തിരുവനന്തപുരം: കുടുംബവഴക്കിനെത്തുടർന്ന് തിരുമല പെരുകാവിൽ നടുറോഡിൽവെച്ച് ഭാര്യയെ വെട്ടുകത്തി ഉപയോഗിച്ച് ആക്രമിച്ച് ഒളിവിൽ പോയ ഭർത്താവ് അറസ്റ്റിൽ. പാച്ചല്ലൂർ സ്വദേശി വിജയൻ (52) ആണ് പിടിയിലായത്. കഴിഞ്ഞ ദിവസമായിരുന്നു സംഭവം.
കഴിഞ്ഞ 12 വർഷമായി ഇരുവരും വേർപിരിഞ്ഞാണ് താമസിച്ചിരുന്നത്. വിജയന്റെ ഉടമസ്ഥതയിലുള്ള സ്ഥലവുമായി ബന്ധപ്പെട്ട തർക്കമാണ് ആക്രമണത്തിന് പിന്നിലെന്നാണ് വിവരം. സ്കൂട്ടറിൽ യാത്ര ചെയ്യുകയായിരുന്ന ഭാര്യയെ വിജയൻ ബൈക്കിൽ പിന്തുടർന്ന് തടഞ്ഞുനിർത്തി കൈയിൽ കരുതിയിരുന്ന വെട്ടുകത്തി ഉപയോഗിച്ച് ആക്രമിക്കുകയായിരുന്നു.
തലയ്ക്കും കൈകൾക്കും ഗുരുതരമായി പരിക്കേറ്റ ഭാര്യ റോഡിൽ വീണ ശേഷവും ഇയാൾ ആക്രമണം തുടർന്നു. നാട്ടുകാർ ഓടിക്കൂടിയതോടെ വിജയൻ സ്ഥലത്തുനിന്ന് രക്ഷപ്പെട്ടു. രക്തം വാർന്ന് റോഡിൽ കിടന്ന ഇവരെ ഉടൻ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ഇവർ ചികിത്സയിൽ തുടരുകയാണ്.
ആക്രമണത്തിന്റെ സിസിടിവി ദൃശ്യങ്ങൾ പോലീസിന് ലഭിച്ചിരുന്നു. സംഭവത്തിൽ വധശ്രമത്തിന് കേസെടുത്ത പോലീസ് ഒളിവിൽ പോയ വിജയനായി അന്വേഷണം ഊർജിതമാക്കി. വ്യാഴാഴ്ച പാച്ചല്ലൂർ ക്ഷേത്രത്തിന് സമീപത്തുനിന്നാണ് ഇയാളെ അറസ്റ്റ് ചെയ്തത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
