ആലപ്പുഴ: കാർത്തികപ്പള്ളിയിൽ രണ്ട് വയസ്സുകാരന്റെ മരണത്തിൽ ദുരൂഹത ആരോപിച്ച് നാട്ടുകാർ. മഹാദേവികാട് താമസിക്കുന്ന രാജേഷ്–താര ദമ്പതികളുടെ മകൻ രാഹുലാണ് ഇന്ന് രാവിലെ മരിച്ചത്. പാൽ തൊണ്ടയിൽ കുടുങ്ങിയാണ് കുഞ്ഞ് മരിച്ചതെന്നാണ് പിതാവ് രാജേഷിന്റെ മൊഴി. പോസ്റ്റ്മോർട്ടത്തിനുശേഷമേ മരണകാരണം വ്യക്തമാകൂവെന്ന് പോലീസ് അറിയിച്ചു.
ദമ്പതികളുടെ മറ്റൊരു കുഞ്ഞും ഏതാനും നാൾ മുമ്പ് മരിച്ചിരുന്നു. ഇവർക്ക് മറ്റ് നാല് കുഞ്ഞുങ്ങൾ കൂടിയുണ്ട്. താരയെ പ്രസവത്തിനായി ആശുപത്രിയിൽ പ്രവേശിപ്പിച്ചതിന് പിന്നാലെയാണ് രണ്ട് വയസ്സുകാരന്റെ മരണം സംഭവിച്ചത്.
കുഞ്ഞുങ്ങളെ ദമ്പതികൾ ശരിയായി പരിപാലിക്കുന്നില്ലെന്ന നാട്ടുകാരുടെ പരാതിയെ തുടർന്ന് അടുത്തിടെ ജനപ്രതിനിധികൾ ഇടപെട്ടിരുന്നു. തുടർന്ന് ദമ്പതികളെയും കുഞ്ഞുങ്ങളെയും പത്തനാപുരത്തെ സംരക്ഷണകേന്ദ്രത്തിലേക്ക് മാറ്റി. എന്നാൽ, അവിടെനിന്ന് സ്വന്തം ഇഷ്ടപ്രകാരം മടങ്ങിയെത്തിയ ദമ്പതികൾ വീണ്ടും വാടകവീട്ടിൽ താമസിക്കുകയായിരുന്നു.
ഇതിനിടെയുണ്ടായ കുഞ്ഞിന്റെ മരണമാണ് നാട്ടുകാരിൽ സംശയമുയർത്തിയത്. മരണത്തിൽ അസ്വാഭാവികതയുണ്ടോയെന്നും മരണകാരണം എന്താണെന്നും പോസ്റ്റ്മോർട്ടം റിപ്പോർട്ടിനും പോലീസ് അന്വേഷണത്തിനും ശേഷമേ വ്യക്തമാകൂ.
