കോഴിക്കോട്: മുസ് ലിം വിരുദ്ധ വിദ്വേഷ വീഡിയോയുമായി ഉത്തരേന്ത്യൻ ഇൻഫ്‌ളുവൻസർ. ഫോർട്ട് കൊച്ചി നിറയെ മുസ് ലിംകളാണെന്നും കേരളം അപകടത്തിലാണെന്നും കേന്ദ്രം ഇടപെടണമെന്നുമാണ് ‘ലിറ്റിചോക്കപ്പ്’ എന്ന ഇൻസ്റ്റഗ്രാം അക്കൗണ്ടിൽ പോസ്റ്റ് ചെയ്ത വീഡിയോയിൽ പറയുന്നത്.’ഈ വീഡിയോ ചെയ്തതിന് ശേഷം എനിക്ക് എന്തെങ്കിലും സംഭവിച്ചാൽ, അതിന്റെ പൂർണ ഉത്തരവാദിത്തം കേരള സർക്കാരിനായിരിക്കും. കാരണം ഇപ്പോൾ ഞാൻ കേരളത്തിലാണ് ഉള്ളത്, ഫോർട്ട് കൊച്ചിയിലാണ് താമസിക്കുന്നത്. ഫോർട്ട് കൊച്ചിയെക്കുറിച്ച് എനിക്ക് ഒരുപാട് കാര്യങ്ങൾ പറയാനുണ്ട്. ഇവിടെ നിന്ന് കൃത്യം 10 മിനിറ്റ് നടന്നാൽ എത്തുന്ന ദൂരത്തിൽ ഒരു കഫേയുണ്ട്, ‘കാശി ആർട്ട് കഫേ’ എന്നാണ് അതിന്റെ പേര്. കാശി എന്ന പേര് കേൾക്കുമ്പോൾ മഹാദേവനുമായും ബനാറസുമായും ബന്ധപ്പെട്ട എന്തെങ്കിലും ആയിരിക്കും എന്ന് നിങ്ങൾ കരുതിയേക്കാം, എന്നാൽ ഈ കാശി തികച്ചും വ്യത്യസ്തമായിരുന്നു.ഞാൻ ആ കഫേയ്ക്കുള്ളിൽ കയറിയപ്പോൾ ഞെട്ടിപ്പോയി. ഇന്ത്യയിൽ ആദ്യമായാണ് ഞാൻ ഗാന്ധിക്കൊപ്പം ജിന്നയുടെ ചിത്രം ചുവരിൽ കാണുന്നത്. 50-ലധികം വെള്ളി പൂശിയ (സിൽവർ കോട്ടഡ്) ചിത്രങ്ങളാണ് കാശി ആർട്ട് കഫേയുടെ ഉടമ അവിടെ വെച്ചിരിക്കുന്നത്.
തുടർന്ന് ഭക്ഷണം ഓർഡർ ചെയ്യാനായി ഞാൻ മെനു കാർഡ് വാങ്ങി. മെനുവിൽ മുഴുവൻ ബീഫ് വിഭവങ്ങളായിരുന്നു. മുഴുവനായും ബീഫ് വിഭവങ്ങൾ മാത്രം.പേര് കാശി എന്നാണ്, ജിന്നയുടെ ഫോട്ടോകൾ വെച്ചിരിക്കുന്നു, പരസ്യമായി ബീഫും വിൽക്കുന്നു. വർക്കലയെക്കുറിച്ച് ഞാൻ മുമ്പ് ചെയ്ത ഒരു വീഡിയോയ്‌ക്കെതിരെ കേരള ആഭ്യന്തര വകുപ്പ് രംഗത്ത് വന്നിരുന്നു, അത് വ്യാജമാണെന്ന് അവർ പറഞ്ഞു. എന്ത് വ്യാജമാണെന്നാണ് പറയുന്നത്? ഞാൻ ഇപ്പോൾ ചെയ്യുന്ന ഈ വീഡിയോയിൽ, ഇവിടെ ജിന്നയ്ക്ക് എന്താണ് കാര്യം? നമ്മുടെ ഭാരതത്തിൽ ജിന്നയ്ക്ക് എന്താണ് കാര്യം? ജിന്ന ഭാരതത്തോട് എന്താണ് ചെയ്തതെന്ന് അറിയാമോ? ജിന്ന