ന്യൂഡൽഹി: പരസ്പര സമ്മതത്തോടെ നടന്ന ലൈംഗികബന്ധങ്ങൾ പിന്നീട് ബന്ധം തകരുമ്പോൾ ബലാത്സംഗക്കേസുകളായി മാറുന്ന പ്രവണതയിൽ ആശങ്ക പ്രകടിപ്പിച്ച് സുപ്രീംകോടതി. ഒരു ബന്ധത്തിൽനിന്ന് പിന്മാറാൻ പുരുഷന് അവകാശമില്ലേയെന്നും കോടതി ചോദിച്ചു. ബലാത്സംഗക്കേസിൽ പ്രതിയായിരുന്ന ഒരാളെ കുറ്റവിമുക്തനാക്കിക്കൊണ്ടാണ് ജസ്റ്റിസുമാരായ ബി.വി. നാഗരത്ന, ആർ. മഹാദേവൻ എന്നിവരടങ്ങിയ ബെഞ്ചിന്റെ നിരീക്ഷണം.
വൈകാരികമായ അഭിപ്രായവ്യത്യാസങ്ങളോ, ബന്ധത്തിലെ തകർച്ചയോ ഉണ്ടാകുമ്പോൾ ക്രിമിനൽ നിയമത്തെ ആയുധമാക്കുന്ന പ്രവണത സമൂഹവും കോടതികളും നിരുത്സാഹപ്പെടുത്തണമെന്ന് ബെഞ്ച് വ്യക്തമാക്കി. പരസ്പര സമ്മതത്തോടെ ആരംഭിക്കുകയും പിന്നീട് അവസാനിക്കുകയും ചെയ്ത ബന്ധങ്ങളെ പഴയ സംഭവങ്ങൾ പരിശോധിച്ച് ലൈംഗികാതിക്രമമായി വ്യാഖ്യാനിക്കാൻ ശ്രമിക്കുന്നത് സമീപകാലത്ത് ആശങ്കാജനകമായ പ്രവണതയായി മാറിയിട്ടുണ്ടെന്നും കോടതി ചൂണ്ടിക്കാട്ടി.
“സമീപകാലത്ത് ആശങ്കാജനകമായ ഒരു പ്രവണത ഞങ്ങൾ ശ്രദ്ധിച്ചിട്ടുണ്ട്. പരസ്പര സമ്മതത്തോടെ ആരംഭിച്ച ബന്ധങ്ങൾ അവസാനിച്ചശേഷം, മുൻകാല സംഭവങ്ങൾ വിശദമായി പരിശോധിച്ച് അവയിൽനിന്ന് പിന്നീട് അക്രമമോ ലൈംഗികാതിക്രമമോ ഉണ്ടായിരുന്നുവെന്ന് വ്യാഖ്യാനിക്കാൻ ശ്രമിക്കുകയാണ്,” ബെഞ്ച് നിരീക്ഷിച്ചു.
ബന്ധത്തിന്റെ തുടക്കം മുതൽ തന്നെ വഞ്ചനയിലൂടെയോ, തെറ്റായ വാഗ്ദാനങ്ങളിലൂടെയോ സമ്മതം നേടിയെടുക്കുന്ന കേസുകളെയും പരസ്പര സമ്മതത്തോടെ നടന്ന ലൈംഗികബന്ധങ്ങളിൽ പിന്നീട് ഒരാൾക്ക് പശ്ചാത്താപമുണ്ടാകുന്ന സാഹചര്യങ്ങളെയും ഒരുപോലെ കാണാനാകില്ലെന്ന് കോടതി വ്യക്തമാക്കി. ഒരു ബന്ധം അവസാനിച്ചു എന്നതുകൊണ്ടുമാത്രം അതിനുമുമ്പ് പരസ്പര സമ്മതത്തോടെ നടന്ന ലൈംഗികബന്ധം കുറ്റകരമാകില്ലെന്നും കോടതി പറഞ്ഞു. അത്തരത്തിൽ മുൻകാല ബന്ധങ്ങളെ ക്രിമിനൽ കുറ്റമായി ചിത്രീകരിക്കുന്നത് വ്യക്തിയുടെ വ്യക്തി സ്വാതന്ത്ര്യത്തെയും സൽപ്പേരിനെയും ബാധിക്കുമെന്നും ബെഞ്ച് ചൂണ്ടിക്കാട്ടി. ഇത്തരം സമീപനം പുരുഷന്റെ സ്വന്തം തീരുമാനങ്ങൾ എടുക്കാനുള്ള സ്വാതന്ത്ര്യത്തെ ഇല്ലാതാക്കുന്നതാണെന്നും കോടതി നിരീക്ഷിച്ചു.
