തിരുവനന്തപുരം: വൻവിവാദത്തെ തുടർന്ന് ബേക്കറി വഴി 15 ശതമാനം വീര്യമുള്ള ഹോർട്ടിവൈൻ വില്പനയ്ക്ക് അനുമതി നൽകിയ എക്സൈസ് കമ്മിഷണറുടെ തീരുമാനം റദ്ദാക്കാൻ ഒരുങ്ങി സർക്കാർ. മുഖ്യമന്ത്രിയും എക്സൈസ് മന്ത്രിയും അറിയാതെ ബേക്കറിക്ക് ഹോർട്ടി വൈൻ വിൽക്കാൻ എക്സൈസ് കമ്മീഷണർ ലൈസൻസ് അനുവദിച്ചതിനാലാണ് നടപടി. സംഭവത്തിൽ എക്സൈസ് മന്ത്രിയും മുഖ്യമന്ത്രിയും അതൃപ്തി രേഖപ്പെടുത്തി. നികുതി സെക്രട്ടറിയോട് നിയമോപദേശം തേടാൻ മന്ത്രി നിർദ്ദേശം നൽകി. എക്സൈസ് കമ്മീഷണറെ തെറ്റിദ്ധരിപ്പിച്ചതെന്നാണ് വിലയിരുത്തൽ. അബ്കാരി ഡെപ്യൂട്ടി കമ്മീഷണറെ മാറ്റും. അബ്കാരി ആക്ടിൽ ഭേദഗതി വരുത്തിയതിൽ നിയമപദേശം തേടും.
സംഭവത്തിൽ എക്സൈസ് കമ്മീഷണറോട് എക്സൈസ് മന്ത്രി എം ലിജു അടിയന്തിരമായി റിപ്പോർട്ട് തേടിയിട്ടുണ്ട്. ബേക്കറികൾ വഴി ഹോർട്ടിവൈൻ വിൽക്കാനുള്ള ലൈസൻസ് നൽകിയത് സർക്കാർ അറിഞ്ഞിരുന്നില്ലെന്നാണ് വിവരം. ഇക്കാര്യത്തിൽ മന്ത്രിയും മുഖ്യമന്ത്രിയും അതൃപ്തി അറിയിച്ചു. നയപരമായ തീരുമാനം എടുക്കും മുൻപ് ആലോചന നടന്നില്ലെന്നാണ് ആക്ഷേപവും ഉയരുന്നത്. എന്നാൽ, നിയമപ്രകാരമാണ് നടപടിയെന്ന് എക്സൈസ് കമ്മീഷണറേറ്റ് അറിയിച്ചു. മുൻ സർക്കാരിൻറെ കാലത്ത് നൽകിയ അപേക്ഷയിലാണ് വിൽപനക്ക് അനുമതി നൽകിയത്. തീരുമാനത്തിൽ സർക്കാരിന് ആശങ്കയുണ്ടെന്നും ലിജു വ്യക്തമാക്കിയിരുന്നു. ഇതിന് പിന്നാലെയാണ് തീരുമാനം റദ്ദാക്കാനൊരുങ്ങുന്നത്.
