കൊല്ലം: 16 വയസ്സുകാരിയെ പീഡിപ്പിച്ച യുട്യൂബറും മതപാഠശാല ഡയറക്ടറുമായ മുഹമ്മദ് നിയാസ് ജൗഹറി കൂടുതൽ പെൺകുട്ടികളെ ലൈംഗിക ചൂഷണത്തിനിരയാക്കിയതായി പൊലീസിനു സംശയം. ഇക്കാര്യങ്ങളിൽ അടക്കം വിശദമായ അന്വേഷണത്തിനൊരുങ്ങി പൊലീസ്. പ്രതിയുടെ മൊബൈൽ ഫോൺ ശാസ്ത്രീയ പരിശോധനയ്ക്ക് വിധേയമാക്കും. നിലവിൽ ഇയാൾ റിമാൻഡിൽ ആണ്. 16 കാരിയോട് ലൈംഗികാതിക്രമം നടത്തിയ കേസിൽ മുഹമ്മദ് നിയാസ് ജൗഹറി ഇന്നലെയാണ് അറസ്റ്റിലായത്. ഓച്ചിറ മേമനയിൽ അൽ ഹബീബിയ ഇസ്‌ലാമിക് അക്കാദമി നടത്തുകയാണ് മുഹമ്മദ് നിയാസ് ജൗഹറി.
ഈ സ്ഥാപനം കേന്ദ്രീകരിച്ച് വൻ സാമ്പത്തിക ഇടപാട് നടന്നതായും കണ്ടെത്തി. സ്ഥാപനം കേന്ദ്രീകരിച്ച് കൂടുതൽ അന്വേഷണത്തിന് പൊലീസ് നീക്കം തുടങ്ങി. പെൺകുട്ടിയുടെ പിതാവിന്റെ അമ്മയുടെ ദേഹത്ത് ബാധ കൂടിയിട്ടുണ്ടെന്നും ഇത് ഒഴിപ്പിക്കാമെന്നു വിശ്വസിപ്പിച്ച് പീഡിപ്പിച്ചുവെന്നുമാണ് പെൺകുട്ടിയുടെ മൊഴി. പെൺകുട്ടിയെയും മുത്തശ്ശിയെയും ഇയാൾ അൽ ഹബീബിയ ഇസ്‌ലാമിക് അക്കാദമിയിൽ വിളിച്ചുവരുത്തി. അവിടെ വച്ചും ഇയാൾ വാടകയ്ക്കു താമസിക്കുന്ന വീട്ടിൽ വച്ചും പിന്നീട് വിവിധയിടങ്ങളിൽ എത്തിച്ചും പീഡിപ്പിച്ചുവെന്ന് പരാതിയിൽ പറയുന്നു.
ഭീഷണിപ്പെടുത്തി പീഡനത്തിന് ഇരയാക്കി എന്നാണ് പെൺകുട്ടിയുടെ മൊഴി. 2025 ഒക്ടോബർ, നവംബർ മാസങ്ങളിൽ നടന്ന സംഭവം, പെൺകുട്ടി സുഹൃത്തുക്കളോട് പറഞ്ഞു. ഇതിന് പിന്നാലെയാണ് പൊലീസിൽ പരാതിപ്പെടുന്നത്. തുടർന്ന് ഇയാളെ സ്ഥാപനത്തിൽനിന്ന് പൊലീസ് കസ്റ്റഡിയിൽ എടുത്തു. ചോദ്യം ചെയ്യലിൽ പ്രതി കുറ്റം സമ്മതിച്ചിട്ടുണ്ട്.
