കണ്ണൂർ: കണ്ണൂരിൽ ട്രാഫിക് ഡ്യൂട്ടിക്കിടെ അമിത വേഗത്തിലെത്തിയ കാർ തടയാൻ ശ്രമിക്കുന്നതിനിടെ കാർ ഇടിച്ചു കയറ്റി എസ്ഐയ്ക്ക് പരുക്ക്. വളപട്ടണം എസ്ഐ ടിഎം വിപിനാണ് അപകടത്തിൽ പരുക്കേറ്റത്. സംഭവത്തിൽ കണ്ണൂർ മാടായി സ്വദേശി ഫായിസ്, മാട്ടൂൽ സ്വദേശി നിയാസ് എന്നിവർ പിടിയിലായി. ഇന്നലെ രാത്രിയാണ് സംഭവം.
അമിത വേഗത്തിലെത്തിയ കാർ എസ്ഐയെ ഇടിച്ച് ബോണറ്റിൽ കയറ്റി, പിന്നാലെ ഒരു ഓട്ടോയിലും മതിലിലും ഇടിച്ചു കൊണ്ടാണ് നിന്നത്. വളപട്ടണം പാലത്തിന് സമീപം അപകടകരമായ രീതിയിൽ കാർ ഓടിച്ചുവന്നിരുന്ന യുവാക്കളെ പോലീസ് തടയാൻ ശ്രമിക്കുകയായിരുന്നു. ഇതിനിടെ കാർ നിർത്താതെ എസ്ഐയെ ഇടിക്കുകയായിരുന്നു. പരുക്കേറ്റ പൊലീസ് ഉദ്യോഗസ്ഥൻ തലനാരിഴയ്ക്കാണ് രക്ഷപ്പെട്ടത്. അറസ്റ്റിലായ യുവാക്കൾക്ക് ലൈസൻസ് ഉണ്ടായിരുന്നില്ലെന്ന് പരിശോധനയിൽ കണ്ടെത്തി. ഇരുവരേയും കോടതിയിൽ ഹാജരാക്കി റിമാൻ്റ് ചെയ്തു.
