തിരുവനന്തപുരം: വൈദ്യുതി മന്ത്രിക്ക് മുന്നിൽ അനർട്ട് അഴിമതിയുമായി ബന്ധപ്പെട്ട് ചോദ്യങ്ങളുമായി രമേശ് ചെന്നിത്തല. താൻ അഴിമതി കാണിച്ചിട്ടില്ലെന്നും ഞാൻ ഉന്നയിച്ച പ്രശ്നങ്ങൾ ഒക്കെ ഞാനുമായി ചർച്ച ചെയ്തു പരിഹരിക്കാമെന്നും വൈദ്യുത മന്ത്രി കൃഷ്ണൻകുട്ടി മാധ്യമങ്ങളോട് പറഞ്ഞതായി കണ്ടെന്ന് പറഞ്ഞ ചെന്നിത്തല ഇത് ഞങ്ങൾ തമ്മിലുള്ള സ്വകാര്യ അതിർത്തിതർക്കമോ പിണക്കമോ ആയിരുന്നെങ്കിൽ തീർച്ചയായും ഞങ്ങൾക്ക് സ്വകാര്യമായി ചർച്ച ചെയ്തു പരിഹാരം കാണാമായിരുന്നു. പക്ഷേ നിർഭാഗ്യവശാൽ ഇത് ജനങ്ങളുടെ നികുതിപ്പണത്തിന്റെ പ്രശ്നവും അഴിമതിയും ആണ്. അത് രണ്ടു പേർ തമ്മിൽ ചർച്ച ചെയ്തു പരിഹരിക്കണ്ട വിഷയമല്ല. പൊതു ജനസമക്ഷം തന്നെ ചോദ്യോത്തരങ്ങൾ ഉണ്ടാവേണ്ടതും കണക്കുകളും തെളിവുകളും പൊതുജനങ്ങൾക്കു മുമ്പാകെ വക്കേണ്ടതുമാണെന്നും അദ്ദേഹം പറഞ്ഞു.
അതു കൊണ്ടു തന്നെ മന്ത്രിയുടെ ചർച്ച എന്ന ആവശ്യത്തെ ചെറിയ ഭേദഗതിയോടെ താൻ സ്വീകരിക്കുന്നു. ചർച്ച പൊതുജനസമക്ഷമാകണം. അതിന്റെ ഭാഗമായി ഞാൻ വൈദ്യുത മന്ത്രി ശ്രീമാൻ കൃഷ്ണൻകുട്ടിയോട് ഏതാനും ചോദ്യങ്ങൾ പരസ്യമായി തന്നെ ചോദിക്കുകയാണ്. അദ്ദേഹം അതിന് പരസ്യമായി മറുപടി പറയട്ടെ. അതിനു ശേഷം ബാക്കിയുള്ള ചോദ്യങ്ങൾ കൂടി ചോദിക്കാം.
ചോദ്യം ഒന്ന്
Related Post
അഞ്ചു കോടി രൂപ വരെ മാത്രം ടെൻഡർ വിളിക്കാൻ അർഹതയുള്ള അനെർട്ട് സിഇഒ 240 കോടി രൂപയുടെ ടെൻഡർ വിളിച്ചത് മന്ത്രി അറിഞ്ഞിരുന്നോ..? ഇതിന് മന്ത്രിയുടെയോ വകുപ്പിന്റെയോ പ്രത്യേകാനുമതി വാങ്ങിയിരുന്നോ..? ഇല്ലെങ്കിൽ എന്തുകൊണ്ടു നടപടിയെടുത്തില്ല.?
ചോദ്യം രണ്ട്
240 കോടി രൂപയുടെ ആദ്യത്തെ ടെൻഡർ റദ്ദാക്കിയ വിവരം വകുപ്പിനെ അറിയിച്ചിരുന്നോ..?
ആദ്യത്തെ ബിഡ്ഡിങ്ങിൽ ഏറ്റവും കുറഞ്ഞ നിരക്ക് രേഖപ്പെടുത്തി സെലക്ട് ചെയ്യപ്പെട്ട കമ്പനി പിൻമാറുന്നുവെന്നു കാണിച്ച് മെയിൽ അയച്ചുവെന്നാണ് സിഇഒ പറയുന്നത്. ഈ മെയിൽ വകുപ്പിന് സമർപ്പിച്ചിട്ടുണ്ടോ?
ചോദ്യം മൂന്ന്.
ഗ്രേഡിങ് റേറ്റ് അനുസരിച്ചാണ് കമ്പനികൾക്ക് അനുവദിക്കുന്ന ഓരോ പവർ പ്ളാന്റിന്റെയും പരമാവധി ശേഷി നിശ്ചയിക്കുന്നത് എന്നായിരുന്നു ടെൻഡർ വ്യവസ്ഥ. എന്നാൽ ഈ വ്യവസ്ഥ ലംഘിച്ച് എല്ലാ കമ്പനികൾക്കും എല്ലാ ശേഷിയിലുമുള്ള പവർ പ്ളാന്റുകൾ സ്ഥാപിക്കാൻ ഓർഡർ നൽകിയത് ആരുടെ നിർദേശപ്രകാരമായിരുന്നു?
