ന്യൂഡൽഹി: യുഡിഎഫിലേക്ക് ക്ഷണിച്ച് കൊണ്ടുള്ള മുസ്‌ലിം ലീഗിന്റെ പ്രസ്താവനകളെ പൂർണമായി തള്ളി സിപിഐ. മുസ്‌ലിം ലീഗ് അവരുടെ സ്വന്തം കാര്യങ്ങൾ നോക്കിയാൽ മതിയെന്നും, ഇടതുമുന്നണിയുടെ കാര്യങ്ങൾ തീരുമാനിക്കാൻ എൽഡിഎഫിന് അറിയാമെന്നും സിപിഐ നേതാക്കൾ പ്രതികരിച്ചു. സിപിഐ സംസ്ഥാന സെക്രട്ടറി ബിനോയ് വിശ്വവും രാജ്യസഭാ എംപി പി. സന്തോഷ് കുമാറുമാണ് ലീഗിന്റെ ക്ഷണത്തോട് പ്രതികരണവുമായി രംഗത്തെത്തിയത്. മുസ്‌ലിം ലീഗിന് എന്തുവേണമെങ്കിലും പറയാമെന്നും എന്നാൽ ഇക്കാര്യത്തിൽ തീരുമാനം എടുക്കേണ്ടത് സിപിഐ ആണെന്നും ബിനോയ് വിശ്വം വ്യക്തമാക്കി.
എൽഡിഎഫ് രൂപീകരിച്ച പാർട്ടിയാണ് സിപിഐ. അതുകൊണ്ടുതന്നെ ഈ പാർട്ടിക്ക് എൽഡിഎഫ് വളരെ പ്രധാനപ്പെട്ട ഒന്നാണ്. ഇടതുപക്ഷ മുന്നണിയുടെ ഐക്യത്തെയും അടിത്തറയെയും ശിഥിലമാക്കുന്ന യാതൊന്നും സിപിഐയുടെ ഭാഗത്തുനിന്ന് ഉണ്ടാകില്ലെന്നും അദ്ദേഹം ഉറപ്പിച്ചു പറഞ്ഞു. ഇടതുമുന്നണിയിലെ വിഷയങ്ങളിൽ ലീഗ് എന്തിനാണ് വേവലാതിപ്പെടുന്നതെന്ന് പി. സന്തോഷ് കുമാർ എംപി ചോദിച്ചു. ഇടതുമുന്നണിയുടെ കാര്യം തീരുമാനിക്കാൻ മുന്നണിക്ക് തന്നെ അറിയാമെന്നും, ലീഗ് ലീഗിന്റെ കാര്യം തീരുമാനിച്ചു പോകുന്നതാണ് നല്ലതെന്നും അദ്ദേഹം കൂട്ടിച്ചേർത്തു.
ഉപനേതൃ പദവിയെ സംബന്ധിച്ച് നിരന്തരം ചർച്ച ചെയ്യേണ്ട കാര്യമില്ലെന്ന് സിപിഐ നേതാക്കൾ വ്യക്തമാക്കി. ഈ വിഷയത്തിൽ പറയാനുള്ളതെല്ലാം നേരത്തെ തന്നെ പ്രതികരിച്ചു കഴിഞ്ഞതാണ്. സിപിഐയുടെ ഈ നിലപാടുകൾ ലീഗിനും മനസിലാകുമെന്ന് ബിനോയ് വിശ്വം സൂചിപ്പിച്ചു.
