കൊച്ചി: സംസ്ഥാനത്ത് സ്വർണവില വീണ്ടും താഴേക്കുതന്നെ. ഇന്ന് പവന് 440 രൂപയും ഗ്രാമിന് 55 രൂപയുമാണ് കുറഞ്ഞത്. ഇതോടെ ഒരു പവൻ സ്വർണത്തിന് 57,760 രൂപയിലും ഗ്രാമിന് 7,220 രൂപയിലുമാണ് വ്യാപാരം നടക്കുന്നത്. 18 കാരറ്റ് സ്വർണം ഗ്രാമിന് 45 രൂപ ഇടിഞ്ഞ് 5,950 രൂപയിലെത്തി.
ഈ മാസത്തിൻറെ തുടക്കത്തിൽ റെക്കോഡ് കുതിപ്പായിരുന്നു, 59,080 രൂപയായിരുന്നു സ്വർണവില. ഏഴിന് 57,600 രൂപയായി താഴ്ന്നു. 1320 രൂപയുടെ കനത്ത ഇടിവാണ് സ്വർണവിലയിലുണ്ടായത്. പിന്നാലെ വെള്ളിയാഴ്ച പവന് 680 രൂപ വർധിച്ചെങ്കിലും ശനിയാഴ്ച പവന് 80 രൂപ കുറഞ്ഞിരുന്നു.
അന്താരാഷ്ട്ര വിപണിയിലെ ചലനങ്ങളാണ് സ്വർണവിലയിൽ പ്രതിഫലിക്കുന്നത്. ഒക്ടോബർ അവസാനവാരം ഔൺസിന് 2,790 ഡോളർ എന്ന സർവകാല റിക്കാർഡ് തൊട്ട രാജ്യാന്തരവില ഇപ്പോൾ 120 ഡോളറിലധികം ഇടിഞ്ഞ് 2,669 ഡോളറിലാണ് ഇപ്പോൾ വ്യാപാരം പുരോഗമിക്കുന്നത്.
അതേസമയം, വെള്ളിയുടെ വിലയിലും ഇടിവാണ് ഇന്ന് രേഖപ്പെടുത്തുന്നത്. ഗ്രാമിന് ഒരു രൂപ കുറഞ്ഞ് 99 രൂപയിലെത്തി.