ചോദ്യം നാല്
ടെൻഡറിൽ സമർപ്പിച്ച തുകയേക്കാൾ കൂടുതൽ തുകയ്ക്ക് പല കമ്പനികൾക്കും ഓർഡർ നൽകിയിട്ടുണ്ട്. ടെണ്ടർ ഓപ്പൺ ചെയ്ത ശേഷം തിരുത്തിയിട്ടുമുണ്ട് ടെണ്ടർ വ്യവസ്ഥകൾ പാലിക്കാത്തവർക്കും ഓർഡർ നൽകിയിട്ടുണ്ട്. . ഇത് ടെൻഡർ വ്യവസ്ഥകളുടെ നഗ്നമായ ലംഘനം അല്ലേ…?
ചോദ്യം അഞ്ച്
സംസ്ഥാനത്ത് സോളാർ പ്ലാൻ്റുകൾക്ക് അടിസ്ഥാന വില നിശ്ചയിക്കുന്നതിന് 2021 ൽ അനർട്ട് എക്സിക്യൂട്ടിവ് കമ്മിറ്റി എടുത്ത തീരുമാനം ഇതുവരെ നടപ്പാക്കാത്തത് എന്തു കൊണ്ട് ?
ചോദ്യം ആറ്
കേന്ദ്രസർക്കാരിൽ നിന്ന് ഈ പദ്ധതിക്ക് സബ്സിഡി അഡ്വാൻസ് ഇനത്തിൽ കിട്ടിയ പണത്തിൽ നിന്ന് എത്ര രൂപ ചെലവഴിച്ചു? എത്ര തുക കേന്ദ്രസർക്കാർ തിരികെ വാങ്ങി..? എന്തു കൊണ്ടാണ് കിട്ടിയ പൈസ ചെലവഴിക്കാൻ കഴിയാതിരുന്നത്…?
ചോദ്യം ഏഴ്
ടെൻഡറിൽ കമ്പനികൾ രേഖപ്പെടുത്തിയ നിരക്കുകൾ കുറയ്ക്കാൻ വേണ്ടി സ്വീകരിച്ച നടപടികൾ എന്തെല്ലാമായിരുന്നു. ഓരോയിനത്തിലും എത്ര വീതം തുക കുറവ് വരുത്താൻ സാധിച്ചു. വിശദാംശങ്ങൾ പുറത്തു വിടാമോ… ?
ചോദ്യം എട്ട്
അനർട്ടിൽ ഇ ടെണ്ടർ ക്രിയേറ്റർ, ഓപ്പണർ ചുമതലകൾ ഉണ്ടായിരിക്കെ രാജിവെച്ച് EY യിൽ ചേർന്ന താൽക്കാലിക ജീവനക്കാരനെ ടെൻഡറുകൾ സഹായിക്കാനുള്ള ചുമതലകൾ നൽകണമെന്ന് സിഇ.ഒ ആവശ്യപ്പെട്ടിരുന്നോ? അനർട്ടിൽ കഴിഞ്ഞ മൂന്നു വർഷത്തിൽ വിവിധ കൺസൾട്ടൻസികളെ നിയമിക്കാൻ നൽകിയ ഉത്തരവിന്റെയും അവർക്ക് വേണ്ടി ചെലവഴിച്ച തുകയുടെയും വിശദാംശങ്ങൾ ലഭ്യമാക്കാമോ?
ചോദ്യം ഒമ്പത്
മന്ത്രിയുടെ കൈകൾ ശുദ്ധമാണെങ്കിൽ അനർട്ടിന്റെ കഴിഞ്ഞ അഞ്ചു വർഷത്തെ മുഴുവൻ ഇടപാടുകളും ഫോറൻസിക് ഓഡിറ്റിന് വിധേയമാക്കാൻ ധൈര്യമുണ്ടോ..? അങ്ങനെയെങ്കിൽ ഫോറൻസിക് ഓഡിറ്റിങ്ങിന് ഉള്ള ഉത്തരവ് പുറപ്പെടുവിക്കാമോ..?
മന്ത്രിയെ ഈ ഒമ്പതു ചോദ്യങ്ങൾക്ക് വിശദമായ മറുപടി പറയാൻ ക്ഷണിക്കുന്നു. അദ്ദേഹത്തിന് പരസ്യമായി പൊതുജനസമക്ഷം തന്നെ മറുപടി പറയാവുന്നതും പൊതുജനങ്ങൾ കൂടി അറിഞ്ഞിരിക്കേണ്ടതുമായ വസ്തുതകളാണിവ.
അദ്ദേഹം ഇന്നു തന്നെ ഈ ചോദ്യങ്ങളിൽ മറുപടി പറയുമെന്നു പ്രതീക്ഷിക്കുന്നുവെന്നും ചെന്നിത്തല പറഞ്ഞു.
