മയക്കുമരുന്ന് കേസിൽ നടിയും മോഡലുമായ സോണിയ അഗർവാൾ അറസ്റ്റിലായ കേസിൽ തന്റെ പേരും ചിത്രങ്ങളും വലിച്ചിഴച്ചതിനെതിരേ പ്രതിഷേധവുമായി തെന്നിന്ത്യൻ താരം സോണിയ അഗർവാൾ രംഗത്ത്. മോഡലിന്റെ ചിത്രങ്ങൾക്ക് പകരം നടി സോണിയ അഗർവാളിന്റെ ചിത്രങ്ങളും വിവരങ്ങളുമാണ് പല മാധ്യമങ്ങളും വാർത്തകളിൽ ഉപയോഗിച്ചത്. ഇതിനെതിരേയാണ് താരം രംഗത്ത് വന്നിരിക്കുന്നത്.
വാർത്ത പ്രചരിച്ചതിന് പിന്നാലെ നേരിടേണ്ടി വന്ന മാനനഷ്ടത്തിനും നിരന്തരമുള്ള കോളുകളോട് പ്രതികരിക്കുകയും ചോദ്യങ്ങൾ നേരിടേണ്ടി വരികയും ചെയ്തതിനും താനും തന്റെ കുടുംബവും നേരിട്ട മാനസിക സംഘർഷത്തിനും തന്റെ പേരിൽ വ്യാജ വാർത്ത പ്രചരിപ്പിച്ച മാധ്യമങ്ങൾക്കെതിരേ ശക്തമായ നിയമനടപടിയുമായി മുന്നോട്ട് പോകുമെന്ന് സോണിയ ട്വീറ്റ് ചെയ്തു. നിലവിൽ കേരളത്തിൽ ദ്വിഭാഷാ ചിത്രത്തിന്റെ ചിത്രീകരണ തിരക്കുകളിലാണ് താനെന്നും യാതരു വിധ അന്വേഷണങ്ങളും കൂടാതെ തന്റെ പേരിൽ ഇത്തരം വ്യാജവാർത്തകൾ പ്രചരിപ്പിച്ചവരെ നിയമപരമായി തന്നെ നേരിടുമെന്നും സോണിയ വ്യക്തമാക്കി.
ഷിജിൻ ലാൽ സംവിധാനം ചെയ്യുന്ന തമിഴ് മലയാളം ദ്വിഭാഷാ ഹൊറർ ചിത്രം ഗ്രാൻഡ്മായുടെ ചിത്രീകരണത്തിരക്കുകളുമായി തിരുവനന്തപുരത്താണ് താരം ഇപ്പോൾ ഉള്ളത്.
