മുംബൈ: നടൻ ടൈഗർ ഷ്രോഫിന്റെ കാറിന് നേരെ വെടിവെച്ച സംഭവത്തിൽ രണ്ടു യുവതികൾ ഉൾപ്പെടെ നാലു പേരെ കൂടി അറസ്റ്റ് ചെയ്ത് ഡൽഹി പോലീസിന്റെ സ്പെഷ്യൽ സെൽ. നടനെ ആക്രമിച്ച പ്രതികൾക്ക് ആയുധങ്ങൾ എത്തിച്ചുനൽകിയ സംഘത്തിലെ അംഗങ്ങളാണ് അറസ്റ്റിലായതെന്നാണ് അന്വേഷണ ഉദ്യോഗസ്ഥരെ ഉദ്ധരിച്ചുള്ള റിപ്പോർട്ടുകൾ. ലോറൻസ് ബിഷ്‌ണോയ് സംഘവുമായി ബന്ധമുള്ളവരാണ് ഇവരെന്നും സംശയിക്കുന്നു. ഞായറാഴ്ച വൈകിട്ട് നടന്റെ കാറിന് നേരെ വെടിയുതിർത്ത സംഭവത്തിലാണ് അന്വേഷണം പുരോഗമിക്കുന്നത്.
കുനാൽ, സുമിത്, രാധ, ബബിത എന്നിവരാണ് അറസ്റ്റിലായത്. ഇവർക്ക് 19നും 23നും ഇടയിലാണ് പ്രായം. ഹരിയാനയിലെ സോനിപത്തിൽ നിന്നുള്ളവരാണ് കുനാലും സുമിതും. രാധയും ബബിതയും ഉത്തർപ്രദേശ് സ്വദേശികളാണ്. അറസ്റ്റിലായ നാല് പേരെയും സ്പെഷ്യൽ സെൽ മുംബൈ പോലീസിന് കൈമാറി.
മറ്റൊരു കേസിൽ ജാമ്യത്തിലിറങ്ങിയ കുനാൽ, നടനെതിരായ ആക്രമണത്തിന്റെ ഉത്തരവാദിത്തം ഏറ്റെടുത്ത അനിൽ പണ്ഡിറ്റുമായി ബന്ധപ്പെട്ടിരുന്നതായി അന്വേഷണ ഉദ്യോഗസ്ഥർ പറയുന്നു. അമേരിക്കയിൽനിന്ന് ലോറൻസ് ബിഷ്‌ണോയ് സംഘത്തിന്റെ പ്രവർത്തനങ്ങൾ നിയന്ത്രിക്കുന്നതായി ആരോപിക്കപ്പെടുന്നയാളാണ് പണ്ഡിറ്റ്. ഓഡിയോ സന്ദേശത്തിലൂടെയാണ് ഇയാൾ ആക്രമണത്തിന്റെ ഉത്തരവാദിത്തം ഏറ്റെടുത്തതായി അവകാശപ്പെട്ടത്.
കുനാലിന്റെ നിർദേശപ്രകാരം രാധയും ബബിതയും ആക്രമണത്തിന് ഉപയോഗിച്ച തോക്ക് മുംബൈയിലെത്തിച്ച് പ്രതികൾക്ക് കൈമാറിയെന്നാണ് അന്വേഷണ സംഘത്തിന്റെ കണ്ടെത്തൽ. വെടിവെപ്പിനായി ഉപയോഗിച്ച ആയുധം എത്തിച്ചുനൽകിയ സംഘത്തിലെ മുഴുവൻ കണ്ണികളെയും കണ്ടെത്താൻ കഴിഞ്ഞതായാണ് അന്വേഷണ ഉദ്യോഗസ്ഥർ കരുതുന്നത്.
ജയിലിൽനിന്ന് പുറത്തിറങ്ങിയതിന് പിന്നാലെ ഹരിയാനയിലെ ഹർസാന ഗ്രാമത്തിൽനിന്നുള്ള ഒരു സുഹൃത്ത് വഴിയാണ് കുനാൽ അനിൽ പണ്ഡിറ്റുമായി ബന്ധം സ്ഥാപിച്ചതെന്നാണ് അന്വേഷണത്തിൽ വ്യക്തമായത്. പിന്നീട് എൻക്രിപ്റ്റഡ് മെസേജിങ് ആപ്ലിക്കേഷൻ വഴി ഇരുവരും ആശയവിനിമയം നടത്തി. പണ്ഡിറ്റിന്റെ നിർദേശപ്രകാരം കുനാൽ അമൃത്സറിൽനിന്ന് ഒരു പിസ്റ്റളും 20 വെടിയുണ്ടകളും സംഘടിപ്പിച്ചതായും ആരോപണമുണ്ട്.
ഏകദേശം രണ്ട് മാസം മുമ്പ് കുനാൽ രാധയെ കണ്ടുമുട്ടുകയും തന്റെ പ്രവർത്തനങ്ങളെക്കുറിച്ച് വിശദീകരിക്കുകയും ചെയ്തു. തുടർന്ന് തോക്ക് മുംബൈയിലേക്ക് കൊണ്ടുപോകാൻ രാധയെ പ്രേരിപ്പിച്ചതായാണ് അന്വേഷണ ഉദ്യോഗസ്ഥർ പറയുന്നത്.