“യഥാർഥത്തിൽ, ഇത്തരം സമീപനം പുരുഷന്റെ വ്യക്തിപരമായ തീരുമാനമെടുക്കാനുള്ള സ്വാതന്ത്ര്യത്തെ പൂർണമായും ഇല്ലാതാക്കുന്നു. ഒരിക്കൽ പരസ്പര സമ്മതത്തോടെ ഒരു ബന്ധത്തിലേർപ്പെട്ടുവെന്ന കാരണത്താൽ, പിന്നീട് ബലാത്സംഗക്കുറ്റം ചുമത്തപ്പെടുമെന്ന ഭയത്തിൽ അയാൾ ആ ബന്ധത്തിൽ തുടരാൻ നിർബന്ധിതനാകുന്ന സാഹചര്യമുണ്ടാകും,” ബെഞ്ച് പറഞ്ഞു. “അങ്ങനെയെങ്കിൽ, ആ ബന്ധത്തിൽനിന്ന് പിന്മാറാൻ പുരുഷന് അവകാശമില്ലെന്ന് പറയാനാകുമോ? അത്തരമൊരു തീരുമാനത്തെ വഞ്ചനയോ തട്ടിപ്പോ ആയി കണക്കാക്കാനാകുമോ? തീർച്ചയായും ഇല്ല,” കോടതി വ്യക്തമാക്കി.
ബന്ധങ്ങൾ തകരുന്നതിനെത്തുടർന്ന് ക്രിമിനൽ കേസുകൾ രജിസ്റ്റർ ചെയ്യുന്ന നിരവധി സംഭവങ്ങൾ കോടതിയുടെ ശ്രദ്ധയിൽപ്പെട്ടിട്ടുണ്ടെന്നും ബെഞ്ച് ചൂണ്ടിക്കാട്ടി. ബലാത്സംഗം അതീവ ഗുരുതരമായ കുറ്റകൃത്യമാണ്. അതിനാൽ യഥാർഥ ലൈംഗികാതിക്രമം, നിർബന്ധം, അല്ലെങ്കിൽ വഞ്ചനയിലൂടെ സമ്മതം നേടിയെടുക്കൽ തുടങ്ങിയ സാഹചര്യങ്ങളിൽ മാത്രമാണ് ഇത്തരം കുറ്റാരോപണങ്ങൾ ഉന്നയിക്കേണ്ടതെന്ന് കോടതി നിരീക്ഷിച്ചു.
പരസ്പര സമ്മതത്തോടെ നടന്ന എല്ലാ ബന്ധങ്ങളും തകരുമ്പോൾ അവയെ ബലാത്സംഗക്കേസുകളാക്കി മാറ്റുന്നത് ഈ ഗുരുതരമായ കുറ്റകൃത്യത്തിന്റെ സ്വഭാവത്തെയും ഗൗരവത്തെയും ദുർബലപ്പെടുത്തുമെന്നും ജഡ്ജിമാർ പറഞ്ഞു. അതുപോലെ റിപ്പോർട്ട് ചെയ്യപ്പെടാത്ത കേസുകളും നിരവധിയെന്നും കോടതി പറഞ്ഞു.
രാജ്യത്ത് നിരവധി ബലാത്സംഗക്കേസുകൾ ഇപ്പോഴും റിപ്പോർട്ട് ചെയ്യപ്പെടാതെ പോകുന്നുണ്ടെന്ന യാഥാർഥ്യവും സുപ്രീംകോടതി അംഗീകരിച്ചു. സ്വന്തം സൽപ്പേരും കുടുംബത്തിന്റെ മാനവും സംരക്ഷിക്കുന്നതിനായി പല ഇരകളും അതിക്രമങ്ങളെക്കുറിച്ച് പുറത്തുപറയാൻ തയ്യാറാകുന്നില്ലെന്നും കോടതി ചൂണ്ടിക്കാട്ടി. അതുകൊണ്ടുതന്നെ, ലൈംഗികാതിക്രമമോ പീഡനമോ നടന്നതായി വസ്തുതകൾ വ്യക്തമായി സൂചിപ്പിക്കുന്ന കേസുകളിൽ സമഗ്രമായ അന്വേഷണം നടത്തുകയും കുറ്റക്കാർക്കെതിരെ നിയമനടപടികൾ സ്വീകരിക്കുകയും വേണമെന്ന് ബെഞ്ച് വ്യക്തമാക്കി.
യഥാർഥ ലൈംഗികാതിക്രമക്കേസുകൾ ഗൗരവത്തോടെ കൈകാര്യം ചെയ്യേണ്ടതിന്റെ ആവശ്യകത ഊന്നിപ്പറഞ്ഞ കോടതി, അതേസമയം ബന്ധങ്ങൾ അവസാനിച്ചതിന്റെ പേരിൽ മാത്രം പരസ്പര സമ്മതത്തോടെ നടന്ന ലൈംഗികബന്ധങ്ങളെ കുറ്റകൃത്യമായി ചിത്രീകരിക്കുന്ന പ്രവണത തടയേണ്ടതുണ്ടെന്നും വ്യക്തമാക്കി.