ഗാന്ധിക്കും നെഹ്റുവിനുമൊപ്പം ചേർന്ന് ഭാരതത്തെ വെട്ടിമുറിച്ചു. ജിന്നയും ഗാന്ധിയും നെഹ്റുവും കാരണം ലക്ഷക്കണക്കിന് ഹിന്ദുക്കൾക്കും സിഖുകാർക്കും ജീവൻ നഷ്ടപ്പെട്ടു, സ്ത്രീകൾ പീഡിപ്പിക്കപ്പെട്ടു. എന്നിട്ട് ആ ജിന്നയ്ക്ക് ഭാരതത്തിൽ എന്താണ് കാര്യം? കേരളത്തിൽ ഇസ്‌ലാം പ്രചരിപ്പിക്കുന്നതിനായി അറബ് രാജ്യങ്ങളിൽ നിന്ന് നിങ്ങൾക്ക് വൻതോതിൽ ഫണ്ട് ലഭിക്കുന്നുണ്ടോ? നിങ്ങൾ സൃഷ്ടിക്കുന്നത് തികച്ചും ഒരുപക്ഷീയമായ സാഹചര്യമാണ്. കാശി ആർട്ട് കഫേയുടെ ഉടമയോടായി ഞാൻ പറയുകയാണ്: ഇതിന്റെ പേര് മാറ്റി ‘കറാച്ചി ആർട്ട് കഫേ’ എന്നാക്കൂ. കാരണം നിങ്ങൾ ജിന്നയെ മഹത്വവൽക്കരിക്കുകയും ബീഫ് വിൽക്കുകയുമാണ് ചെയ്യുന്നത്.
കാശിയുടെ അർഥം എന്താണെന്ന് നിങ്ങൾക്കറിയാമോ? ഭൂമിയിലെ ഏറ്റവും പവിത്രവും പുരാതനവുമായ നഗരമാണ് കാശി. ഇവിടുത്തെ ജനസംഖ്യയും ചുറ്റുപാടുകളും കണ്ട് ഞാൻ ശരിക്കും അമ്പരന്നുപോയി. ഫോർട്ട് കൊച്ചിയിൽ ഇപ്പോൾ പൂർണമായും ഇസ്‌ലാമിക അന്തരീക്ഷമാണ്. 95% ബിസിനസ് ഉടമകളും, ടാക്‌സി ഡ്രൈവർമാരും, റിക്ഷാ ഡ്രൈവർമാരും, ചെറിയ കച്ചവടങ്ങൾ ചെയ്യുന്നവരും, കമ്മലുകൾ വിൽക്കുന്നവരും, പഞ്ചർ ഒട്ടിക്കുന്നവരും, പച്ചക്കറികളും പഴങ്ങളും വിൽക്കുന്നവരുമെല്ലാം… എല്ലാവരും മുസ്‌ലിംകളാണ്, ഇവിടെ എല്ലാവരും മുസ്‌ലിംകളാണ്!
ഇത് അവിശ്വസനീയമാണ്. കേരളത്തിൽ നടക്കുന്നത് അതീവ അപകടകരമായ കാര്യങ്ങളാണ്. കേന്ദ്ര സർക്കാർ ഇതിൽ ശ്രദ്ധിച്ചില്ലെങ്കിൽ കേരളം പൂർണമായും നഷ്ടപ്പെടും. കേരളം നമ്മുടെ കൈകളിൽ നിന്ന് പോയിക്കഴിഞ്ഞു. ഇവിടുത്തെ വലതുപക്ഷ ചിന്താഗതിക്കാർക്കും ഹിന്ദുക്കൾക്കും ഇവിടെ തുറന്നു സംസാരിക്കാൻ പോലും സാധിക്കുന്നില്ല”- തുടങ്ങിയ കാര്യങ്ങളാണ് ഇൻഫ്‌ളുവൻസർ വീഡിയോയിൽ പറയുന്നത്. വീഡിയോക്ക് താഴെ പിന്തുണയുമായി ബിജെപി നേതാവും നടനുമായ കൃഷ്ണകുമാറിന്റെ മകൾ ദിയ കൃഷ്ണ രംഗത്തെത്തി. ദുഃഖകരമായ യാഥാർഥ്യം എന്നാണ് ദിയ കൃഷ്ണയുടെ കമന്റ്.
