തിരുവനന്തപുരം: സിഎംആർഎൽ ഡയറി വിവാദത്തിൽ വി. മുരളീധരൻ എംഎൽഎയെ പിന്തുണച്ച് ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ. എക്സാലോജിക് ഇടപാടിൽനിന്ന് ശ്രദ്ധ തിരിക്കാനാണ് മുരളീധരനെ ലക്ഷ്യമിടുന്നതെന്നും പാർട്ടി മുരളീധരന് ഒപ്പമാണെന്നും അദ്ദേഹം സാമൂഹിക മാധ്യമത്തിൽ പങ്കുവെച്ച കുറിപ്പിൽ വ്യക്തമാക്കി. മാസപ്പടി കേസിൽ സിഎംആർഎൽ എംഡി ശശിധരൻ കർത്തയുടെ ഡയറി ബിജെപി സംസ്ഥാന വൈസ് പ്രസിഡന്റ് ഷോൺ ജോർജ് പുറത്തുവിട്ടതിനെച്ചൊല്ലി പാർട്ടിക്കുള്ളിൽ കടുത്ത അമർഷം ഉയർന്നിരുന്നു. ഇതിന് പിന്നാലെയാണ് സംസ്ഥാന അധ്യക്ഷന്റെ വിശദീകരണം. പാർട്ടിക്കാരുടെ പേരുണ്ടെങ്കിൽ എഫ്ഐആർ രജിസ്റ്റർ ചെയ്ത് അന്വേഷിക്കട്ടെയെന്നായിരുന്നു ഇന്നലെ രാജീവ് ചന്ദ്രശേഖർ പറഞ്ഞത്.
ഫേസ്ബുക്ക് കുറിപ്പിൻ്റെ പൂർണരൂപം
എക്സലോജിക് തട്ടിപ്പും പിണറായി വിജയനും മുഹമ്മദ് റിയാസിനും എതിരായ ആരോപണങ്ങളും അഴിമതി നിരോധന നിയമത്തിലെ സെക്ഷൻ 13-ന്റെ വ്യക്തവും നഗ്നവുമായ ലംഘനമാണ്. സർക്കാരിൽ അഴിമതി കാണിക്കുന്നവർക്ക് ശിക്ഷാനടപടികൾ ഉറപ്പാക്കാൻ വേണ്ടിയാണ് അഴിമതി നിരോധന നിയമം ഇന്ത്യൻ നിയമവ്യവസ്ഥയുടെ ഭാഗമായി നിലനിൽക്കുന്നത്. സെക്ഷൻ 13 പ്രകാരം 10 വർഷത്തിലധികം തടവ് ശിക്ഷ ലഭിക്കാവുന്നതിനാൽ, ബിഎൻഎസ്എസ് (BNSS) 173(3) വകുപ്പ് പ്രകാരം പ്രാഥമിക അന്വേഷണം ആവശ്യമില്ലെന്നും ഉടൻ എഫ്ഐആർ രജിസ്റ്റർ ചെയ്യണമെന്നും വ്യക്തമായി പറയുന്നു. എന്നിട്ടും, എൻഫോർസ്മെന്റ് ഡയറക്ടറേറ്റിന്റെ നിയമപരമായ വെളിപ്പെടുത്തലിൽ ഇടപെടാൻ ഒരു അധികാരവുമില്ലാത്ത സംസ്ഥാന ആഭ്യന്തര വകുപ്പ് , ഒരു എസ്ഐടി (SIT) രൂപീകരിക്കാൻ ഇടപെട്ടു.
Related Post
അഴിമതി രഹിതമായ ഭരണം നമ്മുടേത് പോലുള്ള ഒരു ജനാധിപത്യത്തിൽ ഓരോ പൗരന്റെയും അവകാശമാണ്. അതിനാൽ, എക്സലോജിക് കേസിൽ എഫ്ഐആർ ഫയൽ ചെയ്യാനും പ്രോസിക്യൂഷൻ നടപടികൾ സ്വീകരിക്കാനും വ്യക്തമായ നിയമപരമായ ബാധ്യതയുള്ളപ്പോൾ, മുഖ്യമന്ത്രി വിഡി സതീശൻ അത് ചെയ്യാത്തത് എന്തുകൊണ്ട്?
ഇത് ന്യായമായ ചോദ്യമാണ്. കാരണം, മുതിർന്ന കോൺഗ്രസ്/മുസ്ലിം ലീഗ് നേതാക്കളും ഈ കേസിൽ ഉൾപ്പെട്ടിട്ടുണ്ട് എന്നതാണ് ഉത്തരം. കോൺഗ്രസും സിപിഎമ്മും തമ്മിലുള്ള ഒത്തുകളിയുടെ വ്യക്തമായ ഉദാഹരണമാണിത്. അവർ “രണ്ടല്ല, ഒന്നാണ്”.
നമ്മുടെ മുതിർന്ന നേതാവ് വി മുരളീധരനെ ലക്ഷ്യമിടുകയും അദ്ദേഹത്തിന്റെ പേര് ഈ ചർച്ചയിലേക്ക് വലിച്ചിടുകയും ചെയ്യുന്നത്, എക്സലോജിക് തട്ടിപ്പിൽ നിന്ന് ജനങ്ങളുടെ ശ്രദ്ധ തിരിച്ചുവിടാൻ സിപിഎമ്മും കോൺഗ്രസും ചേർന്ന് നടത്തുന്ന ബോധപൂർവമായ ശ്രമമാണ്. ആ സമയത്ത് വി. മുരളീധരൻ മന്ത്രിയോ എംപിയോ എംഎൽഎയോ ആയിരുന്നില്ല. ഇപ്പോൾ പുറത്തുവന്നിരിക്കുന്ന റിപ്പോർട്ടുകൾ അദ്ദേഹം തന്നെ നിഷേധിച്ചിട്ടുമുണ്ട്. ഞാൻ വ്യക്തമായി പറയട്ടെ – മുരളീധരൻ ജിക്കൊപ്പമാണ് നമ്മുടെ പാർട്ടി. അദ്ദേഹത്തെ ലക്ഷ്യമിടുന്നത്, എക്സലോജിക് കേസിൽ നിന്ന് ശ്രദ്ധ തിരിക്കാനുള്ള ബോധപൂർവമായ നീക്കമാണെന്ന് വ്യക്തമാണ്.