തിരുവനന്തപുരം: ആരോഗ്യവകുപ്പ് ഡയറക്ടർ സ്ഥാനത്ത് നിന്ന് ഡോ. കെ.ജെ. റീനയെ മാറ്റിയ സംസ്ഥാന സർക്കാർ ഉത്തരവ് അഡ്മിനിസ്ട്രേറ്റീവ് ട്രൈബ്യൂണൽ സ്റ്റേ ചെയ്തു. സർക്കാർ നടപടി ചോദ്യം ചെയ്ത് ഡോ. റീന നൽകിയ ഹർജിയിലാണ് ട്രൈബ്യൂണലിന്റെ ഇടപെടൽ.
ആരോഗ്യവകുപ്പുമായി സഹകരിക്കാത്തതിനാലാണ് ഡയറക്ടർ സ്ഥാനത്ത് നിന്ന് മാറ്റിയതെന്ന് ആരോഗ്യ മന്ത്രി കെ. മുരളീധരൻ പറഞ്ഞിരുന്നു. തുടർന്ന് ഡോ. കെ.ജെ. റീനയെ എറണാകുളം പബ്ലിക് ഹെൽത്ത് ലബോറട്ടറി ഡയറക്ടറായി മാറ്റി നിയമിക്കുകയും, ആരോഗ്യവകുപ്പ് ഡയറക്ടർ ചുമതല അഡീഷണൽ (ഫാമിലി വെൽഫെയർ) ഡയറക്ടർ ഡോ. വി. മീനാക്ഷിക്ക് നൽകുകയും ചെയ്തിരുന്നു.
പകർച്ചവ്യാധി കാലത്ത് അവധിക്ക് അപേക്ഷിച്ചെന്നതടക്കമുള്ള കാരണങ്ങൾ ചൂണ്ടിക്കാട്ടിയാണ് മാറ്റമെന്നാണ് സർക്കാർ വിശദീകരണം. എന്നാൽ നടപടി നിയമപരമായ നടപടിക്രമങ്ങൾ പാലിച്ചല്ലെന്നും, താൻ അവധിക്ക് അപേക്ഷിച്ചിട്ടില്ലെന്നും ഡോ. റീന ട്രൈബ്യൂണലിൽ വാദിച്ചു.
Related Post
ഇരു വാദങ്ങളും പരിഗണിച്ച ട്രൈബ്യൂണൽ സർക്കാർ ഉത്തരവ് താൽക്കാലികമായി സ്റ്റേ ചെയ്യുകയായിരുന്നു. ഇതോടെ വിഷയത്തിൽ അന്തിമ തീരുമാനം വരുന്നത് വരെ നിലവിലെ സ്ഥിതി തുടരാനാണ് സാധ്യത.
