ദുബായ്: സൗദി അറേബ്യയുടെ തന്ത്രപ്രധാന ഈസ്റ്റ്–വെസ്റ്റ് ക്രൂഡ് ഓയിൽ പൈപ്പ്‌ലൈനിലെ പമ്പിങ് സ്റ്റേഷനുകൾക്കും റിയാദിലെ കിങ് ഖാലിദ് രാജ്യാന്തര വിമാനത്താവളത്തിനും നേരെ വീണ്ടും ആക്രമണം നടത്തിയതായി ഹൂതികൾ. ആക്രമണങ്ങൾ സൗദിയിലെ എണ്ണനീക്കത്തെയും വ്യോമഗതാഗതത്തെയും ബാധിക്കുമെന്ന ആശങ്കയ്ക്കിടെ യെമനിൽ ഹൂതി മിസൈൽ സംവിധാനങ്ങൾക്കു നേരെ സൗദി സഖ്യസേന തിരിച്ചടിച്ചു. അതേസമയം, സംഘർഷം വ്യാപിക്കുന്നത് തടയാൻ സൗദി, പാക്കിസ്ഥാൻ, തുർക്കി രാജ്യങ്ങളുടെ ഉന്നത പ്രതിനിധികൾ ഇറാനുമായി ചർച്ചയ്ക്കൊരുങ്ങി.
റിയാദിനു നേരെ വന്ന മിസൈൽ പ്രതിരോധിച്ചതായും സനായിൽ ബാലിസ്റ്റിക് മിസൈൽ വിക്ഷേപണ ലോഞ്ചറുകൾ തകർത്തതായും സൗദി സഖ്യസേന അറിയിച്ചു. ഹൂതികൾ നടത്തിയതായി പറയുന്ന എണ്ണ പൈപ്പ്‌ലൈൻ, വിമാനത്താവള ആക്രമണങ്ങളിൽ സൗദി അധികൃതർ ഉടൻ ഔദ്യോഗിക സ്ഥിരീകരണം നൽകിയിരുന്നില്ല.
യെമൻ തലസ്ഥാനമായ സനായിൽ ബാലിസ്റ്റിക് മിസൈലുകൾ സൂക്ഷിക്കാൻ ഉപയോഗിച്ചിരുന്ന അഞ്ച് തുരങ്കങ്ങളും നാല് മിസൈൽ വിക്ഷേപണ ലോഞ്ചറുകളും ഒരു മിസൈൽ സംഭരണ കേന്ദ്രവും തകർത്തതായി സഖ്യസേന വ്യക്തമാക്കി. ഹൂതികളുടെ വിതരണ ശൃംഖലകൾക്കും സൈനിക ഉപകരണങ്ങൾക്കും പോരാളികൾക്കും നേരെയും ആക്രമണം നടത്തിയതായി സഖ്യസേന വക്താവ് തുർക്കി അൽ മാലികി അറിയിച്ചു.
ഇതിനിടെ, ഹൂതികളെ നേരിടാൻ സൗദിക്ക് സൈനിക സഹായം നൽകുന്നതിന് ഈജിപ്ത് പാർലമെന്റ് പ്രസിഡന്റ് അബ്ദുൽ ഫത്താഹ് അൽ സീസിക്ക് അനുമതി നൽകി. സൗദിയുടെ ഭൂപ്രദേശം, അതിർത്തികൾ, പരമാധികാരം, പുണ്യസ്ഥലങ്ങൾ എന്നിവയുടെ സംരക്ഷണത്തിനുള്ള പ്രതിരോധ സഹായമാണ് ലക്ഷ്യമെന്ന് ഈജിപ്ഷ്യൻ അധികൃതർ വ്യക്തമാക്കി. യെമനിലേക്ക് കരസേനയെ അയയ്ക്കുന്നതിനെക്കുറിച്ച് ഔദ്യോഗിക പ്രഖ്യാപനമുണ്ടായിട്ടില്ല.
അതേസമയം, മക്ക സൈനിക ഉടമ്പടിയുമായി ബന്ധപ്പെട്ട സൗദി, പാക്കിസ്ഥാൻ, തുർക്കി രാജ്യങ്ങളിലെ ഉന്നത പ്രതിനിധികൾ ഇറാനിലെത്തി. സൗദി പ്രതിരോധ മന്ത്രി ഖാലിദ് ബിൻ സൽമാൻ, പാക്കിസ്ഥാൻ സൈനിക മേധാവി അസീം മുനീർ, തുർക്കി രഹസ്യാന്വേഷണ വിഭാഗം മേധാവി ഇബ്രാഹിം കാലിൻ എന്നിവരാണ് സംഘത്തിലുള്ളത്. മേഖലയിൽ സംഘർഷം കുറയ്ക്കാനും പ്രാദേശിക സുരക്ഷാ വിഷയങ്ങളിൽ ഏകോപനം ഉറപ്പാക്കാനുമാണ് ചർച്ചകൾ. മൂന്ന് രാജ്യങ്ങളുടെയും പ്രതിനിധികൾ ഇറാനുമായി നടത്തുന്ന ഈ തലത്തിലുള്ള കൂടിക്കാഴ്ച മേഖലയുടെ നയതന്ത്ര നീക്കങ്ങളിൽ നിർണായകമാണ്.
യെമനിലെ സംഘർഷം വീണ്ടും ശക്തമായതോടെ ചെങ്കടൽ മേഖലയിലെയും ആഗോള എണ്ണവിതരണത്തിലെയും സുരക്ഷയെക്കുറിച്ചുള്ള ആശങ്കയും വർധിച്ചിട്ടുണ്ട്. ഹോർമുസ് കടലിടുക്കിലൂടെയുള്ള എണ്ണനീക്കം തടസ്സപ്പെടുന്ന സാഹചര്യത്തിൽ സൗദിയുടെ ഈസ്റ്റ്–വെസ്റ്റ് പൈപ്പ്‌ലൈൻ പ്രധാന കയറ്റുമതി മാർഗമാണ്. അതിനാൽ പൈപ്പ്‌ലൈനും എണ്ണ കേന്ദ്രങ്ങളും ലക്ഷ്യമിട്ടുള്ള ആക്രമണങ്ങൾ മേഖലയ്ക്ക് പുറത്തേക്കും പ്രത്യാഘാതങ്ങൾ സൃഷ്ടിക്കുമെന്ന ആശങ്കയുണ്ട്.
