കൊച്ചി: ചേരാനല്ലൂർ വാഹനാപകടവുമായി ബന്ധപ്പെട്ട് നിർണായക സിസിടിവി ദൃശ്യങ്ങൾ പുറത്ത്. അപകടമുണ്ടാക്കിയെന്ന് ആരോപിക്കപ്പെടുന്ന 17കാരൻ ആലുവയിലെ ഫ്ലാറ്റിൽനിന്ന് കാറുമായി പുറത്തുപോകുന്ന ദൃശ്യങ്ങളാണ് പുറത്തുവന്നത്. ഞായറാഴ്ച പുലർച്ചെ 1.36നുള്ള ദൃശ്യങ്ങളാണിത്.
പുലർച്ചെ 2.20നാണ് ചേരാനല്ലൂരിലെ കണ്ടെയ്നർ റോഡിൽ വാഹനാപകടമുണ്ടായത്. അപകടത്തിന് ഏകദേശം 44 മിനിറ്റ് മുൻപ് 17കാരൻ ഫ്ലാറ്റിൽനിന്ന് കാറുമായി പുറപ്പെടുന്നതാണ് സിസിടിവി ദൃശ്യങ്ങളിലുള്ളത്.
അപകടത്തെക്കുറിച്ച് അറിവുണ്ടായിരുന്നില്ലെന്നാണ് 17കാരന്റെ പിതാവും അഡീഷണൽ ജില്ലാ ജഡ്ജിയുമായ വ്യക്തി നേരത്തേ വ്യക്തമാക്കിയിരുന്നത്. കാർ എപ്പോൾ ഫ്ലാറ്റിൽനിന്ന് പുറപ്പെട്ടുവെന്ന കാര്യത്തിൽ വ്യക്തത വരുത്താൻ പുതിയ ദൃശ്യങ്ങൾ നിർണായകമായേക്കും. കേസിലെ അന്വേഷണത്തിൽ സമയക്രമം പ്രധാനപ്പെട്ട വിവരമാണ്.
