ജിദ്ദ: സമൂഹത്തിൽ വിദ്വേഷവും അസഹിഷ്ണുതയും വർധിച്ചുവരുന്ന കാലഘട്ടത്തിൽ സത്യത്തിന്റെയും അഹിംസയുടെയും സഹിഷ്ണുതയുടെയും മാനവികതയുടെയും ഗാന്ധിയൻ സന്ദേശങ്ങൾക്ക് കൂടുതൽ പ്രസക്തിയുണ്ടെന്ന് ഗാന്ധി സ്മൃതി സദസ്സിൽ അഭിപ്രായപ്പെട്ടു. “എന്റെ ജീവിതമാണ് എന്റെ സന്ദേശം” എന്ന മഹാത്മാഗാന്ധിയുടെ വാക്കുകൾ പുതുതലമുറയ്ക്ക് ജീവിതമാതൃകയാക്കേണ്ടതിന്റെ ആവശ്യകതയും സദസ്സ് ചൂണ്ടിക്കാട്ടി. ഗാന്ധി ജയന്തി ദിനമായ ഒക്ടോബർ 2ന് ഷറഫിയ സഫയർ ഓഡിറ്റോറിയത്തിൽ ഒ.ഐ.സി.സി മലപ്പുറം ജില്ലാ കമ്മിറ്റി സംഘടിപ്പിച്ച ഗാന്ധി സ്മൃതി സദസ്സിലാണ് ഗാന്ധിയൻ ദർശനങ്ങളുടെ സമകാലിക പ്രസക്തി ചർച്ചയായത്. സത്യവും അഹിംസയും മാനവികതയും പുതുതലമുറ ഏറ്റെടുക്കണമെന്ന് സക്കീർ ഹുസ്സൈൻ എടവണ്ണ പറഞ്ഞു. ഗാന്ധി സ്മൃതി സദസ്സ് ഉത്ഘാടനം ചെയ്ത് സംസാരിക്കുകയായിരുന്നു അദ്ദേഹം.
അധികാരത്തിന്റെയും ആൾക്കൂട്ടത്തിന്റെയും സമ്മർദ്ദങ്ങൾക്ക് മുന്നിൽ സത്യത്തിന്റെ പക്ഷത്ത് ഉറച്ചുനിന്ന ഗാന്ധിജിയുടെ ജീവിതം ഓരോ തലമുറയ്ക്കും വലിയൊരു പാഠമാണെന്ന് ചടങ്ങിൽ സംസാരിച്ചവർ അഭിപ്രായപ്പെട്ടു. വ്യത്യസ്ത ആശയങ്ങളെയും വിശ്വാസങ്ങളെയും ബഹുമാനിക്കുകയും മനുഷ്യനെ മനുഷ്യനായി കാണുകയും ചെയ്യുന്ന സംസ്കാരം വളർത്തിയെടുക്കുന്നതിൽ ഗാന്ധിയൻ ചിന്തകൾക്ക് നിർണായക പങ്കുണ്ടെന്നും അവർ പറഞ്ഞു. കാലം മാറിയാലും സത്യം, അഹിംസ, സമാധാനം, സഹിഷ്ണുത, മാനവികത തുടങ്ങിയ മൂല്യങ്ങളുടെ പ്രസക്തി നഷ്ടപ്പെടുന്നില്ലെന്നും, സമൂഹത്തെ വിഭജിക്കുന്ന പ്രവണതകൾ ശക്തമാകുന്ന സാഹചര്യത്തിൽ ഗാന്ധിജിയുടെ ജീവിതവും സന്ദേശങ്ങളും കൂടുതൽ ഗൗരവത്തോടെ പുതുതലമുറയിലേക്ക് എത്തിക്കേണ്ടത് കാലഘട്ടത്തിന്റെ ആവശ്യമാണെന്നും സദസ്സ് വിലയിരുത്തി.
ഒ.ഐ.സി.സി മലപ്പുറം ജില്ലാ പ്രസിഡന്റ് സൈഫു വാഴയിൽ അധ്യക്ഷത വഹിച്ച ചടങ്ങ് മുൻ റീജിയണൽ കമ്മിറ്റി സെക്രട്ടറി സക്കീർ ഹുസൈൻ എടവണ്ണ ഉദ്ഘാടനം ചെയ്തു. നാസർ സൈൻ തൃശ്ശൂർ ഗാന്ധിയൻ ദർശനങ്ങളെക്കുറിച്ച് മുഖ്യപ്രഭാഷണം നടത്തി. ജിദ്ദ റീജിയണൽ കമ്മിറ്റി സെക്രട്ടറി പ്രിൻസാദ് പറായി, കണ്ണൂർ ജില്ലാ പ്രസിഡന്റ് റഫീഖ് മൂസ, പാലക്കാട് ജില്ലാ വൈസ് പ്രസിഡന്റ് ശറഫുദ്ധീൻ, മുജീബ് മൂത്തേടത്ത്, കമാൽ കളപ്പാടൻ, സിദ്ദിഖ് പുല്ലങ്കോട് എന്നിവർ സംസാരിച്ചു. ഗാന്ധിജിയുടെ ജീവിതവും സന്ദേശങ്ങളും ഓർമയിൽ പുതുക്കിയ സദസ്സ്, സത്യത്തിന്റെയും സമാധാനത്തിന്റെയും അഹിംസയുടെയും മാനവികതയുടെയും വഴിയിലൂടെ സമൂഹത്തെ മുന്നോട്ട് നയിക്കാനുള്ള പ്രതിജ്ഞയോടെ സമാപിച്ചു. യു.എം. ഹുസൈൻ മലപ്പുറം സ്വാഗതവും ഫൈസൽ മക്കരപ്പറമ്പ നന്ദിയും പറഞ്ഞു.
Related Post
