ചെന്നൈ: മൈലാപ്പൂരിലെ ഉയരപ്പാതയിലുള്ള റെയിൽവേ സ്റ്റേഷനിൽ ശുചിമുറി തേടിയ വീട്ടമ്മ, പ്ലാറ്റ്ഫോമിനു സമീപമുള്ള ഇരുട്ടു മുറിയിലെ ഗർത്തത്തിലൂടെ 60 അടിയോളം താഴേക്കു വീണു മരിച്ചു. നാലു ദിവസത്തിനു ശേഷമാണു മൃതദേഹം കണ്ടെത്തിയത്. മൈലാപ്പൂരിലെ മാസ് റാപിഡ് ട്രാൻസിറ്റ് സിസ്റ്റം (എംആർടിഎസ്) സ്റ്റേഷനിലുണ്ടായ സംഭവത്തിൽ പള്ളിക്കരണെ ബാലാജി നഗർ സ്വദേശി വി.വിജയയാണ് (55) മരിച്ചത്. ഓമന്തുരാർ ഗവ. ആശുപത്രിയിലേക്കു പോകാനായി മകളോടൊത്ത് വ്യാഴാഴ്ചയാണ് വിജയ വേളാച്ചേരിയിൽ നിന്ന് ട്രെയിൻ കയറിയത്.
യാത്രയ്ക്കിടെ വിജയക്ക് ശാരീരിക അസ്വസ്ഥത ഉണ്ടായതിനെ തുടർന്നു ഇരുവരും മൈലാപ്പൂർ സ്റ്റേഷനിൽ ഇറങ്ങുകയായിരുന്നു. ശുചിമുറിയിലേക്കു പോയ വിജയ മടങ്ങിയെത്താതായതോടെ പരിഭ്രാന്തയായ മകൾ പരിസരത്തെല്ലാം അന്വേഷിച്ചെങ്കിലും കണ്ടെത്താനായില്ല. തുടർന്ന് പൊലീസിൽ പരാതി നൽകി. വിജയയുടെ ഫോട്ടോ പതിച്ച പോസ്റ്ററുകൾ വിവിധയിടങ്ങളിൽ എംആർടിഎസ് റെയിൽവേ സ്റ്റേഷനു മുന്നിൽ വരെ പതിച്ച് ബന്ധുക്കൾ അന്വേഷണം നടത്തി.
ഇതിനിടെയാണ് സ്റ്റേഷൻ പരിസരത്ത് ദുർഗന്ധം അനുഭവപ്പെട്ടതും അഴുകിയ നിലയിൽ മൃതദേഹം കണ്ടെത്തിയതും. സംഭവത്തിനു ശേഷം അധികൃതർ ഈ മുറിയുടെ വാതിൽ താഴിട്ടു പൂട്ടി.
