക്കിടയിലുണ്ടായിരുന്നു. ഇത്തരത്തിൽ പല കാരണങ്ങൾ നിലനിന്നിരുന്നെങ്കിലും കൊലപാതകത്തിലേക്ക് നയിച്ച നിർണായക പ്രകോപനം ഏതാണെന്നാണ് പോലീസ് അന്വേഷിക്കുന്നത്.
അതിനിടെ, അഭിറാമിന്റെ സുഹൃത്തിന്റെ മൊഴിയും അന്വേഷണത്തിൽ നിർണായകമായിട്ടുണ്ട്. അഭിറാമിനൊപ്പം സുഹൃത്തിനെയും കൊലപ്പെടുത്താനായിരുന്നു പ്രതികളുടെ പദ്ധതിയെന്നാണ് പോലീസ് കണ്ടെത്തൽ. എന്നാൽ പ്രതികൾ വിളിച്ച സ്ഥലത്തേക്ക് സുഹൃത്ത് പോകാതിരുന്നതിനാൽ രക്ഷപ്പെടുകയായിരുന്നു. ഒക്ടോബർ ഒന്നിന് ഒന്നാം പ്രതിയായ 17-കാരൻ തന്നെ മർദിച്ചിരുന്നതായി സുഹൃത്ത് പോലീസിന് മൊഴി നൽകിയിട്ടുണ്ട്.
മർദനത്തിന്റെ രീതിയാണ് ഈ മൊഴിയെ അന്വേഷണത്തിൽ പ്രധാനപ്പെട്ടതാക്കുന്നത്. വയറ്റിൽ ഇടിച്ചശേഷം നിലത്തേക്ക് മറിച്ചിട്ട് ശരീരത്തിന് മുകളിൽ കയറിയിരുന്ന് കഴുത്ത് അമർത്തിയെന്നാണ് സുഹൃത്ത് മൊഴി നൽകിയത്. ഇതേ രീതിയിലാണ് ഉമറും ഒന്നാം പ്രതിയും ചേർന്ന് അഭിറാമിനെ കൊലപ്പെടുത്തിയതെന്നാണ് പോലീസിന്റെ കണ്ടെത്തൽ. പോസ്റ്റ്മോർട്ടം റിപ്പോർട്ടിലെ വിവരങ്ങളും ഈ നിഗമനത്തെ പിന്തുണയ്ക്കുന്നുണ്ടെന്നാണ് അന്വേഷണസംഘം വിലയിരുത്തുന്നത്. പ്രതികളുടെ കുറ്റകൃത്യരീതിയുമായി ബന്ധപ്പെട്ട് കോടതിയിൽ ഹാജരാക്കാവുന്ന പ്രധാന തെളിവായി ഈ മൊഴി മാറിയേക്കും.
കൊലപാതകത്തിന് ദിവസങ്ങൾ നീണ്ട ആസൂത്രണമുണ്ടായിരുന്നുവെന്നും പോലീസ് കണ്ടെത്തിയിട്ടുണ്ട്. മോഷണക്കേസുകളിൽ പ്രതിയായ ഉമറിന്റെ പങ്ക് വ്യക്തമായതോടെ ഇയാളുടെ നീക്കങ്ങൾ അന്വേഷണസംഘം സൂക്ഷ്മമായി പരിശോധിച്ചിരുന്നു. ഇതിനിടെയാണ് ഫോൺ ഉപയോഗിച്ച് പോലീസിനെ തെറ്റിദ്ധരിപ്പിക്കാൻ ശ്രമിച്ച വിവരം പുറത്തുവന്നത്.
കുറ്റകൃത്യത്തിന് പുറപ്പെടുന്നതിന് മുൻപ് ഉമർ കാമുകിയോട് തന്റെ ഫോണിലേക്ക് വിളിക്കാൻ ആവശ്യപ്പെട്ടിരുന്നു. കോൾ അറ്റൻഡ് ചെയ്ത് കണക്ട് ചെയ്ത നിലയിൽ ഫോൺ വീട്ടിൽവെച്ചാണ് ഇയാൾ പാങ്ങപ്പാറയിലെത്തിയത്. അഭിറാമിനെ കൊലപ്പെടുത്തിയശേഷം ഏകദേശം ഒന്നര മണിക്കൂർ കഴിഞ്ഞാണ് ഉമർ വീട്ടിൽ തിരിച്ചെത്തിയത്. ഈ സമയമത്രയും കാമുകിയുമായുള്ള ഫോൺ കോൾ കണക്ട് ചെയ്ത നിലയിൽ തുടർന്നിരുന്നു.
