കൊച്ചി:’എല്‍സമ്മ എന്ന ആണ്‍കുട്ടി’, ‘പുള്ളിപ്പുലികളും ആട്ടിന്‍കുട്ടിയും’ എന്നീ ചിത്രങ്ങള്‍ക്കു ശേഷം സംവിധായകന്‍ ലാല്‍ ജോസും കുഞ്ചാക്കോ ബോബനും വീണ്ടും ഒന്നിക്കുന്നു. മോഹന്‍ലാല്‍ നായകനായ ‘വെളിപാടിന്റെ പുസ്തകം’ എന്ന തന്റെ അവസാന ചിത്രത്തിന് ശേഷം ഒരു വര്‍ഷത്തെ ഇടവേള കഴിഞ്ഞാണ് ലാല്‍ ജോസ് പുതിയ ചിത്രത്തിനായി ഒരുങ്ങുന്നത്. ‘എല്‍സമ്മ’യ്ക്കും, ‘പുള്ളിപ്പുലി’ക്കും വേണ്ടി തിരക്കഥ ഒരുക്കിയ എം സിന്ധുരാജ് തന്നെയാണ് പുതിയ ചിത്രത്തിനും തിരക്കഥ ഒരുക്കുന്നത്.
ഹാസ്യത്തിന് മുന്‍തൂക്കം നല്‍കിയായിരിക്കും പുതിയ ചിത്രവും ഒരുക്കുക. ഷെബിന്‍ ബെക്കര്‍ പ്രൊഡക്ഷന്‍സിന്റെ ബാനറില്‍ ഷെബിന്‍ ബെക്കര്‍ നിര്‍മ്മിക്കുന്ന ചിത്രം എല്‍ജെ ഫിലിംസ് പ്രദര്‍ശനത്തിന് എത്തിക്കുന്നു.
ചിത്രത്തിലെ മറ്റ് കഥാപാത്രങ്ങളെ കുറിച്ചുള്ള വിവരങ്ങളൊന്നും അണിയറ പ്രവര്‍ത്തകര്‍ ഇതുവരെ പുറത്തുവിട്ടില്ല. ചിത്രത്തിലെ നായിക ഒരു പുതുമുഖമായിരിക്കുമെന്നാണ് വിവരം. ക്രിസ്തുമസ് റിലീസായാണ് ചിത്രം തിയേറ്ററുകളിലെത്തുക.
