കടുത്തുരുത്തി: മദ്യലഹരിയിൽ കാറോടിച്ച് നടുറോട്ടിൽ യുവാവിന്റെ പരാക്രമം. മോൻസ് ജോസഫ് എംഎൽഎ അപകടത്തിൽനിന്നു രക്ഷപ്പെട്ടത് തലനാരിഴയ്ക്ക്. ഇന്നലെ രാവിലെ അറുനൂറ്റിമംഗലത്തായിരുന്നു സംഭവം. മുളക്കുളം ഭാഗത്തുനിന്ന് അമിതവേഗത്തിൽ എത്തിയ കാർ റോഡരികിൽ നാട്ടുകാരുമായി സംസാരിച്ചു നിൽക്കുകയായിരുന്ന മോൻസ് ജോസഫ് എംഎൽഎയുടെ നേരെ പാഞ്ഞടുക്കുകയായിരുന്നു. ഉടനെ എംഎൽഎയ്ക്കു സമീപത്തുനിന്ന നാട്ടുകാരിൽ ചിലർ എംഎൽഎയെ പിടിച്ചുമാറ്റിയതിനാൽ അപകടം ഒഴിവായി.
അതേ സമയം നിർത്താതെ മുന്നോട്ടെടുത്ത കാറിന്റെ മുൻവശം റോഡിൽ ഇറക്കിയിട്ടിരുന്ന മണ്ണിൽ ഇടിച്ചുനിന്നു. ഇവിടെ നിന്നും പിന്നോട്ടെടുത്ത കാർ നാട്ടുകാരായ രണ്ടുപേരുടെ ദേഹത്തും തട്ടി. നാട്ടുകാർ കാർ തടഞ്ഞ് ഡോർ തുറന്നതോടെ ഡ്രൈവറായ യുവാവ് മദ്യലഹരിയിലാണെന്നു മനസിലായി. അതേസമയം നാട്ടുകാരിൽ പലർക്കും പരിചയമുള്ള ആളായിരുന്നു മദ്യ ലഹരിയിലായിരുന്ന യുവാവ്. സംഭവത്തിൽ പരാതിയില്ലെന്ന് എംഎൽഎ പറഞ്ഞു. വെള്ളൂർ പോലീസും സംഭവ സ്ഥലത്ത് എത്തിയിരുന്നു. അറുനൂറ്റിമംഗലത്തായിരുന്നു സംഭവം
Related Post