വെടിവെപ്പിന് മൂന്ന് ദിവസം മുമ്പ്, ഒക്ടോബർ 15ന്, കുനാൽ രാധയെയും ബബിതയെയും ന്യൂഡൽഹി റെയിൽവേ സ്റ്റേഷനിൽ എത്തിച്ചു. അവിടെനിന്ന് ഇരുവരും ട്രെയിൻ മാർഗം മുംബൈയിലേക്ക് പുറപ്പെട്ടു. രാധയുടെ ബാഗിനുള്ളിൽ ഒളിപ്പിച്ചാണ് പിസ്റ്റൾ കൊണ്ടുപോയതെന്നാണ് വിവരം. യാത്രയ്ക്കിടെ കുനാൽ എൻക്രിപ്റ്റഡ് മെസേജിങ് ആപ്ലിക്കേഷൻ വഴി ഇരുവരുമായും നിരന്തരം ബന്ധപ്പെട്ടിരുന്നു. അനിൽ പണ്ഡിറ്റിന്റെ നിർദേശങ്ങളും ഇയാൾ യുവതികൾക്ക് കൈമാറിയിരുന്നതായാണ് ആരോപണം.
ഒക്ടോബർ 17ന്, ആക്രമണത്തിന് ഒരു ദിവസം മുമ്പ്, ഇരുവരും മുംബൈയിലെ ദാദർ റെയിൽവേ സ്റ്റേഷനിലെത്തി. തുടർന്ന് സമീപത്തെ ഒരു ഹോട്ടലിൽ മുറിയെടുത്തു. അന്നേ ദിവസം രാവിലെ 11 മണിയോടെ പ്രായപൂർത്തിയാകാത്ത ഒരു ആൺകുട്ടി ഹോട്ടലിന് സമീപത്തെത്തി രാധയിൽനിന്ന് ബാഗ് കൈപ്പറ്റിയതായും അന്വേഷണ ഉദ്യോഗസ്ഥർ പറയുന്നു.
ഒക്ടോബർ 18ന് വൈകിട്ട് ഏഴുമണിയോടെയാണ് ടൈഗർ ഷ്രോഫിന്റെ കാറിന് നേരെ വെടിവെപ്പുണ്ടായതെന്നാണ് റിപ്പോർട്ട്. ഹൃതിക്, റേഹാൻ, ഫൂൽ സിങ് എന്നിവരാണ് ആക്രമണം നടത്തിയതെന്ന് ആരോപിക്കപ്പെടുന്നു. ആക്രമണത്തിന് പിന്നാലെ, മുംബൈയിൽനിന്ന് രക്ഷപ്പെടാൻ കഴിയാതെ അക്രമികൾ കുടുങ്ങിക്കിടക്കുകയാണെന്ന് അനിൽ പണ്ഡിറ്റ് കുനാലിനെ അറിയിച്ചതായാണ് അന്വേഷണ സംഘത്തിന്റെ കണ്ടെത്തൽ. ഇവരെ നഗരത്തിൽനിന്ന് പുറത്തുകടക്കാൻ സഹായിക്കണമെന്നും പണ്ഡിറ്റ് നിർദേശിച്ചതായി ആരോപണമുണ്ട്.
അതേസമയം, ഒക്ടോബർ 18ന് തന്നെ രാധയും ബബിതയും ദാദറിൽനിന്ന് ഹരിദ്വാർ എക്സ്പ്രസിൽ ഡൽഹിയിലേക്ക് മടങ്ങി. ഒക്ടോബർ 20ന് ന്യൂഡൽഹി റെയിൽവേ സ്റ്റേഷനിൽവെച്ചാണ് ഇരുവരെയും പോലീസ് പിടികൂടിയത്. കുനാലിനെയും സുമിതിനെയും ഹരിയാനയിലെ സോനിപത്തിൽനിന്നാണ് അറസ്റ്റ് ചെയ്തത്.
ആക്രമണത്തിന് പിന്നാലെ ഒളിവിൽ പോകാൻ ശ്രമിച്ച ഹൃതിക്, റേഹാൻ, ഫൂൽ സിങ് എന്നിവരെ അടുത്ത ദിവസം രാജസ്ഥാനിലെ കോട്ടയിൽവെച്ച് അറസ്റ്റ് ചെയ്തു. ട്രെയിനിൽ യാത്ര ചെയ്യുന്നതിനിടെയാണ് ഇവർ പിടിയിലായത്. നടന്റെ കാറിന് നേരെയുണ്ടായ വെടിവെപ്പിന് പിന്നിലെ ഗൂഢാലോചനയും ആയുധങ്ങൾ എത്തിച്ചുനൽകിയ ശൃംഖലയും കണ്ടെത്താനുള്ള അന്വേഷണത്തിന്റെ ഭാഗമായാണ് തുടർച്ചയായ അറസ്റ്റുകൾ. ലോറൻസ് ബിഷ്‌ണോയ് സംഘവുമായുള്ള ബന്ധം ഉൾപ്പെടെയുള്ള കാര്യങ്ങളിൽ പോലീസ് അന്വേഷണം തുടരുകയാണ്.