വീട്ടിലെത്തിയശേഷം കൊലപാതകത്തെക്കുറിച്ചുള്ള വിവരങ്ങൾ ഉമർ കാമുകിയോട് വിശദമായി പങ്കുവെച്ചതായാണ് പോലീസിന് ലഭിച്ച വിവരം. കൊലപാതകം എങ്ങനെയാണ് നടത്തിയതെന്നതടക്കമുള്ള കാര്യങ്ങൾ ഇയാൾ വെളിപ്പെടുത്തി. തുടർന്ന് പോലീസ് അന്വേഷണം ഉണ്ടായാൽ എങ്ങനെ രക്ഷപ്പെടാമെന്നതിനെക്കുറിച്ചും ഇരുവരും ചർച്ച നടത്തി. പോലീസിനെ വഴിതെറ്റിക്കാൻ സഹായിക്കുന്ന തരത്തിലുള്ള ചാറ്റുകളും ഒന്നാം പ്രതിയെയും അഭിറാമിനെയും കുറിച്ചുള്ള ചില വിവരങ്ങളും കൈമാറിയിരുന്നു.
കൊലപാതകം നടന്ന സമയത്ത് താൻ വീട്ടിലിരുന്ന് കാമുകിയുമായി ഫോണിൽ സംസാരിക്കുകയായിരുന്നുവെന്ന് തെളിയിക്കാനായിരുന്നു ഉമറിന്റെ ശ്രമം. ഫോൺ പരിശോധിച്ചാൽ തനിക്ക് അനുകൂലമായ തെളിവുകൾ ലഭിക്കുമെന്ന ആത്മവിശ്വാസവും ഇതിന്റെ അടിസ്ഥാനത്തിലായിരുന്നു. എന്നാൽ ഫോൺ പരിശോധനയിൽ കാമുകിയുടെ പങ്ക് വ്യക്തമായി. ചോദ്യം ചെയ്യലിൽ ഉമറിന്റെ നിർദേശപ്രകാരമാണ് ഇത്തരത്തിൽ കോൾ ചെയ്തതെന്ന് യുവതി സമ്മതിച്ചതായാണ് വിവരം. ഇതോടെ കേസിൽ യുവതിയെയും പ്രതിചേർത്ത് അറസ്റ്റ് ചെയ്യുകയായിരുന്നു.
കേസിൽ കൂടുതൽ പേർക്ക് പങ്കുണ്ടോയെന്നും പോലീസ് പരിശോധിക്കുന്നുണ്ട്. റിമാൻഡിലുള്ള പ്രതികളെ വീണ്ടും കസ്റ്റഡിയിൽ വാങ്ങി ചോദ്യം ചെയ്യാനാണ് അന്വേഷണസംഘത്തിന്റെ നീക്കം. കൂടുതൽ തെളിവുകൾക്കൊപ്പം കേസിൽ നിർണായകമായേക്കാവുന്ന കാണാതായ ഫോണുകളും വസ്ത്രങ്ങളും കണ്ടെത്തേണ്ടതുണ്ട്. ഉമറിന് മറ്റൊരു ഫോൺ കൂടി ഉണ്ടെന്നും അത് ഒളിപ്പിച്ചിരിക്കുകയാണെന്നുമാണ് പോലീസിന്റെ സംശയം.
കാണാതായ വസ്തുക്കൾ തോട്ടിൽ ഉപേക്ഷിച്ചെന്ന പ്രതിയുടെ മൊഴിയുടെ അടിസ്ഥാനത്തിൽ അവിടെ പരിശോധന നടത്തിയെങ്കിലും ഒന്നും കണ്ടെത്താനായില്ല. ഇവ തോട്ടിൽ ഉപേക്ഷിച്ചിരിക്കാനുള്ള സാധ്യത കുറവാണെന്നാണ് പോലീസിന്റെ വിലയിരുത്തൽ. മറ്റെവിടെയെങ്കിലും ഒളിപ്പിക്കുകയോ നശിപ്പിക്കുകയോ ചെയ്തിരിക്കാമെന്നും സംശയിക്കുന്നു. ഈ ഫോണുകളും വസ്ത്രങ്ങളും കണ്ടെത്താനായാൽ അന്വേഷണത്തിൽ നിർണായക പുരോഗതിയുണ്ടാകുമെന്നാണ് പ്രതീക്ഷ.
ഉമർ പോലീസിനെ തെറ്റിദ്ധരിപ്പിക്കാൻ ഒരുക്കിയ തന്ത്രം പുറത്തുവന്നെങ്കിലും ഇനിയും കണ്ടെത്താനുള്ള തെളിവുകൾ ഏറെയുണ്ട്. ഒളിപ്പിച്ചുവെച്ച ഫോണും വസ്ത്രങ്ങളും കണ്ടെത്തുന്നതിനൊപ്പം കൊലപാതകത്തിന് പിന്നിലെ കൃത്യമായ കാരണവും കൂടുതൽ പേരുടെ പങ്കാളിത്തവും തെളിയിക്കുകയാണ് അന്വേഷണസംഘത്തിന്റെ മുന്നിലുള്ള പ്രധാന വെല്ലുവിളി.
