പുതുക്കാട്: ചൂടുകഞ്ഞിവെള്ളം ശരീരത്തിൽ ഒഴിച്ച് പൊള്ളലേൽപ്പിച്ചതിനെത്തുടർന്ന് പിതാവ് മരിച്ച സംഭവത്തിൽ മകൻ അറസ്റ്റിൽ. തൃശൂർ പുതുക്കാട് കണ്ടൻകവിൽ വീട്ടിൽ ഗോപാലകൃഷ്ണൻ (70) മരിച്ച സംഭവത്തിലാണ് മകൻ വിനോദിനെ (37) പൊലീസ് പിടികൂടിയത്. തൃശൂർ നഗരത്തിൽനിന്നാണ് ഇയാളെ അറസ്റ്റ് ചെയ്തത്. മാള പൊലീസ് സ്റ്റേഷൻ പരിധിയിലെ മോഷണക്കേസിലും വിനോദ് പ്രതിയാണെന്ന് പൊലീസ് അറിയിച്ചു.
ഒക്ടോബർ 21ന് ഞെള്ളൂരിലെ സ്വന്തം വീട്ടിൽവെച്ചാണ് ഗോപാലകൃഷ്ണന്റെ ശരീരത്തിൽ ചൂടുകഞ്ഞിവെള്ളം വീണ് പൊള്ളലേറ്റത്. ഗുരുതരമായി പൊള്ളലേറ്റതിനെത്തുടർന്ന് തൃശൂർ മെഡിക്കൽ കോളജ് ആശുപത്രിയിൽ പ്രവേശിപ്പിച്ച ഗോപാലകൃഷ്ണൻ ചികിത്സയിലിരിക്കെ ഇന്നലെ പുലർച്ചെ രണ്ടരയോടെ മരിച്ചു.
ഗോപാലകൃഷ്ണന്റെ സഹോദരൻ മണികണ്ഠൻ നൽകിയ മൊഴിയുടെ അടിസ്ഥാനത്തിൽ പുതുക്കാട് പൊലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചിരുന്നു. ഗോപാലകൃഷ്ണനെ മകൻ വിനോദ് നിരന്തരം ഉപദ്രവിക്കാറുണ്ടായിരുന്നുവെന്നാണ് മണികണ്ഠൻ പൊലീസിന് നൽകിയ മൊഴി. ഈ മൊഴിയുൾപ്പെടെയുള്ള വിവരങ്ങൾ പരിശോധിച്ച് നടത്തിയ അന്വേഷണത്തിനൊടുവിലാണ് വിനോദിനെ അറസ്റ്റ് ചെയ്തത്.
സംഭവത്തിൽ ചൂടുകഞ്ഞിവെള്ളം ശരീരത്തിൽ വീണത് എങ്ങനെയാണെന്നും മരണത്തിലേക്ക് നയിച്ച സാഹചര്യങ്ങൾ എന്താണെന്നും പൊലീസ് അന്വേഷിച്ചുവരികയാണ്. മാള പൊലീസ് സ്റ്റേഷൻ പരിധിയിലെ മോഷണക്കേസിലും പ്രതിയായ വിനോദിനെതിരായ തുടർനടപടികൾ പൂർത്തിയാക്കിയശേഷം കോടതിയിൽ ഹാജരാക്കും.
